2nd North East Mining Ministers’ Conclave in Guwahati:
মহানগৰীৰ পাশ্বৱৰ্তী সোণাপুৰস্থিত মেফেয়াৰ স্প্ৰিং ভেলী ৰিজ’ৰ্টত শুকুৰবাৰে অনুষ্ঠিত হয় দ্বিতীয় উত্তৰ-পূব খনি মন্ত্ৰণালয় সন্মিলন ৷ এই উপলক্ষে আয়োজিত এক প্ৰদৰ্শনী উদ্বোধন কৰে মুখ্যমন্ত্ৰী ড: হিমন্ত বিশ্ব শৰ্মাই ৷ সন্মিলনৰ পূৰ্বে মুখ্যমন্ত্ৰী গৰাকীয়ে এক বৈঠকত মিলিত হয় কেন্দ্ৰীয় কয়লা- আৰু খনিজ মন্ত্ৰী জি কিষাণ ৰেড্ডী আৰু কয়লা আৰু খনিজ দপ্তৰৰ ৰাজ্যিক মন্ত্ৰী সতীশ চন্দ্ৰ ডুবেৰে ৷
ইয়াৰ পিছতে উত্তৰ পূৰ্বাঞ্চল খনি মন্ত্ৰী সকলৰ অংশগ্ৰহণৰে আয়োজিত সন্মিলনত মুখ্য অতিথি ৰূপে উপস্থিত থাকি মুখ্যমন্ত্ৰী ড:শৰ্মাই ভাষণ প্ৰসংগত কয় ,প্রচুৰ প্রাকৃতিক সমলেৰে সমৃদ্ধ উত্তৰ-পূর্বাঞ্চলৰ খনিজাত খণ্ডতো অপৰিসীম সম্ভাৱনা বিদ্যমান। দ্বিতীয় উত্তৰ-পূব খনিজ মন্ত্ৰীসকলৰ সন্মিলন অঞ্চলটোৰ খনিজাত ভৱিষ্যতৰ পৰিকল্পনাৰ এটি উৎকৃষ্ট প্লেটফৰ্ম। এই সন্মিলনত পৰিৱেশৰ আৱশ্যকতাসমূহৰ সৈতে সামঞ্জস্য ৰাখি সকলো উত্তৰ-পূবৰ ৰাজ্য আৰু ঔদ্যোগিক অংশীদাৰে এটি নতুন ৰূপৰেখা প্রস্তুতিৰ লক্ষ্যৰে একত্ৰিত হৈছে।
পৰিৱেশৰ সৈতে সমতা স্থাপনেৰে উন্নয়নত প্রাধান্য দিয়া প্ৰধান মন্ত্ৰী নৰেন্দ্র মোদীৰ দৃষ্টিভংগীৰ সৈতে মিল খোৱা এই সন্মিলন স্থায়িত্ব আৰু শূন্য অপচয় খনিজ বিষয়ত কেন্দ্ৰীভূত হৈছে। অসমে শেহতীয়াকৈ এই খণ্ডত ৪৬,০০০ কোটি টকাৰো অধিক প্ৰতিশ্ৰুতি লভিবলৈ সক্ষম হৈছে আৰু আমি ক্ষুদ্ৰ খনিজ অনুসন্ধান কার্য বৃদ্ধিৰ বাবে ‘ৰাজ্যিক খনিজ অনুসন্ধান ট্রাষ্ট’ৰ অনুমোদন ইতিমধ্যে প্রদান কৰা হৈছে ৷
আমিও খণ্ডটোক অধিক মুকলি কৰি আৰু অঞ্চলটোত সমৃদ্ধ সুযোগ সমূহৰ যথোচিত ব্যৱহাৰ সুনিশ্চিত কৰিবলৈ প্ৰয়োজনীয় সংস্কাৰ কৰিবলৈও আগবাঢ়িছোঁ।
সন্মিলনত কয়লা আৰু খনিজ মন্ত্ৰণালয়ৰ উচ্চপদস্থ বিষয়াৰ লগতে উপস্থিত থাকে অসমৰ খনিজ মন্ত্ৰী কৌশিক ৰায় ৷