বিটিচিৰ জলসিঞ্চন বিভাগত ব্যাপক দুৰ্নীতি সংঘটিত হোৱাৰ তথ্য পোহৰলৈ আহিছে । কোকৰাঝাৰ জিলাৰ গোসাঁইগাঁও মহকুমাৰ জাম্বুগুৰী অঞ্চলৰ খেতিয়ক ৰাইজক সহায় কৰিবলৈ বিপিএফ চৰকাৰৰ দিনত প্ৰায় ১৫ বছৰ পূৰ্বে কে’বা কোটি টকা ব্যয় সাপেক্ষে এখন চুইছ গেট নিৰ্মাণ কৰিছিল । কোটি টকা চৰকাৰী ধন ব্যয় কৰি উক্ত চুইছ গেটখন নিৰ্মাণ কৰাৰ পাছতো কৃষকে পথাৰত পানী লাভ নকৰিলে বুলি গুৰুতৰ অভিযোগ উত্থাপন কৰিছে কৃষক ৰাইজে ।
বিপিএফ চৰকাৰৰ দিনত ঠিকাদাৰে ধন গোটাবলৈ কৃষকৰ উদ্দেশ্য বিহীনভাৱে চুইছ গেট স্থাপন কৰি ধন লুটি নিছে বুলি অভিযোগ উত্থাপন কৰে ভুক্তভোগী ৰাইজে । যাৰ ফলত চেংমাৰী গাঁৱৰ চুইছ গেটখন আজিও কাৰ্যক্ষম নহ’ল । আনকি মুকলি নোহোৱাকৈ কে’বা কোটি টকাৰ আঁচনিখন ধ্বংসৰ গৰাহত পৰা পৰিলক্ষিত হৈছে ।
ইপিনে, দেখা পোৱা গৈছে যে চুইছ গেট নিৰ্মাণ কৰিছিল যদিও পথাৰত পানী যোগান ধৰিবলৈ নিৰ্মাণ কৰা নাছিল নলা । চৰকাৰী ফাইলতে চুইছ গেট স্থাপন কৰি অসম তথা বিটিচিৰ জনসিঞ্চন বিভাগে দায়িত্ব সামৰা পৰিলক্ষিত হৈছে ।
ভুক্তভোগী কৃষক ৰাইজে উক্ত ঘটনাৰ উচিত তদন্ত কৰি কামটোত দুৰ্নীতি সংঘটিত কৰা ঠিকাদাৰজনৰ বিৰুদ্ধে বিহিত ব্যবস্থা গ্রহণ কৰিবলৈ দাবী জনায় ।