আগ্ৰাত মেট্র’ ৰেলৰ প্রথম পর্যায়ৰ কাম আৰম্ভ হৈছে । তেনে সময়তে প্রস্তাৱিত এটা ষ্টেচনৰ নাম কি হ’ব, তাক লৈ পথত নামে বিজেপি । প্রস্তাৱিত জামা মছজিদ ষ্টেচনৰ নাম সলনি কৰি বাবা মানকামেশ্বৰ নাথ ষ্টেচন কৰাৰ দাবীত উপ-মুখ্যমন্ত্রীক স্মাৰকলিপি দিয়াৰ লগতে স্থানীয় বিজেপি বিধায়কে বিক্ষোভ সমাবেশ কৰাৰো সকীয়নি দিছে ।
আগ্ৰাত মেট্র’ চলিব । সেই উপলক্ষে স্তম্ভ নির্মাণৰ প্রথম পর্যায়ৰ কাম আৰম্ভ হৈছে । কিন্তু ষ্টেচনৰ নাম লৈ ইতিমধ্যে বিতর্ক আৰম্ভ হৈছে । বিতর্কৰ আৰম্ভণি হয়, সম্প্রতি উত্তৰ প্রদেশৰ উপ-মুখ্যমন্ত্রী কেশৱপ্রসাদ মৌর্যৰ আগ্ৰা ভ্ৰমণৰ সময়ত । সেই সময়ত কেশৱক প্রস্তাৱিত জামা মছজিদ ষ্টেচনৰ নাম সলনি কৰি বাবা মানকামেশ্বৰ ষ্টেচন কৰাৰ দাবীত দলেবলে দৰবাৰ কৰে স্থানীয় বিজেপি বিধায়ক জিএছ ধর্মেশে । বিজেপিৰ দাবী, মানকামেশ্বৰ মন্দিৰো এই অঞ্চলতে পৰে । কেশৱে সমগ্ৰ ঘটনাটো শুনি কয়, “অত্যন্ত গুৰুত্বপূর্ণ দাবী । এই বিষয়ত সংশ্লিষ্ট কর্তৃপক্ষক পৰ্যবেক্ষণ কৰিবলৈ দিয়া হ’ব ।”
এই বিষয়ত ভাৰতীয় মুছলিম বিকাশ পৰিষদৰ প্ৰধান ছামি আঘাইয়ে কয়, “আগ্ৰা অঞ্চলৰ সৰ্ববৃহৎ জামা মছজিদ । উত্তৰ প্রদেশৰ মেট্র’ ৰেল কর্প’ৰেছনে এই ষ্টেচনৰ নাম দিয়াৰ কথা ভাবিছে, তাত একো ভুল দেখা নাই । কিছুসংখ্যক লোকৰ অপ্রয়োজনীয় বিৰোধিতাৰ চাপত শিৰ নত কৰি ষ্টেচনৰ নাম পৰিৱৰ্তন কৰা উচিত নহ’ব ।”
মানকামেশ্বৰ মন্দিৰৰ মহন্ত যোগেশ পুৰীয়ে কৈছে, “শিৱৰ মন্দিৰে আগ্ৰাক আৱৰি আছে । সেয়ে এই ষ্টেচনৰ নাম মানকামেশ্বৰ নাথ মন্দিৰৰ নামতেই ৰখা উচিত । কিন্তু ইয়াত ৰাজনীতিৰ কোনো স্থান নাই ।”
যদিও ইউপি মেট্র’ ৰেল কর্প’ৰেছনৰ এগৰাকী বিষয়াই জনাইছে, কোন ষ্টেচনক কি নাম দিয়া হ’ব, সেয়া নিৰ্ধাৰণ কৰে মেট্র’ ষ্টেচন কমিটীয়ে । লগতে তেওঁ জনাইছে, এতিয়াও ষ্টেচনৰ নাম চূড়ান্ত হোৱা নাই ।
