Broiler Fram:
ব্ৰইলাৰ ফাৰ্ম খুলি আৰ্থিক ভাৱে স্বাৱলম্বী তামুলপুৰৰ এগৰাকী উদ্যমী যুৱক পুষ্পক মহন্ত ৷ বিজ্ঞান সন্মত ভাৱে ব্ৰইলাৰ পালন কৰি মাহেকত ৭০ হেজাৰতকৈ অধিক টকা উপাৰ্জন কৰি আন দহ জন যুৱকৰ বাবে আদৰ্শ স্বৰূপ হৈ পৰিছে তামুলপুৰৰ বৰবালিশীহা গাঁওৰ এই গৰাকী উদ্যমী যুৱক পুষ্পক মহন্ত ৷ চৰকাৰী চাকৰি আশা নকৰি বিগত ২৪ বছৰ ধৰি নিজৰ ঘৰতে ব্ৰইলাৰ ফাৰ্ম স্থাপন কৰি নিজকে আৰ্থিক ভাৱে স্বাৱলম্বী কৰি তুলিছে ৷
ব্ৰইলাৰ পালনত বিশেষ অভিজ্ঞতা পুষ্ট পুষ্পক মহন্তৰ ওচৰত প্ৰশিক্ষন লৈ তামুলপুৰ বিভিন্ন প্ৰান্তৰ কেইবাগৰাকী শিক্ষিত নিৱনুৱাই ব্ৰইলাৰ ফাৰ্ম খুলি আৰ্থিক ভাৱে স্বাৱলম্বন হৈ পৰিয়াল পোহপাল দি আছে ৷ উল্লেখ্য যে ২০০০ চনত নিজৰ ধন খৰচ কৰি ব্ৰইলাৰ পালনৰ বাবে ফাৰ্ম স্থাপন কৰি পোৱালী কিনি উৎপাদন আৰম্ভ কৰিছিল পুষ্পক মহন্তই ৷ প্ৰথম অৱস্থাত দুই হেজাৰ পোৱালীৰে ফাৰ্ম আৰম্ভ কৰা মহন্তই আশা কপা ধৰণে লাভান্বিত হোৱা নাছিল যদিও ধৈৰ্য্য নেহেৰুৱাই ব্ৰইলাৰ পালন কৰি যায় ৷
শেহতীয়াকৈ উন্নত জাতৰ ব্ৰইলাৰ পোৱালী উৎপাদন কৰা কোম্পানীৰ লগত চুক্তি কৰি এবাৰত ৫ ৰ পৰা ৬ হেজাৰ ব্ৰইলাৰৰ পোৱালী আনি তাক সঠিক ভাৱে প্ৰতি পালন কৰি মাহেকত ৭০ হেজাৰতকৈ অধিক টকা উপাৰ্জন কৰিবলৈ সক্ষম হৈছে পুষ্পক মহন্ত ৷ পুষ্পক মহন্তই সদৰি কৰা মতে তেওৰ ওচৰত তামুলপুৰৰ বিভিন্ন প্ৰান্তৰ নিৱনুৱা যুৱকৰ লগতে নগাঁও,কাৰ্বি আংলং,ধুবুৰী,বাগসা,ওদালগুৰী জিলা আদিৰ নিৱনুৱা যুৱকেও তেওঁৰ ওচৰত ব্ৰইলাৰ পালনৰ প্ৰশিক্ষন লবলৈ আহে ৷
২০০০ চনত তামুলপুৰত পোন প্ৰথম বাৰৰ বাবে ব্ৰইলাৰ ফাৰ্ম স্থাপন কৰা পুষ্পক মহন্তৰ দিহা পৰামৰ্শ আৰু সহযোগীতাত সম্প্ৰতি তামুলপুৰৰ বিভিন্ন প্ৰান্তত ২০০ খনতকৈ অধিক ফাৰ্ম স্থাপন কৰি আৰ্থিকভাৱে স্বাৱলম্বী হৈছে বহু যুৱক ৷ নিজৰ লগতে আন দহজনক কৰ্মসংস্থাপনৰ বাট মোকলাই দিবলৈ পায় অত্যন্ত সুখী পুষ্পক মহন্ত তামুলপুৰত এজন আদৰ্শ ব্ৰইলাৰ পালক হিচাপে পৰিগণিত হৈছে ৷