Ripun Bora’s Comments :
প্ৰদেশ কংগ্ৰেছৰ নৱ নিৰ্বাচিত সভাপতি তথা লোকসভাৰ বিৰোধী দলপতি গৌৰৱ গগৈৰ বিৰুদ্ধে মুখ্যমন্ত্রী ড:হিমন্ত বিশ্ব শর্মাই পাকিস্তানৰে যোগাযোগ থকা বুলি উত্থাপন কৰি অহা অভিযোগসমূহক লৈ পুনৰ মুখ্যমন্ত্ৰীৰ বিৰুদ্ধে সৰৱ হয় প্রদেশ কংগ্ৰেছৰ প্রাক্তন সভাপতি তথা প্রাক্তন সাংসদ ৰিপুন বৰা।
প্রদেশ কংগ্ৰেছৰ উদ্যোগত মঙলবাৰে ৰাজীৱ ভৱনত দেশৰ প্ৰাক্তন প্রধানমন্ত্রী জৱাহৰলাল নেহৰুৰ মৃত্যু বার্ষিকী উপলক্ষে আয়োজন কৰা শ্ৰদ্ধাঞ্জলি অনুষ্ঠানত অংশগ্ৰহণ কৰি দলটোৰ জ্যেষ্ঠ নেতা বৰা মুখ্যমন্ত্রীৰ বিৰুদ্ধে আক্রমণাত্মক হৈ পৰে। উল্লেখ্য যে দুদিন পূর্বে প্রদেশ কংগ্রেছৰ হৈ প্রাক্তন সাংসদ বৰাই এখন সংবাদমেল সম্বোধন কৰি গৌৰৱ গগৈৰ উত্থানত শংকিত হৈ গাদী হেৰুওৱাৰ ভয়তে মুখ্যমন্ত্রীয়ে সাংসদজনক ধ্বংস কৰাৰ ষড়যন্ত্ৰ ৰচনা কৰিছে বুলি অভিযোগ কৰিছিল। লগতে তেওঁ সাংসদ গগৈৰ বিৰুদ্ধে মুখ্যমন্ত্রীয়ে উত্থাপন কৰা পাকিস্তান সম্পর্কিত অভিযোগসমূহ যুক্তিসহকাৰে খণ্ডন কৰিছিল।
প্ৰসংগক্রমে বৰাই উদাহৰণ দি সাংসদ গগৈৰ পত্নীয়ে পাকিস্তানৰ পৰা বৈধভাৱে দৰমহা ল’লে আপত্তি ক’ত বুলি উল্লেখ কৰি কে’বাটাও যুক্তি দর্শাইছিল। ইয়াৰ বিপৰীতে মুখ্যমন্ত্ৰীয়ে তেওঁ উত্থাপন কৰি অহা অভিযোগসমূহৰ সত্যতা প্রাক্তন সাংসদ বৰাই স্বীকাৰ কৰা বুলি দাবী কৰি আন কে’তবোৰ বিস্ফোৰক তথ্য যোগান ধৰিলে বুলি মন্তব্য কৰিছিল। সমান্তৰালভাৱে মুখ্যমন্ত্ৰীৰ বিদেশত থকা ভ্রাতৃয়ে সাংসদ বৰাক জেল ফেৰৎ বুলি কটাক্ষ কৰিছিল। ইয়াৰ প্ৰত্যুত্তৰ দি প্ৰদেশ কংগ্ৰেছৰ জ্যেষ্ঠ নেতাজনে কয়, ‘মই তিহাৰ জেললৈ যোৱা সকলোৱেই জানে আৰু কিয় গৈছিলো, কাৰ ষড়যন্ত্ৰত গৈছিলো, কোনে ষড়যন্ত্ৰ কৰিছিল সকলোৱে জানে। লগতে মহামান্য আদালতে মোক দোষমুক্ত ঘোষণা কৰিছে।
এতিয়া মই প্রশ্ন কৰো যে টাডা আইন, অবৈধ মাৰণাস্ত্র আইনৰ অধীনত এজন প্রাক্তন আলফা, এজন প্রাক্তন ছাত্র নেতা গ্ৰেপ্তাৰ হৈ জেলত থকাৰ পাছত তেওঁ যে অসমৰ মুখ্যমন্ত্ৰী হ’ল এইটো কি হ’ব? ইয়াৰো উত্তৰ মুখ্যমন্ত্ৰী আৰু বিজেপিৰ ট্ৰ’ল বাহিনীয়ে দিয়ক।’ লগতে প্রাক্তন সাংসদজনে মুখ্যমন্ত্ৰীৰ ভ্রাতৃক উদ্দেশি কয়, ‘মুখ্যমন্ত্ৰীৰ ভ্রাতৃক সম্মান কৰো আৰু অনুৰোধ কৰিছো যে আমি ৰাজনীতিহে কৰিছো। তেৱেই দেখোন সিদিনা ফেচবুকত লিখিছিল, পৰিয়ালক টানিব নালাগে। হিমন্ত বিশ্বৰ লগত আমাৰ ৰাজনৈতিক আদর্শগত যুদ্ধ। তেওঁতো ৰাজনীতি নকৰে, কিয় সোমাইছে?’
