Widespread election violence in Samaguri:
ৰাজ্যৰ পাঁচ সমষ্টিৰ উপ-নিৰ্বাচনৰ দিন চমু চাপি অহাৰ লগে লগে হাইভল্টেজ সমষ্টি ৰূপে পৰিচিত হৈ পৰা চামগুৰি নিৰ্বাচনী হিংসা বৃদ্ধি পাইছে ৷ নিৰ্বাচনী হিংসাজৰ্জৰ চামগুৰিত শাসক- বিৰোধীৰ পৰস্পৰক আক্ৰমণ-প্ৰত্যাক্ৰমণ অব্যাহত ৷ ক্ষমতাৰ দৌৰত মত্ত একাংশৰ বিবেচনাহীন নিৰ্বাচনকেন্দ্ৰীক হিংসা – প্ৰতিহিংসাই সম্প্ৰতি চামগুৰিৰ সামাজিক পৰিবেশ বিনষ্ট কৰি পেলাইছে।
ব্যাপক নিৰ্বাচনী হিংসাই শুকুৰবাৰে নিশা জোকাৰি গ’ল নিৰ্বাচনমুখী চামগুৰিক। ধুবুৰীৰ সাংসদ ৰকিবুল হুছেইন ঘনিষ্ঠ দুজনকৈ কংগ্ৰেছ নেতা সন্তোষ কুমাৰ গুপ্তা আৰু ওছমান আলীৰ ঘৰত নিশা অচিনাক্ত দুৰ্বৃত্তই চলালে ভয়ংকৰ আক্ৰমণ।দুই কংগ্ৰেছী নেতাই অভিযোগ কৰা মতে,যোৱা নিশা হাতে-হাতে ৰ’ড, লাঠী আৰু চোকা জাতীয় অস্ত্ৰ লৈ প্ৰায় কুৰিজনীয়া দুৰ্বৃত্তৰ দলটোৱে তেওঁলোকৰ বাসগৃহত তাণ্ডৱলীলা ৷ আনকি ওছমান আলীৰ বাজিয়াগাঁওৰ ঘৰত থকা চিচিটিভিত বন্দী হৈছে সমস্ত দৃশ্যাৱলী ৷ নিশা ঘৰৰ চৌহদৰ দেৱাল পাৰ হৈ প্ৰৱেশ কৰিছিল দুৰ্বৃত্তৰ দলটো। ওছমান আলীৰ ঘৰৰ চৌহদত থকা কে’বা খনো বাসন সহ আচবাব ভাঙি লণ্ড-ভণ্ড কৰে ।
একেদৰে বৃহৎ দুৰ্বৃত্তই দলটোৱে ইয়াৰ পিছত কংগ্ৰেছৰ আন এজন নেতা সন্তোষ কুমাৰ গুপ্তাৰ আমনি তিনিআলীৰ ঘৰতো প্ৰৱেশ কৰি ভীতি প্ৰদৰ্শন কৰি এফালৰ পৰা সকলো সা- সামগ্ৰী ভাঙি লণ্ড-ভণ্ড কৰাৰ লগতে বাসগৃহৰ চৌহদত থকা চাৰিখনকৈ বাহন ভাঙি চুৰমাৰ কৰে ৷ ইপিনে দুই কংগ্ৰেছ নেতাই অভিযোগ কৰা মতে কুৰিজনীয়া দুৰ্বৃত্তৰ দলটো বিজেপিৰ পোহনীয়া গুণ্ডা বাহিনী ৷ এই ঘটনাৰ পিছত আজি ঘটনাস্থলীত চামগুৰিৰ কংগ্ৰেছী প্ৰাৰ্থী ওচমানৰ ঘৰত উপস্থিত হৈ পৰিস্থিতিৰ বুজ লৈ মন্তব্য কৰে যে,নিৰ্বাচনৰ দিন ঘোষণা কৰাৰ পিছত বিজেপিৰ পোহনীয়া গুণ্ডাই আমাৰ কৰ্মীক টাৰ্গেট কৰি ইটোৰ পিছত সিটোকৈ সমাজ বিৰোধী কামকাজ অব্যাহত ৰাখি সন্ত্ৰাস অব্যাহত ৰাখিছে ৷ যোৱা নিশাই আমাৰ দুই নেতাৰ বাসগৃহত আক্ৰমণ কৰিছে দুৰ্বৃত্তই ৷ আনকি ঘটনাস্থলীত উদ্বাৰ হোৱা চাৰিটা একে ফৰটি চেভেনৰ গুলীয়ে প্ৰমাণ কৰে যে শাসনাধিষ্ঠ দলে কি পৰ্যায়লৈ নিছে চামগুৰিৰ অৱস্থা ৷ এই ক্ষেত্ৰত মুখ্যমন্ত্ৰী আৰু ডিজিপিৰ হস্তক্ষেপ দাবী কৰিছে ৷ চামগুৰিত এক সুস্থ গণতন্ত্ৰৰ বাহাল ৰখাৰ স্বাৰ্থত আৰক্ষীয়ে নিৰপেক্ষ দৃষ্টিভংগী ভংগীৰে নিজৰ কৰ্তব্য সম্পাদন কৰক ৷
