Liquor shop permits suspended:
ঐতিহ্যমণ্ডিত গুৱাহাটী বিশ্ববিদ্যালয়ৰ সমীপত আবকাৰী বিভাগে সুৰাৰ বিপণী স্থাপনৰ অনুজ্ঞাপত্ৰ প্ৰদান কৰাক লৈ ব্যাপক প্রতিক্রিয়া সৃষ্টি হোৱাৰ পাছত এই সিদ্ধান্ত স্থগিত ৰাখিছে বিভাগে। বিভাগীয় মন্ত্রী অতুল বৰাই এই সন্দৰ্ভত কয় যে আবকাৰী বিভাগে বৰ্তমানৰ ‘অসম আবকাৰী বিধি’ অনুসৰি গুৱাহাটীৰ এখন প্ৰখ্যাত উচ্চ শিক্ষানুষ্ঠানৰ নাতিদূৰত ‘আইএমএফএল অন শ্বপ’ৰ অনুজ্ঞাপত্ৰ প্ৰদান কৰে। বিষয়টোৰ সংবেদনশীলতাৰ প্ৰতি লক্ষ্য ৰাখি আবকাৰী বিভাগৰ আয়ুক্ত সচিব ৰাকেশ কুমাৰ আৰু আয়ুক্ত জিতু দলেক পৰৱৰ্তী নির্দেশ নোহোৱা পর্যন্ত অনুজ্ঞাপত্ৰখন স্থগিত ৰখাৰ নিৰ্দেশ দিয়া হৈছে। উল্লেখ্য যে বিশ্ববিদ্যালয়খনৰ সমীপত পূৰ্বতেও সুৰাৰ বিপণী খোলাৰ অনুমতি প্ৰদানত তীব্ৰ প্ৰতিক্ৰিয়াৰ সৃষ্টি হয়। ইয়াৰ পাছতে আবকাৰী বিভাগে পুনৰ সুৰাৰ বিপণী খোলাৰ অনুমতি প্রদান কৰিছিল।
যোৱা ২০ মে’ত অসম চৰকাৰৰ আবকাৰী বিভাগৰ যুটীয়া সচিব ডব্লিউ এছ দৈমাৰীয়ে এই সন্দৰ্ভত কামৰূপ মহানগৰ জিলা আয়ুক্তলৈ ৬৪৪৫৬৩/২১৮ নম্বৰৰ এখন পত্ৰ প্ৰেৰণ কৰে। এই পত্ৰত স্পষ্টকৈ উল্লেখ কৰা হৈছিল যে জালুকবাৰীৰ পাণ্ডু সদিলাপুৰৰ ৩৭ নম্বৰ ৰাষ্ট্ৰীয় ঘাইপথৰ কাষত কাবেৰী দাসক ভাৰতত প্রস্তুত হোৱা বিদেশী সুৰাৰ বাৰ খুলিবলৈ অনুমতি দিয়া হৈছে। লতাশিলৰ বাসিন্দা দাসৰ ইতিমধ্যে সেই স্থানত এখন ৰেস্তোৰাঁ আছে। ‘মেচাৰ্ছ এঞ্জেল বাৰ এণ্ড ৰেষ্টুৰেণ্ট’ক ‘আইএমএফএল অন শ্বপ’ৰ অনুমতি প্রদান কৰা হৈছে। আবকাৰী বিভাগৰ এই পত্ৰই শিক্ষা নগৰীৰূপে চিহ্নিত জালুকবাৰীত ব্যাপক প্রতিক্ৰিয়াৰ সৃষ্টি হৈছিল আৰু শেষত বিভাগে এই সিদ্ধান্ত স্থগিত ৰাখিছে।