#কিহৰ কাৰণে এজন মুখ্যমন্ত্ৰী হৈ ছবি চুৰি কৰিছিল উত্তৰ দিয়ক
ইফালে, মুখ্যমন্ত্ৰীলৈ পুনৰ প্ৰশ্নবাণ এৰি প্ৰদেশ কংগ্ৰেছৰ প্ৰাক্তন সভাপতিজনে কয়, ‘মুখ্যমন্ত্রীৰ আগৰে পৰা এটা নিয়ম আছে যে বিষয়বস্তুক অন্য দিশলৈ লৈ যোৱা। তেওঁৰ ওচৰত ক’বলৈ মাল-মছলা একো নাই, সেই কাৰণে তেওঁ বিষয়বস্তু এতিয়া অন্য দিশত নিবলৈ বিচাৰিছে। দুদিন পূর্বে মই সংবাদমেল পাতি মুখ্যমন্ত্রীক ১০-১২টা প্রশ্ন কৰিছিলো; কিন্তু ইয়াৰ বিপৰীতে তেওঁ বিষয়বস্তু অন্য দিশলৈ নিবলৈ চেষ্ট কৰিছে।’ মুখ্যমন্ত্রীক প্রত্যাহান জনাই তেওঁ কয়, ‘মুখ্যমন্ত্ৰীয়ে দুটা প্ৰশ্নৰ উত্তৰ দিয়ক, মই তেওঁৰ ওচৰত আত্মসমর্পণ কৰিম।
মুখ্যমন্ত্রীয়ে কৈছে তেওঁৰ হাতত স্পষ্ট প্রমাণ আছে যে গৌৰৰ গগৈ চোৰাংকৈ পাকিস্তানলৈ গৈছিল আৰু আইএছআইৰ নিমন্ত্ৰণত গৈছিল। ১০ ছেপ্টেম্বৰত তেওঁ সকলো উলিয়াই দিব। এতিয়া মই প্রশ্ন কৰিছো যে ইমান যদি শক্তিশালী প্রমাণ আছেই, আপুনি কিহৰ কাৰণে এজন মুখ্যমন্ত্রী হৈ ছবি চুৰি কৰিছিল? আপুনি কিহৰ কাৰণে দুখন ছবি হেৰফেৰৰ কাম কৰিছিল?’ উল্লেখ্য যে সাংসদ গগৈৰ ফটো সম্বলিত পাকিস্তান দূতাবাস আৰু আট্টাৰী সীমান্তৰ দুখন ফটো মুখ্যমন্ত্ৰীয়ে ৰাজহুৱা কৰি সাংসদ গগৈৰ পাকিস্তান সম্পৰ্কৰ অভিযোগ তুলিছিল।
এই দুয়োখন ফটো বিকৃত কৰা হৈছিল বুলি কংগ্ৰেছে দাবী কৰি আহিছে। এই সন্দর্ভত প্রাক্তন সাংসদজনে কয়, ‘২০১৫ৰ ন ছেপ্টেম্বৰত দিল্লীস্থিত পাকিস্তান দূতাবাসত তেওঁলোকৰ নিয়মীয়া বক্তৃতানুষ্ঠান আছিল। মহাবিদ্যালয়-বিশ্ববিদ্যালয়ৰ শিক্ষার্থীক আমন্ত্ৰণ কৰি অনুষ্ঠিত এই বক্তৃতানুষ্ঠানৰ কথা পাছফালৰ বেনাৰত স্পষ্টকে লিখা আছিল। এই বক্তৃতানুষ্ঠান ৰাষ্ট্ৰীয় সাংবাদ মাধ্যমত বাতৰি হৈছে।
মুখ্যমন্ত্রীজন ইমান তললৈ গৈছে যে এই অনুষ্ঠানৰ পাছফালৰ বেনাৰখনৰ কিছু আখৰ মচি তেওঁ ক’লে যে গৌৰৱ গগৈয়ে মহাবিদ্যালয়-বিশ্ববিদ্যালয়ৰ শিক্ষাৰ্থীক প্রশিক্ষণ দিবলৈ পাকিস্তান দূতাবাসলৈ লৈ গৈছিল। মুখ্যমন্ত্রীয়ে প্ৰশ্নৰ উত্তৰ দিয়ক কি কাৰণত ফটোখন বিকৃত কৰিছিল।’ দ্বিতীয়তে ২০১৯ ত সংসদৰ সন্মুখত পত্নীৰ স’তে সাংসদ গগৈয়ে উঠা ফটোখন কাটি নি কি কাৰণে আট্টাৰী সীমান্তৰ গেটৰ তলত লগাই এইদৰে পলাই গৈছিল বুলি কাৰচাজি কৰিছিল বুলিও তেওঁ মুখ্যমন্ত্রীক প্রশ্ন কৰে।
