Saif Ali Khan:
বলিউড অভিনেতা ছইফ আলী খানক চুৰিকাঘাত কৰা আক্ৰমণকাৰীক গ্ৰেপ্তাৰ
মুম্বাইৰ বান্দ্ৰা আৰক্ষীয়ে গ্ৰেপ্তাৰ কৰে আক্ৰমণকাৰীজনক
বান্দ্ৰা আৰক্ষী থানাত মাৰাথন জেৰা আক্ৰমণকাৰীজনক
:বলিউডৰ অভিনেতা ছইফ আলী খানৰ মুম্বাইৰ বান্দ্ৰাস্থিত বাসগৃহত ছুৰীৰে আঘাত কৰা মুল আক্ৰমণকাৰীক গ্ৰেপ্তাৰ মুম্বাই আৰক্ষীৰ। ধৃত আক্ৰমণকাৰীজনক ইতিমধ্যে বান্দ্ৰা আৰক্ষীয়ে বান্দ্ৰা আৰক্ষী থানাত মাৰাথন জেৰা অব্যাহত ৰাখিছে ৷
উল্লেখ্য যে,গ্ৰেপ্তাৰ কৰাৰ সন্দৰ্ভত এই পৰ্যন্ত মুম্বাই আৰক্ষীয়ে মুখ খোলা নাই যদিও ইতিমধ্যে ভাইৰেল হোৱা এক ভিডিঅ’ক দেখা গৈছে যে এজন যুৱকক আটক কৰি বান্দ্ৰা থানালৈ লৈ যোৱা হৈছে ৷
আনহাতে,অভিনেতা ছইফ আলী খানৰ ঘৰত প্ৰৱেশ কৰি অভিনেতাজনক আক্ৰমণ কৰাৰ পিছৰে পৰা আক্ৰমণকাৰীজনক আটক কৰিবলৈ মুম্বাই আৰক্ষীয়ে ২০ জনীয়া দল গঠন কৰি ক্ষীপ্ৰতাৰে অভিযান আৰম্ভ কৰে বেন্দ্ৰা আৰু নালা ছুপাৰাৰ বিভিন্ন অঞ্চলত ৷ আৰক্ষীয়ে ইয়াৰ পূৰ্বে ছইফ আলী খানৰ ঘৰত কাম কৰা মহিলা গৰাকীক আৰক্ষীয়ে জিন্মাত লৈছিল ৷ মহিলা গৰাকীৰ জৰিয়তে চিনাক্ত কৰিব আটকাধীন আক্ৰমণকাৰীজনক ৷
বান্দ্ৰা আৰক্ষীৰ এক সূত্ৰৰ পৰা প্ৰাপ্ত খবৰ অনুসৰি অভিনেতা ছইফ আলী খানক আক্ৰমণ কৰি আটকাধীন যুৱকজনে লগে লগে পলায়ন কৰিছিল বান্দ্ৰা ৰে’ল ষ্টেচন অভিমুখে ৷
আনহাতে মুম্বাই আৰক্ষীয়ে ধৃত যুৱকজনেই মুল আক্ৰমণকাৰী বুলি এই পৰ্যন্ত সদৰি কৰা নাই বা তেওঁ ঘটনাৰ স’তে জড়িত আছিল নে অথবা কি উদ্দেশ্য এই ঘটনা সংঘটিত কৰা হৈছিল ৷সমস্ত ঘটনাৱলীৰ সম্পৰ্কত আনুষ্ঠানিকভাৱে সদৰি কৰাৰ পৰা বিৰত আছে ৷
মনকৰিবলগীয়া যে বুধবাৰে পুৱতি নিশা অভিনেতা ছইফ আলী খানক এজন যুৱকে তেওঁৰ ঘৰত প্ৰৱেশ কৰি আক্ৰমণ কৰে ৷ ফলত মেৰুদণ্ড আৰু ডিঙিত গুৰুতৰভাৱে আঘাতপ্ৰাপ্ত ছইফক ততাতৈয়াকৈ ভৰ্তি কৰা হয় চিকিৎসালয়ত ৷ আঘাত গুৰুতৰ হোৱা বাবে ইতিমধ্যে তাৎক্ষণিকভাবে সম্পন্ন হয় অস্ত্ৰোপচাৰ ৷ বৰ্তমান তেওঁ শাৰীৰিক অৱস্থা সুস্থিৰ বুলি চিকিৎসালয় সূত্ৰই সদৰি কৰিছে ৷