Pay Commission:
কেন্দ্রীয় চৰকাৰৰ চাকৰিয়াল তথা পেন্সনাৰ সকলৰ দৰমহা বা পেন্সনৰ সংশোধন (বৃদ্ধি) ৰ উদ্দেশ্যে বৃহস্পতিবাৰে অষ্টম কেন্দ্রীয় দৰমহা আযোগ গঠনত অনুমোদন জনায় নৰেন্দ্র মোদী চৰকাৰে। প্রধানমন্ত্রী নৰেন্দ্র মোদীৰ অধ্যক্ষতাত অনুষ্ঠিত কেন্দ্রীয় কেবিনেট বৈঠকে এই দৰমহা আয়োগ গঠনত জনায় অনুমোদন |
ইয়াৰ লগে লগে বিভিন্ন ৰাজ্য চৰকাৰেও নিজৰ চাকৰিয়াল আৰু পেন্সনাৰসকলৰ দৰমহা বা পেন্সনৰ সংশোধন অথবা বৃদ্ধিৰ উদ্দেশ্যে শীঘ্ৰে দৰমহা আয়োগ গঠনৰ সম্ভাৱনা বৃদ্ধি পাইছে। উল্লেখ্য যে ২০১৬ত গঠিত সপ্তম দৰমহা আয়োগৰ কার্যকাল অন্ত পৰিব অহা বছৰত ।
এনে প্ৰেক্ষাপটত কেন্দ্ৰীয় চৰকাৰৰ অষ্টম দৰমহা আয়োগৰ অনুৰূপ ধৰণে অসমতো দৰমহা আয়োগ গঠন হ’ব নেকি এই বিষয়ক লৈ ব্যাপক চৰ্চা লাভ কৰিছে দিছপুৰত ৷ অৱশ্যে মুখ্যমন্ত্ৰী ড: হিমন্ত বিশ্ব শৰ্মাৰ চৰকাৰে এইক্ষেত্ৰত কি সিদ্ধান্ত লয় সেয়া এতিয়াও স্পষ্ট হোৱা নাই ৷ ৰাজ্য চৰকাৰ বিষয়া-কৰ্মচাৰীৰ আশা কৰে যে অচিৰেই কেন্দ্ৰীয় চৰকাৰৰ অষ্টম দৰমহা আয়োগ গঠনৰ লেখিয়াকৈ অসম চৰকাৰেও অষ্টম দৰমহা আয়োগ গঠন কৰক । কাৰ্যত অসমত অষ্টম দৰমহা আয়োগ গঠন হ’লে বিষয়া-কৰ্মচাৰী সকলৰ দৰমহা বৃদ্ধি পাব বহু পৰিমাণে ৷
মনকৰিবলগীয়া যে, বৰ্তমান ৰাজ্য চৰকাৰে ভাস্কৰ বৰুৱা ৰাজ্যিক দৰমহা আয়োগৰ পৰামৰ্শমতে দা- দৰমহা দি আহিছে বিষয়া- কৰ্মচাৰীক ৷ এই দৰমহা কেন্দ্ৰীয় চৰকাৰৰ সমাহাৰত দি আছে ৰাজ্য চৰকাৰে ৷ স্মতৰ্ৱ্য যে ভাস্কৰ বৰুৱা ৰাজ্যিক দৰমহা আয়োগৰ ৰাজ্য চৰকাৰলৈ পৰামৰ্শ আছিল যে ৰাজ্য চৰকাৰে ভৱিষ্যতে গঠন নকৰক দৰমহা আয়োগ ৷
আনহাতে,কেন্দ্ৰৰ অষ্টম দৰমহা আয়োগৰ পৰা লাভাম্বিত হ’ব কেন্দ্ৰীয় চৰকাৰৰ পিয়নৰ পৰা কেবিনেট সচিব পৰ্যায়ৰ বিষয়ালৈ প্ৰায় ৪৯ লাখ বিষয়া-কৰ্মচাৰী ৷ একেদৰে লাভান্বিত হ’ব প্ৰায় ৬৫ লাখ পেঞ্চন লাভ কৰা বিষয়া-কৰ্মচাৰী।বৃহস্পতিবাৰে কেন্দ্ৰই অনুমোদন জনোৱা অষ্টম দৰমহা আয়োগ বলবৎ হ’ব ২০২৬ৰ পহিলা জানুৱাৰীৰ পৰা ৷
