প্রাক্তন বিজেপি মুখপাত্র নূপুৰ শর্মাৰ বিতর্কিত মন্তব্যৰ ফলত সম্প্রতি ছৌদি আৰৱ, কাতাৰ, কুৱেইটসহ আৰৱৰ বাকী দেশসমূহৰ প্রৱল সমালোচনাৰ সন্মুখীন হ’বলগীয়া হৈছে ভাৰতে । অৱশ্যে এই বিতর্কিত পৰিস্থিতিতেই ভাৰতৰ পৰা কুৱেইটত ৰপ্তানি কৰা হৈছে ১৯২ হেজাৰ কেজি গোবৰ । কুৱেইটত জৈৱ কৃষিৰ বাবে এই গোবৰ প্ৰেৰণ কৰা হৈছে বুলি সূত্রৰ খবৰ । ১৫ জুন বুধবাৰে কনাকাপুৰা ৰেলৱে ষ্টেচনৰ পৰা গোবৰৰ প্রথম আবণ্টন কুৱেইট উদ্দেশ্যি ৰাওনা হৈছে । শুল্ক দপ্তৰৰ তত্ত্বাৱধানত গোবৰ পেকেটজাত কৰাৰ কাম চলিছে বুলিও জানিব পৰা গৈছে ।
জয়পুৰৰ এটা গৌশালাৰ পৰা এই গোবৰ প্ৰেৰণ কৰা হৈছে । কুৱেইটৰ এটা বেচৰকাৰী সংস্থাত এই গোবৰ ৰপ্তানি কৰা হৈছে । এই বিষয়ত দুই দেশৰ মাজত ইতিমধ্যে চুক্তি হৈছে বুলিও সূত্রৰ খবৰ ।
ভাৰতৰ জৈৱ কৃষিক প্রযোজক সমিতিৰ ৰাষ্ট্ৰীয় সভাপতি অতুল গুপ্তই বিষয়টো নিশ্চিত কৰি জনাইছে, জয়পুৰ-ভিত্তিক এটা সংস্থাই এই বিপুল পৰিমাণৰ গোবৰ ৰপ্তানি কৰাৰ আবণ্টন পাইছে । জয়পুৰৰ এই সংস্থাৰ পৰিচালক প্রশান্ত চতুর্বেদীয়ে জনাইছে, সম্ভৱত এয়ে প্রথম ভাৰতৰ পৰা দেশী গৰুৰ গোবৰ কুৱেইটৰ দৰে কোনো দেশত প্ৰেৰণ কৰা হৈছে ।
দেশ জুৰি গোবৰক লৈ বহু গৱেষণা চলিছে । শস্যৰ উৎপাদন বৃদ্ধিৰ লগতে গোবৰ ব্যৱহাৰ কৰি উৎপন্ন শস্য খালে বিভিন্ন ৰোগৰ পৰা মুক্তি পোৱা যায় বুলিও একাধিক গৱেষণাত দাবী কৰা হৈছে ।
কুৱেইটতো গোবৰ ব্যৱহাৰ কৰি জৈৱ কৃষি কৰাৰ ক্ষেত্ৰত বহু দিনৰ পৰাই গৱেষণা চলিছিল । কুৱেইটত কৃষিকাৰ্যৰ ক্ষেত্রত প্রধান পৰিপন্থী শুষ্ক জলবায়ু আৰু পর্যাপ্ত পানীৰ অভাৱ । সেয়ে গোবৰ সাৰ ব্যৱহাৰ কৰি জৈৱ কৃষি কৰাৰ ক্ষেত্ৰত গুৰুত্ব দিছে কুৱেইটে ।
