No need to worry about HMPV:
চুবুৰীয়া চীনত এইছএমপিভিৰ সংক্রমণ বিয়পি পৰাৰ সমান্তৰালভাৱে ভাৰততো এই ভাইৰাছ তিনিটিকে শিশুৰ দেহত সংক্রমিত হোৱাৰ পাছত ভয়ৰ কোনো কাৰণ নাই বুলি কেন্দ্রীয় চৰকাৰে আশ্বস্ত কৰিলেও পতিয়ন যোৱা নাই সাধাৰণ লোক। ইতিমধ্যে উদ্বিগ্ন হৈছে দেশবাসী।
এই ভাইৰাছ ক’ভিডৰ দৰে প্রাণঘাতী নেকি বুলিও প্রশ্ন উঠিছে।এই পৰিপ্ৰেক্ষিতত বিভিন্ন বিশেষজ্ঞ চিকিৎসকে দেশজুৰি ল’বলগীয়া সাৱধানতা সম্পর্কে পৰামৰ্শ দিছে। এনে পৰামৰ্শ অনুসৰি এইছএমপিভি ক’ভিডৰ দৰে নতুন ভাইৰাছ নহয়। এই ভাইৰাছ আমাৰ দেহৰ বাবে পূর্ব পৰিচিত। শীতকালত বিভিন্ন দেশত প্রকোপ বৃদ্ধি পোৱা ইনফ্লুৱেঞ্জা বা অন্যান্য ভাইৰাছৰ ভিতৰত এইছএমপিভিও অন্যতম।
পাঁচ-ছদিনাৰ মূৰকত নিজে নিজে এই ৰোগ নিৰাময় হয়। সাধাৰণ ভাষাত ক’বলৈ গ’লে চর্দি বা কাহ যদি হয় অথবা ঠাণ্ডা যদি লাগে যি কোনোবিধ ভাইৰাছৰ বাবে হ’ব পাৰে। চিকিৎসকে কয় যে অতি বেছি আক্রান্ত নহ’লে এনে সৰু-সুৰা বেমাৰৰ আঁৰত কোনটো ভাইৰাছ আছে সেয়া চিনাক্ত কৰিবলৈ মানুহে তৎপৰ নহয়। প্রতি বছৰৰ শীতকালত দেশৰ ভাইৰাছৰ সংক্ৰমণ যি হাৰত বৃদ্ধি পায়, এইবাৰো তেনেই হৈছে।
চিকিৎসকে কয়, ‘অস্বাভাবিক কোনো ঘটনা চকুত পৰা নাই। চীনত এই ভাইৰাছক লৈ যথেষ্ট হুলস্থূলৰ সৃষ্টি হৈছে। কিন্তু ক’ভিডৰ পাছত আমাৰ দেশতো সতর্কতা বৃদ্ধি পাইছে। চাৰিৰ পৰা ১৪ বছৰ বয়সৰ শিশুসকল অধিক আক্রান্ত হ’ব পাৰে। তদুপৰি যিসকলৰ ৰোগ প্ৰতিৰোধ ক্ষমতা কম তেওঁলোকৰ বাবে ইয়াৰ সংক্ৰমণ চিন্তাৰ কাৰণ হ’ব পাৰে।’ চিকিৎসকে জনোৱা মতে, সদ্যোজাত শিশু যিদৰে ক’ভিডৰ সময়ত বিশেষ আক্রান্ত হোৱা নাই, একেদৰেই এইছএমপিভিৰ ক্ষেত্ৰতো নৱজাত যথেষ্ট সুৰক্ষিত।
চাৰি বা ততোধিক বয়সৰ শিশুসকল যদি জ্বৰ-চর্দি বা কাহত আক্রান্ত হয়, তেন্তে এই সময়ত তেওঁলোক বিদ্যালয়লৈ যাব নালাগে। বন্ধ গাড়ী, শ্রেণীকোঠা অথবা মানুহৰ ভিৰ থকা বাছ-ৰে’লকে ধৰি অন্যান্য বাহনত থাকা সময়ত মাস্ক পৰিধান কৰি থাকিব লাগে শিশুৱে। অৱশ্যে যদি কোনো শিশু থেলাছেমিয়া বা কৰ্কটৰ দৰে জটিল ৰোগত আক্রান্ত হয়, তেন্তে এই ভাইৰাছৰ সংক্রমণে মাৰাত্মক ৰূপ ধাৰণ কৰিব পাৰে। সেয়েহে অধিক সতর্ক হোৱাৰ প্রয়োজন আছে। শিশুসকলে আহাৰ গ্ৰহণ কৰাৰ পূৰ্বে যাতে হাত চাবোনেৰে ধোৱে সেই দিশলৈ অভিভাৱকে দৃষ্টি ৰাখিব লাগিব।
পৰিচ্ছন্নতাই সংক্রমণ ৰোধ কৰিব পাৰে বুলিও কয় বিশেষজ্ঞ চিকিৎসকে। ক’ভিডৰ সময়ৰ দৰেই বাহিৰৰ পৰা ঘৰলৈ আহিলে পোছাক সলনি কৰি তথা হাত-মুখ চাবোনেৰে ধুই পিতৃ-মাতৃ বা অন্যান্যসকল শিশুৰ ওচৰ চপা উচিত বুলি সদৰী কৰি দিছে চিকিৎসকে। মন কৰিবলগীয়া যে এই ভাইৰাছ হাঁচি আৰু কাহৰ জৰিয়তে যিহেতু বিয়পে সেয়েহে সাৱধান হ’ব লাগে।
কাহিলে বা হাঁচিয়ালে মুখমণ্ডল এখন ৰুমাল আদিৰে ঢাকি ৰাখিব লাগে। সঘনাই চাবোন, পানী অথবা এলক’হলযুক্ত ছেনিটাইজাৰৰে হাত ধুব লাগে। যথেষ্ট পৰিমাণে পানী আৰু সুষম আহাৰ গ্ৰহণ কৰিব লাগে।
সংক্রমণ হ্ৰাসৰ বাবে বতাহ চলাচলৰ উপযুক্ত ব্যৱস্থা ৰাখিব লাগে। তদুপৰি ৰোগাত্ৰান্তৰ স’তে সংস্পর্শলৈ আহিব নালাগে। সঘনাই চকু, নাক আৰু মুখত হাত দিব নালাগে। ৰাজহুৱা স্থানত থু, খেকাৰ পেলাব নালাগে আৰু চিকিৎসকৰ পৰামৰ্শ নোলোৱাকৈ দৰব গ্রহণ কৰিব নালাগে। এই মুহূর্তলৈ এইছএমপিভিৰ বাবে কোনো নির্দিষ্ট ‘এন্টিভাইৰেল’ দৰব অথবা ভেকচিন নাই।
