ভাৰতৰ চুবুৰীয়া শ্ৰীলংকাৰ চৰম অৰ্থনৈতিক বিপৰ্যয় প্ৰত্যক্ষ কৰি নৰেন্দ্ৰ মোদী চৰকাৰৰ শীৰ্ষ আমোলাসকলৰ একাংশই দেশত অব্যাহত থকা বিনামূলীয়া আঁচনিসমূহক লৈ গভীৰ উদ্বেগ প্ৰকাশ কৰিছে । হিতাধিকাৰীমুখী এনে আঁচনিয়ে ভাৰত চৰকাৰক শ্ৰীলংকাৰ দৰে বিপদগ্ৰস্ত কৰিব পাৰে বুলি প্ৰধানমন্ত্ৰী মোদীৰ সন্মুখতে শংকা প্রকাশ কৰি সতৰ্ক কৰি দিছে কেন্দ্ৰীয় চৰকাৰৰ জ্যেষ্ঠ সচিব পৰ্যায়ৰ বিষয়াই ।
প্ৰধানমন্ত্ৰী মোদীয়ে জ্যেষ্ঠ আমোলাৰ স’তে মিলিত হোৱা এক বৈঠকত একাংশ বিষয়াই বিভিন্ন ৰাজ্যই ৰূপায়ণ কৰি অহা জনমুখী আঁচনিসমূহক লৈ উদ্বেগ প্রকাশ কৰি কয় যে এনে আঁচনিসমূহ অৰ্থনৈতিকভাৱে বহনক্ষম নহয় । তদুপৰি এইসমূহ আঁচনিয়ে তেওঁলোকক শ্ৰীলংকাৰ পথলৈ লৈ যাব পাৰে বুলি বিষয়াসকলে মুকলিকৈয়ে শংকা প্রকাশ কৰে ।
সূত্ৰটোৱে লগতে জনায় যে প্রধানমন্ত্রীয়ে সকলো দপ্তৰৰ সচিবসকলৰ স’তে অনুষ্ঠিত কৰা এই বৈঠকত এনে উদ্বেগ প্ৰকাশিত হয় । বৈঠকত উপস্থিত থাকে ৰাষ্ট্ৰীয় নিৰাপত্তা উপদেষ্টা অজিত ড’ভাল, প্ৰধানমন্ত্ৰীৰ প্ৰধান সচিব পি কে মিশ্ৰ আৰু কেবিনেট সচিব ৰাজীৱ গৌৰা আদিৰ দৰে চৰকাৰৰ নীতি-নিৰ্ধাৰক শীৰ্ষ আমোলা ।
এই বৈঠকত মোদীৰ নিৰ্দেশনা অনুসৰি, দুই ডজনতকৈ অধিক সচিবে তেওঁলোকৰ মতামত ব্যক্ত কৰে । সূত্ৰত প্ৰকাশ যে প্ৰধানমন্ত্ৰীয়ে মুকলি মনেৰে কথাবোৰ শুনে । প্ৰধানমন্ত্ৰীয়ে চৰকাৰৰ নীতিৰ ত্ৰুটিসমূহ দাঙি ধৰিবলৈ বিষয়াসকলক আহ্বান জনায় । তদুপৰি তেওঁলোকৰ পৰামৰ্শ দাঙি ধৰিবলৈ কয় । বিষয়াসকল জড়িত থকা সংশ্লিষ্ট মন্ত্ৰণালয়ৰ স’তে সম্পৰ্কিত নহ’লেও আন বিষয়ৰ প্ৰসংগতো প্ৰধানমন্ত্ৰীয়ে বিষয়াসকল মতামত আৰু পৰামৰ্শ ব্যক্ত কৰিবলৈ কয় বৈঠকত ।
এই সন্দৰ্ভতে কে’বাজনো সচিবে শেহতীয়াকৈ সম্পন্ন হোৱা পাঁচ ৰাজ্যৰ বিধানসভা নিৰ্বাচনত আৰ্থিকভাৱে শোচনীয় অৱস্থাত থকা ৰাজ্যই ঘোষণা কৰা জনমুখী আঁচনিৰ প্ৰসংগ উত্থাপন কৰে । ইতিমধ্যে অৰ্থনৈতিক দুৰৱস্থা ভোগা ৰাজ্যসমূহৰ উপৰি অন্যান্য ৰাজ্যতো ঘোষণা কৰা একে ধৰণৰ বিনামূলীয়া আঁচনিৰ বিষয়ে উল্লেখ কৰি বিষয়াসকলে কয় যে এনে আঁচনিসমূহ অৰ্থনৈতিকভাৱে বহন কৰিব পৰা বিধৰ নহয় । ইয়াৰ ফলত ৰাজ্যসমূহত শ্ৰীলংকা সদৃশ পৰিস্থিতিৰ সৃষ্টি হ’ব পাৰে । কিয়নো প্ৰতিখন ৰাজ্যৰে দেশী-বিদেশী ঋণৰ পৰিমাণ যথেষ্ট বেছি ।
উল্লেখ্য যে সম্প্ৰতি দেশৰ ইতিহাসতে শোচনীয় অৰ্থনৈতিক সংকটৰ মাজেৰে দিন পাৰ কৰিছে শ্ৰীলংকাই । এনে সময়তে কেন্দ্ৰৰ শীৰ্ষ আমোলাৰ প্ৰধানমন্ত্ৰীৰ সন্মুখতে হিতাধিকাৰী সৃষ্টিকাৰী আঁচনিক লৈ ব্যক্ত কৰা উদ্বেগ অত্যন্ত স্পৰ্শকাতৰ বিবেচিত হৈছে ।
ইপিনে, বৈঠকত প্ৰধানমন্ত্ৰীয়ে বিষয়াসকলক মানসিকতাৰ সলনি কৰিবলৈ আহ্বান জনায় । তেওঁ কয় যে দৰিদ্ৰতাৰ অজুহাত দেখুৱাই বৃহৎ উন্নয়নী প্ৰকল্প গ্ৰহণৰ পৰা বিৰত থকা পুৰণি কাহিনী পুনৰাবৃত্তিৰ পৰা বিৰত থাকিব লাগে । সংকটৰ মোকাবিলাৰ মানসিকতা পৰিহাৰ কৰি উদ্ধৃত মোকাবিলাৰ নতুন প্ৰত্যাহ্বান গ্ৰহণ কৰিবলৈ মোদীয়ে আমোলাসকলক আহ্বান জনায় । এক বৃহৎ দৃষ্টিভংগীৰে বিষয়াবোৰ অৱলোকন কৰিবলৈ তেওঁ পৰামৰ্শ দিয়ে ।
