Football: ১০ জন খেলুৱৈয়ে মেচৰ ৬০ মিনিট সময় খেলাৰ পাছতো কেৰালা ব্লাষ্টাৰ্ছ এফ চিৰ বিৰুদ্ধে গ’ল কৰাত বিফল হ’ল নৰ্থ ইষ্ট ইউনাইটেড এফ চি ৷ চলিত একাদশ ইণ্ডিয়ান ছুপাৰ লীগ চমুকৈ আই এছ এলত শনিবাৰে কোচিৰ জৱাহৰলাল নেহৰু ষ্টেডিয়ামত অনুষ্ঠিত খেলখনত ঘৰুৱা দল কেৰালা ব্লাষ্টাৰ্ছ আৰু নৰ্থ ইষ্ট ইউনাইটেডে গ’ল শূন্য ড্ৰ খেলি পইণ্ট ভগাই লয় ।
উল্লেখ্য যে এয়া নৰ্থ ইষ্ট ইউনাইটেডৰ ক্ৰমাগত চতুৰ্থ ড্ৰ মেচ ৷ ইয়াৰ পূৰ্বে গুৱাহাটীত তিনিখন মেচ ড্ৰ খেলি কোচিলৈ যোৱা নৰ্থ ইষ্ট ইউনাইটেডে ক্ৰমাগত ষষ্ঠ মেচত নিজৰ অপৰাজেয় ধাৰা অব্যাহত ৰাখিলেও যোৱা চাৰিখন মেচত দলে আঠ পইণ্ট হেৰুৱাটো স্বাভাৱিকতে নকআউটৰ সমীকৰণত আউল লগাব ৷
খেলৰ আৰম্ভনিৰ পৰাই আক্ৰমণৰ ৰণনীতি লোৱা উভয় দলে খেলপথাৰত উত্তেজনাৰ বশবৰ্তী হৈ বিধি নিষিদ্ধ আচৰণ কৰে ৷ যাৰবাবে ৰেফাৰীয়ে প্ৰথমাৰ্ধতে চাৰিখন কাৰ্ড দেখুৱাব লগা হয় ৷ ইয়াৰে তিনিখন হালধীয়া কাৰ্ড নৰ্থ ইষ্ট ইউনাইটেডৰ আজাৰাই, নিকছন আৰু মহম্মদ বেমামিৰক দিয়া হয় ৷ আনহাতে, মেচৰ ৩০ মিনিটত কেৰালাৰ আইবানভা ডহলিঙক ৰঙা কাৰ্ড দিয়ে ৰেফাৰীয়ে ৷
এই ঘটনাৰ পাছতে কেৰালাই ৰণনীতি সলনি কৰি নৰ্থ ইষ্টৰ আক্ৰমণ ৰক্ষা কৰাৰ কঠিন প্ৰত্যাহ্বানত নিজকে সমৰ্পন কৰে ৷ দলে এই ৰণনীতিত সফলো হয় ৷ ১০ জনৰে খেলা বিপক্ষক চাপত পেলাই গল দিবলৈ সক্ষম নহ’ল লীগত সৰ্বাধিক গ’ল কৰা নৰ্থ ইষ্ট ইউনাইটেডে ৷
উল্লেখ্য যে উভয় দলৰ এয়া লীগৰ ১৭ সংখ্যক মেচ আছিল ৷ ২৫ পইণ্টৰে তালিকাৰ পঞ্চম স্থানত থকিল নৰ্থ ইষ্ট ইউনাইটেড ৷ ইফালে, ২১ পইণ্টৰে তালিকাৰ নৱম স্থানত থাকিল কেৰালা ব্লাষ্টাৰ্ছ ৷
নৰ্থ ইষ্ট ইউনাইটেডে লীগৰ পৰবৰ্তী মেচখন পুনৰ ঘৰত খেলিব ৷ অহা ২৯ জানুৱাৰীত সৰুসজাই ক্ৰীড়া প্ৰকল্পৰ ইন্দিৰা গান্ধী এথলেটিক ষ্টেডিয়ামত হ’ব লগা মেচত দলে হায়দৰাবাদ এফ চিৰ মুখামুখি হ’ব ৷ উল্লেখ্য যে ইয়াৰপূৰ্বে নৰ্থ ইষ্ট ইউনাইটেডে হায়দৰাবাদক ঘৰতে ৫-২ গলত পৰাস্ত কৰিছিল ৷ ইফালে, কেৰালা ব্লাষ্টাৰ্ছে পৰবৰ্তী মেচ খেলিবলৈ কলকাতালৈ যাব ৷ অহা ২৪ জানুৱাৰীত যুৱ ভাৰতী ক্ৰীড়াংগনত কেৰালাই ঘৰুৱা দল ইষ্ট বেংগল এফ চিৰ মুখামুখি হ’ব ৷