#যদি বিধিসম্মতভাবে পাকিস্তান চৰকাৰৰ পৰা দৰমহা পায় ক’বলগীয়া কি আছে
আনহাতে, সাংসদ পত্নীয়ে পাকিস্তান চৰকাৰৰ পৰা দৰমহা পায় বুলি উত্থাপিত অভিযোগৰ সন্দৰ্ভত তেওঁ কয়, ‘অজিত ডোভালৰ ল’ৰাই যদি পাকিস্তানত ব্যৱসায় কৰি থাকিব পাৰে, আদানী-আম্বানীয়ে যদি ব্যবসায় কৰি থাকিব পাৰে; আমি তেওঁলোকৰ দেশপ্রেমক কোনো দিনে সন্দেহ কৰা নাই, কাৰণ তেওঁলোকে বিধি সন্মতভাবে কৰিছে। সেই একেদৰেই সাংসদ গগৈৰ পত্নীয়ে এনজিঅ’ত কাম কৰিছে। যদি বিধি সম্মতভাৱে পকিস্তান চৰকাৰৰ পৰা তেওঁ দৰমহা পাইছে, তাত আমাৰ ক’বলগীয়া কি আছে? মই এই কথাটোহে সেইদিনা কৈছিলো। কেৱল গৌৰৱ গগৈৰ পত্নীয়েই নহয়, পাকিস্তান চৰকাৰৰ পৰা দৰমহা লৈ থকা বহু ভাৰতীয় তাত আছে আৰু বহু পাকিস্তানী ভাৰতত আছে। গতিকে এইসকলক লৈ মুখ্যমন্ত্ৰীৰ স্থিতি কি?’
# তথ্য বিচাৰি পাকিস্তানৰ কোন এজেন্সীৰ লগত যোগাযোগ কৰিছে
ইফালে, ১০ ছেপ্টেম্বৰত সাংসদ গগৈৰ বিৰুদ্ধে উত্থাপিত অভিযোগসমূহৰ সত্যতাৰ প্ৰমাণ দিব বুলি মুখ্যমন্ত্রীয়ে কৈ অহা মন্তব্য সন্দৰ্ভত কংগ্রেছৰ জ্যেষ্ঠ নেতাজনে কয়, ‘মুখ্যমন্ত্রীয়ে কৈ আহিছে যে তেওঁলোকে পাকিস্তানৰ লগত যোগাযোগ কৰি আছে। বহু তথ্য আহিছে আৰু বহু তথ্য আহিবলৈ বাকী আছে, সময়ৰ প্রয়োজন হ’ব, সেয়ে ১০ ছেপ্টেম্বৰ লৈছো। এক সুন্দৰ উত্তৰ দিছে মুখ্যমন্ত্রীয়ে; কিন্তু মই মুখ্যমন্ত্রীক সুধিব খুজিছো যে আজি পাকিস্তানৰ লগত আমাৰ যুদ্ধ চলি আছে।
সিন্দুৰ অভিযান শেষ হোৱাই নাই। যুদ্ধ চলি থকা অৱস্থাত মুখ্যমন্ত্ৰীয়ে কাৰ লগত , কোন এজেন্সীৰ লগত যোগাযোগ কৰিছে? কাৰণ মুখ্যমন্ত্ৰীয়েতো পাকিস্তানৰ লগত পোনপটীয়াকৈ যোগাযোগ কৰিব নোৱাৰে? পাকিস্তানৰ লগত যোগাযোগ কৰিলে ভাৰত চৰকাৰে কৰিব, তেওঁ এখন ৰাজ্যৰ মুখ্যমন্ত্ৰীহে। মুখ্যমন্ত্ৰীয়ে যে কৈ আছে যোগাযোগ কৰি আছে বুলি সেয়াও তেওঁ দেশবাসীৰ আগত কওক। যুদ্ধৰ সময়ত পাকিস্তানত মুখ্যমন্ত্ৰীৰ লগত কোন এনে শক্তিশালী এজেন্সী আছে, যাৰ লগত তেওঁ যোগাযোগ কৰি আছে। এই সন্দর্ভতো এছআইটি হ’ব লাগে।’