সম্পত্তিৰ বিবাদক লৈ পত্নীয়ে হত্যা কৰিলে কৰ্ণাটকৰ প্ৰাক্তন আৰক্ষী অধীক্ষক!

Murder : সম্পত্তি বিবাদৰ বাবে পত্নীয়ে হত্যা কৰিলে কৰ্ণাটকৰ প্ৰাক্তন আৰক্ষী প্ৰধান ! প্ৰাথমিকভাৱে এইটোৱেই অনুমান কৰিছে আৰক্ষীয়ে। মৃতদেহটো উদ্ধাৰ হোৱাৰ পাছত, প্ৰাক্তন আৰক্ষীৰ ঘৰৰ আন সকলক সোধা-পোছা কৰা হৈছে।

তাৰ ওপৰত ভিত্তি কৰি আৰক্ষীয়ে সন্দেহ কৰিছে যে প্ৰাক্তন আৰক্ষী বিষয়া ওম প্ৰকাশক সম্ভৱতঃ তেওঁৰ পত্নীয়ে হত্যা কৰিছিল। অৱশ্যে এই সন্দৰ্ভত আনুষ্ঠানিকভাৱে কোনো মন্তব্য কৰা নাই আৰক্ষীয়ে। অৱশ্যে সূত্ৰ অনুসৰি ওম প্ৰকাশৰ পত্নীক মূল সন্দেহজনক বুলি গণ্য কৰা হৈছে।

কৰ্ণাটকৰ প্ৰাক্তন আৰক্ষী অধীক্ষক ওম প্ৰকাশৰ ৰক্তাক্ত মৃতদেহ দেওবাৰে বেংগালুৰুৰ ঘৰৰ পৰা উদ্ধাৰ কৰে। উদ্ধাৰকাৰী আৰক্ষী বিষয়াই জনোৱা মতে, ঘৰৰ মজিয়াত তেজেৰে লুতুৰি-পুতুৰি হৈ পৰিছিল ওম প্ৰকাশৰ ৰক্তাক্ত মৃতদেহ ।

সেই সময়ত আৰক্ষীয়ে এই ঘটনাত পৰিয়ালৰ লোক জড়িত থকাৰ সন্দেহ কৰে।

পল্লৱী আৰু ওম প্ৰকাশৰ কন্যাক সোধা-পোছা কৰে আৰক্ষীয়ে। ৰহস্য সমাধানৰ বাবে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে।

ওম প্ৰকাশৰ বুকু আৰু পেটত একাধিক ছুৰীৰ আঘাত দেখিবলৈ পুৱা গৈছে বুলি আৰক্ষীয়ে জানিবলৈ দিয়ে । ইয়াৰ পাছতে প্ৰশ্ন উত্থাপন হয়, ওম প্ৰকাশক পত্নীয়ে হত্যা কৰিছিল নেকি?

সূত্ৰ অনুসৰি, ওম প্ৰকাশে তেওঁৰ সকলো সম্পত্তি এজন আত্মীয়ৰ নামত লিখিছিল। দেওবাৰে আবেলি, ওম প্ৰকাশ আৰু তেওঁৰ পত্নীৰ মাজত এই বিষয়ক লৈ তীব্ৰ তৰ্ক হয়।

তৰ্কাতৰ্কীৰ মাজতে ওম প্ৰকাশৰ পত্নীয়ে তেওঁৰ চকুত জলকীয়া গুৰি দলিয়াইছিল। ইয়াৰ পাছতে তেওঁক বান্ধি লৈ একাধিকবাৰ ছুৰীৰে আঘাত কৰে । তাৰ পাছত তেওঁ বন্ধু এজনক ফোন কৰিলে। সেই বন্ধুজনে আৰক্ষীক খবৰ দিলে।

অনুমান কৰা হৈছে যে সমগ্ৰ ঘটনাটো ঘৰৰ প্ৰথম মহলাত সংঘটিত হৈছে। তথ্য অনুসৰি, সেই সময়ত ওম প্ৰকাশৰ কন্যা ঘৰৰ আন এটা মহলাত আছিল।

অৱশ্যে, আৰক্ষীয়ে এতিয়াও ওম প্ৰকাশৰ পত্নীক গ্ৰেপ্তাৰ কৰা নাই। বেংগালুৰুৰ এচিপি বিকাশ কুমাৰে জনাই যে প্ৰাক্তন আৰক্ষীৰ পুত্ৰৰ অভিযোগৰ ওপৰত এখন এজাহাৰ পঞ্জীয়ন কৰা হ’ব। তেওঁ জনাইছে যে অনাগত দিনত সম্পূৰ্ণ তদন্ত কৰা হ’ব।

এতিয়ালৈকে কোনো গ্ৰেপ্তাৰ কৰা হোৱা নাই, কিন্তু আৰক্ষীয়ে সন্দেহ কৰিছে যে ঘৰুৱা বিবাদৰ বাবে ওম প্ৰকাশৰ শৰীৰত চুৰিটো ছুৰিকাঘাত কৰা হৈছিল।

প্ৰচুৰ ৰক্তক্ষৰণৰ ফলত তেওঁৰ মৃত্যু হয়। ওম প্ৰকাশ এজন ১৯৮১ বেচৰ আইপিএছ বিষয়া। ২০১৫ চনত, তেওঁ কৰ্ণাটক আৰক্ষীৰ সঞ্চালক প্ৰধান হিচাপে নিযুক্ত হৈছিল।

তাৰ আগতে, তেওঁ অগ্নি নিৰ্বাপক বিভাগ, গৃহৰক্ষী বাহিনী আৰু জৰুৰীকালীন সেৱাৰ দায়িত্বত আছিল।