বিলকিছ বানো ধর্ষণ গোচৰত দোষীসকলৰ মুক্তি সংক্রান্ত সকলো নথি দিবৰ বাবে গুজৰাট চৰকাৰক নির্দেশ দিলে উচ্চতম ন্যায়ালয়ে । শুকুৰবাৰে শীর্ষ আদালতে গুজৰাট চৰকাৰক জনাইছে, বিলকিছ বানো গোচৰৰ কার্যক্রমৰ সম্পূৰ্ণ ৰেকর্ড দাখিল কৰিব লাগিব । দোষীসকলৰ মুক্তিৰ আদেশৰ নথিও জমা দিব লাগিব । সংশ্লিষ্ট গোচৰৰ সকলো প্রাসংগিক নথি জমা দিবৰ বাবে সময় দিয়া হৈছে দুসপ্তাহ ।
দোষীসকলৰ এজনে উচ্চতম ন্যায়ালয়ত আবেদন কৰিছিল । সেই আবেদনৰ ভিত্তিত গুজৰাট চৰকাৰক বিলকিছ গোচৰৰ দোষীসকলক শাস্তিমুক্ত কৰা বিষয়টো বিবেচনা কৰিবলৈ নিৰ্দেশ দিছিল শীর্ষ আদালতে । ইয়াৰ পাছতে যোৱা ১৫ আগষ্টত গুজৰাটৰ কাৰাগাৰৰ পৰা মুক্তি পায় ২০০২ৰ ফেব্রুৱাৰীত পাঁচ মাহৰ অন্তঃসত্ত্বা বিলকিছ বানোক গণধর্ষণত দোষী সাব্যস্ত হোৱা ১১ জন ।
বিলকিছৰ তিনি বছৰীয়া কন্যাকো হত্যা কৰিছিল তেওঁৰ চকুৰ সন্মুখতে । বিলকিছৰ পৰিয়ালৰ মুঠ আঠজন সদস্যক ‘হত্যা’ কৰিছিল ।
দোষীসকল ১৫ বছৰ জেল খাটি মুক্তি পোৱাৰ পাছতেই বিতর্ক আৰম্ভ হয় । তেওঁলোকে কাৰাগাৰৰ পৰা মুক্তি পোৱাৰ পাছতেই মালা, মিঠাইৰে আদৰণি জনোৱা হয় । বিজেপিৰ এজন জনপ্রতিনিধিয়ে কয়, এই ধর্ষকসকলৰ ‘স্বভাৱ-চৰিত্ৰ ভাল ।’
গাঁৱলৈ উভতি তেওঁলোকৰ আনন্দ-উচ্ছ্বাস দেখি ভয় খায় অনেকে ঘৰ এৰ গুচি যায় । পাছত প্রায় ছয় হেজাৰ লোকে প্রশাসনক পত্ৰ লিখে । দোষীসকলৰ মুক্তিৰ সিদ্ধান্তৰ বিৰুদ্ধে উচ্চতম ন্যায়ালয়ত আবেদন কৰা হয় ।
শীৰ্ষ ন্যায়ালয়ত গোচৰ কৰে তৃণমূল সাংসদ মহুৱা মৈত্রই, চিপিএম নেত্রী সুভাষিণী আলি প্রমুখে । ইয়াৰ পাছতেই পদক্ষেপ গ্ৰহণ কৰে উচ্চতম ন্যায়ালয়ে । তিনি সপ্তাহ পাছতেই এই গোচৰৰ শুনানি হ’ব শীর্ষ আদালতত ।
