Babies are noticed to born with a low birth weight than usual:
প্রদূষণ, জলবায়ু পৰিৱৰ্তন আদিৰ ভয়াৱহতাক বহু শিক্ষিত লোকেও আওকাণ কৰি থকাৰ সময়তে পোহৰলৈ আহিছে বর্ধিত বায়ু প্রদূষণে দেশত কেনে ভয়ংকৰ প্ৰভাৱ পেলাইছে।
২০১৯-২১ৰ দেশৰ জনগাঁথনিগত স্বাস্থ্য সমীক্ষাত পোহৰলৈ আহিছে যে বায়ু প্রদূষণে শিশুৰ জন্মৰ ক্ষেত্ৰত ভয়ংকৰ অশুভ প্ৰভাৱ পেলাইছে। বায়ু প্ৰদূষণৰ বাবেই ২০১৯ৰ পৰা ২০২১ৰ সময়ছোৱাত দেশত জন্ম হোৱা মুঠ শিশুৰ ১৩ শতাংশই অপৈণত অৱস্থাতে জন্ম লাভ কৰে। তদুপৰি ১৭ শতাংশ শিশুৰ জন্মৰ সময়ত ওজন স্বাভাৱিকতকৈ কম আছিল।
এই সমীক্ষাৰ বিশ্লেষণ কৰি আইআইটি দিল্লী, জনসংখ্যা বিজ্ঞানৰ আন্তর্জাতিক প্রতিষ্ঠান, মুম্বাই আৰু ব্রিটেইন তথা আয়াৰলেণ্ডৰ একাংশ প্ৰতিষ্ঠানৰ গৱেষকে আঙুলিয়াই দিছে যে বায়ু প্ৰদূষণে কেনেদৰে গৰ্ভজাত শিশুৰ ওপৰত বিৰূপ প্ৰভাৱ পেলায়। এই গৱেষকসকলে লগতে প্ৰকাশ কৰিছে যে পিএম২.৫ মাত্ৰাৰ প্ৰদূষক মিহলি বায়ু গ্ৰহণ কৰা গৰ্ভৱতীসকলে স্বাভাৱিকতকৈ কম ওজনৰ সন্তান জন্ম দিয়াৰ আশংকা ৪০ শতাংশ বৃদ্ধি পায়।
তদুপৰি ৭০ শতাংশই অপৈণত সন্তান জন্ম দিব পাৰে। এই গৱেষকসকলৰ তথ্য প্ল’চ গ্ল’বেল পাব্লিক হেল্থ নামৰ এক পত্রিকাত প্রকাশ পাইছে। এই তথ্য অনুসৰি, উত্তৰ ভাৰতত বাস কৰা শিশুসকলে দেশৰ ভিতৰতে অধিক প্ৰদূষিত বায়ু গ্ৰহণৰ আশংকা আছে। উল্লেখ্য যে জীৱাশ্ম ইন্ধন আৰু জৈৱবস্তু ইন্ধনৰ দহনৰ ফলত বায়ুৰ ব্যাসত ২.৫ মাইক্ৰ’ন (পিএম২.৫) প্ৰদূষক মিহলি হ’ব পাৰে। এই প্ৰদূষক সবাতোকৈ ক্ষতিকাৰক বায়ু প্ৰদূষক আখ্যা দিয়া হয়।
গৱেষকসকলে উদ্ধাৰ কৰা তথ্য অনুসৰি, এনে পৰিমাণৰ প্ৰদূষক উত্তৰ প্ৰদেশ, বিহাৰ, দিল্লী, পঞ্জাৱ আৰু হাৰিয়ানাক সামৰি গংগীয় অঞ্চলত পোৱা গৈছে। অৱশ্যে এই দিশৰ পৰা দেশৰ উত্তৰ-পূব আৰু দক্ষিণ অঞ্চল কিছু নিৰাপদ হৈ আছে। ২০১৯-২১ৰ কেন্দ্ৰীয় জনগাঁথনিগত স্বাস্থ্য সমীক্ষাৰ তথ্য অনুসৰি, হিমাচল প্রদেশত সর্বাধিক ৩৯ শতাংশ অপৈণত শিশুৰ জন্ম হৈছে। ইয়াৰ পাছতে উত্তৰাখণ্ড (২৭ শতাংশ), ৰাজস্থান (১৮ শতাংশ) আৰু দিল্লী (১৭শতাংশ) আছে।
আনহাতে, দেশৰ ভিতৰত জন্মতে স্বাভাৱিকতকৈ কম ওজনৰ শিশু জন্ম হৈছে পঞ্জাৱ (২২ শতাংশ)। ইয়াৰ পাছতে আছে দিল্লী, দাদ্ৰা আৰু নগৰ হাভেলি, মধ্য প্রদেশ, হাৰিয়ানা আৰু উত্তৰ প্ৰদেশ। এই ক্ষেত্ৰতো উত্তৰ-পূবৰ অৱস্থা বহু উন্নত। এই গৱেষকসকলে প্রকাশ কৰা অনুসৰি, একমাত্র বায়ু প্ৰদূষণৰ প্ৰভাৱতে দেশত ১৩ শতাংশ অপৈণত শিশুৰ জন্ম হৈছে। একেদৰে জন্মতে স্বাভাৱিকতকৈ কম ওজনৰ ১৭ শতাংশ শিশুৱে জন্ম লাভ কৰিছে।
এই সম্পৰ্কত গৱেষকৰ দলটোৱে কয়, ‘২০১৯-২১ৰ ৰাষ্ট্ৰীয় জনগাঁথনিগত স্বাস্থ্য সমীক্ষাৰ পূৰ্বৰ পাঁচ বছৰতো স্বাভাৱিকতকৈ কম ওজনৰ ১৮ শতাংশ শিশুৰ জন্ম হয়।’ বায়ু প্রদূষণ সম্পর্কে ব্যাপক সজাগতা কাৰ্যসূচী গ্ৰহণৰ পোষকতা কৰিছে এই গৱেষকসকলে।