ইতিমধ্যে আজি বাজিয়াগাঁওৰ কংগ্ৰেছ নেতা ওচমান আলীৰ বাসগৃহত আৰক্ষী উপস্থিত হৈ দুৰ্বৃত্তই এৰি যোৱা একে ফৰটি চেভেনৰ চাৰিটা সক্ষিয় গুলী উদ্ধাৰ কৰাৰ লগতে আৰম্ভ কৰিছে তদন্ত ৷
আনহাতে শুকুৰবাৰে নিশাই শ’লমাৰীত বিজেপিৰ কাৰ্যালয়তো চলিছিল একাংশ কংগ্ৰেছ কৰ্মীৰ আক্ৰমণ। সাংসদ ৰকিবুল হুছেইনৰ স’তে প্ৰচাৰাভিযান অংশ লোৱা একাংশ কংগ্ৰেছ কৰ্মীত হাতত চোকা জাতীয় অস্ত্ৰ লৈ নিৰ্বাচনী কাৰ্যালয় লণ্ড- ভণ্ড কৰাৰ লগতে কে’বাগৰাকী বিজেপি কৰ্মীক উপযুপৰি প্ৰহাৰ কৰে ৷ এই ঘটনাত আহত হয় ছজনকৈ বিজেপি কৰ্মী ৷ আহত বিজেপি কৰ্মী কেইজন হ’ল কামালউদ্দিন, আব্দুল হাছিম আৰু আব্দুল ৰহমান,আবু তাহেৰ, আব্দুল জলিল আৰু আলালউদ্দিন । ইয়াৰে চাৰিজনৰ অৱস্থা অতি গুৰুতৰ হোৱাত উন্নত চিকিৎসাৰ বাবে ততাতৈয়াকৈ নিশাই ভৰ্তি কৰা হয় নগাঁও চিভিল হাস্পতালত ৷ শ’লমাৰীৰ এই ঘটনাক লৈ সমগ্ৰ অঞ্চলটোৰ পৰিস্থিতি উত্তপ্ত হৈ আছে ৷ ঘটনাৰ বুজ ল’বলৈ নিশাই ঘটনাস্থলীত উপস্থিত হৈছিল বঢ়মপুৰৰ বিজেপি বিধায়ক জিতু গোস্বামী ৷ বিধায়ক গৰাকী এই ঘটনাক তীব্ৰ গৰিহণা দি কংগ্ৰেছী নেতা- কৰ্মী সকলক সকীয়নি দি কয় যে ,এই ঘটনাই শেষ ঘটনা হওক৷ইয়াৰ পিছত যদি এনে আক্ৰমণ হয় বহি নাথাকে বিজেপি কৰ্মী ৷
আনহাতে ,বৃহস্পতিবাৰে নিশা শ’লমাৰী আৰু মাগুৰমাৰীত কংগ্ৰেছৰ তিনিটা অস্থায়ী নিৰ্বাচনী কাৰ্যালয়ৰ দুৰ্বৃত্তই অগ্নি সংযোগ কৰাৰ লগতে কংগ্ৰেছ কৰ্মী এজনক ঘৰতো আক্ৰমণ চলাই ৷ এই ঘটনাত এজন কংগ্ৰেছ কৰ্মী আহত হয়। ইয়াৰ পাছতে শুকুৰবাৰে নিশা শ’লমাৰীত কংগ্ৰেছ নেতাৰ বাসগৃহত দুৰ্বৃত্তই আক্ৰমণ কৰাৰ ঘটনাক লৈ চামগুৰিৰ অৱস্থা অতি উত্তেজনাময় হৈ পৰিছে ৷ নিৰ্বাচনী প্ৰচাৰাভিযান অন্ত পৰিবলৈ মাজত তিনিটা দিন থকা অৱস্থাত চামগুৰিত হিংসা আৰু প্ৰতিহিংসাই ভয়ংকৰ ৰূপ লোৱাত সচেতন মহল অধিক চিন্তিত হৈ পৰিছে ৷