Bharetri Dwitiya festival of the Gorkha Student Union was celebrated in Nagrijuli :
তামুলপুৰ জিলাৰ নাগ্ৰীজুলিৰ ভাওৰাগুৰি হিন্দী প্ৰাথমিক বিদ্যালয় প্ৰাংগনত সদৌ অসম গোৰ্খা ছাত্র সন্থা চমুকৈ আগছুৰ তামুলপুৰ জিলা সমিতিৰ উদ্যোগত পুৱ ডেফেলী- কুমাৰীকাটা আঞ্চলিক সমিতিৰ সহযোগত আৰু নাগ্ৰীজুলি আঞ্চলিক সমিতিৰ আতিথ্যত কালি সন্ধিয়া পৱিত্ৰ তিহাৰ উৎসৱ উপলক্ষে সামুহিক ভাতৃ দ্বিতীয় উদযাপন কৰা হয়। কাৰ্যসূচী অনুসৰি কালি আবেলি ৫-০০ বজাত মঞ্চ মুকলি কৰাৰ পিছতে ৫-৩০ বজাত বন্তি প্ৰজ্বলন কৰে অসম চৰকাৰৰ প্ৰাক্তন মন্ত্রী পদম বাহাদুৰ চৌহানে। তাৰ পিছতে প্ৰথম বাৰ্ষিক সামুহিক ভাতৃ দ্বিতীযা উৎসৱৰ মুকলি সভা অনুষ্ঠিত হয়।
মুকলি সভাৰ সভাপতিত্ব কৰে তামুলপুৰ জিলা গোৰ্খা ছাত্র সন্থাৰ সভাপতি প্ৰকাশ লামাই । সভাত মুখ্য অতিথি হিচাপে তামুলপুৰ জিলাৰ আয়ুক্ত পংকজ চক্ৰৱৰ্তীয়ে কয় , মই মোৰ চাকৰি জীৱনত প্ৰথম বাৰৰ বাবে সুন্দৰ আৰু পবিত্র অনুষ্ঠানত এটাত অংশ গ্ৰহণ কৰি গোর্খা সকলৰ মৰম চেনেহত আপ্লুত হৈছোঁ। এই উৎসৱত পুৰুষ মহিলাৰ কোনো ভেদাভেদ নাৰাখি সকলোৱে ব্ৰতী হৈছে। তেওঁ পুনৰ কয়,গোর্খা সম্প্ৰদায়ৰ লোক সকলে শান্তিপ্ৰিয় আৰু সমন্বয়েৰে জীয়াই জাতি ৷
গোর্খা সম্প্ৰদায়ৰ লোক সকল যতেই নাথাকক কিয় তেওঁলোকে শান্তিপ্ৰিয় ভাবে সমন্বয়েৰে জীয়াই থাকিব বিচাৰে। নিজৰ অনুভৱ প্ৰকাশ কৰি জিলা আয়ুক্ত গৰাকীয়ে আৰু কয় ,অতীজৰ পৰা চলি অহা কিছুমান প্ৰথা আমাৰ মাজৰ পৰা হেৰাই যোৱাৰ উপক্ৰম হৈছে। এনেকৈ যদি আমি একেলগ হৈ থাকি একেডাল ৰচীৰে বান্ধ খাই থাকো তেন্তে আমাৰ মাজৰ পৰা হেৰাই যাব ধৰা উৎসৱ সমূহ জীয়াই থাকিব আৰু সকলোৰে মাজত ভাতৃত্ববোধ আৰু একতাৰ এনাজৰী কটকটীয়া কৰি জাতিটোক আগুৱাই লৈ যাব বুলিও তেওঁ গুৰুত্বপূৰ্ণ মন্তব্য প্ৰদান কৰে।
গোর্খা ছাত্ৰ সন্থাৰ নেতা ৰাবিশংকৰ উপ্ৰেতিযে আঁত ধৰা সভাতে গোপীনাথ বৰদলৈ চিনিয়ৰ চেকেণ্ডাৰী স্কুলৰ উপাধ্যক্ষ লোহিত উপ্ৰেতি, যুৱ নেতা মাধৱ ছেত্ৰী, সমাজকৰ্মী ৰাম বাস্তলাকে আদি কৰি কে’বাজনো বক্তাই ভাতৃ দ্বিতীয়া উদযাপনৰ তাৎপৰ্য বিতংকৈ বাখ্যা কৰে। অসমৰ গোর্খা সকলে ভাতৃ দ্বিতীয়া উৎসৱ উপলক্ষে সেই বিশেষ দিনটোত চৰকাৰী বন্ধ হিচাপে ঘোষণা কৰাৰ বাবে চৰকাৰক অনুৰোধ জনায় । সভাত তামুলপুৰ প্ৰেছ ক্লাৱৰ বিষয় ববীয়া, বিভিন্ন জাতীয় ছাত্ৰ সংগঠনৰ নেতৃবৃন্দ,আন্তৰাষ্ট্ৰীয় সংস্থা স্মাইল এছিয়াৰ কৰ্মী অভিমন্যু তালুকদাৰো উপস্থিত থাকে।
উল্লেখ্য যে গোৰ্খালী লোক সকলে পালন কৰা তিহাৰ উৎসৱটিৰ অন্তিম পৰ্বটো হ’ল ভাই ফোঁট। শুক্ল পক্ষৰ দ্বিতীয়া তিথিত উৎসৱটিৰ এই পৰ্বটো বিশেষকৈ ভগ্নী সকললৈ উৎসৰ্গিত হয়৷ ৷ ইয়াত ভগ্নীয়ে ভাই ফোঁট পৰ্বৰ সকলো আয়োজনৰ গুৰি ধৰি এজন ভাতৃৰ বাবে জলপানৰ পৰা আৰম্ভ কৰি পৰ্বটিত প্ৰয়োজন হোৱা সকলো বস্তু-সামগ্ৰী, উপহাৰ ইত্যাদিক সামৰে ৷ এই ভাই ফোঁট পৰ্বত ভগ্নী বা বাইদেউয়ে ভাতৃ আৰু ককায়েকক কপালত ভিন্ন ৰঙী ফোঁট দি দৈ পান কৰাই ভাই ফোঁট আৰম্ভ কৰে আৰু নাৰ্জি ফুলৰ মালা পিন্ধাই ভায়েক – ককায়েকৰ দীৰ্ঘায়ু কামনা কৰে ৷
গোর্খা ছাত্ৰ সন্থাৰ উদ্যোগত অনুষ্ঠিত সামূহিক ভাতৃ দ্বিতীয়া উৎসৱ উদযাপন মঞ্চত সভাৰ মাজতেই আমন্ত্ৰিত অৰ্ধ -শতাধিক অতিথিক গোর্খা গাভৰু-মহিলা সকলে অতি আদাৰেৰে সামূহিক ভাবে গঙ্গা জল ছটিয়াই ফোঁট পিন্ধাই, গোর্খা জনগোষ্ঠীৰ স্বাভিমান গোর্খা টুপী পিন্ধাই গোর্খা সকলৰ বিভিন্ন জাতীয় খাদ্য সম্ভাৰেৰে অতিথি সকলক আপ্যায়ন কৰে।
গোর্খা ছাত্র সন্থাৰ দ্বাৰা আয়োজিত এই বিশেষ অনুষ্ঠানত গোর্খা ছাত্র সন্থাৰ বিষয় ববীয়া, বিভিন্ন জাতীয় ছাত্ৰ সংগঠনৰ নেতা উপস্থিত থাকে ৷
