উত্তৰ-পূৰ্বাঞ্চলৰ খিলঞ্জীয়া লোকসকলৰ সুৰক্ষাৰ প্ৰতি সৰৱ হৈ পৰিছে উত্তৰ-পূব খিলঞ্জীয়া মঞ্চ । চুবুৰীয়া ৰাষ্ট্ৰ চীন, ম্যানমাৰ আৰু বাংলাদেশৰ আন্তঃৰাষ্ট্ৰীয় সীমাই উত্তৰ-পূৰ্বাঞ্চললৈ ভাবুকি কঢ়িয়াই আনিছে বুলি দাবী উত্থাপন কৰিছে উত্তৰ-পূব খিলঞ্জীয়া মঞ্চই । উত্তৰ পূৰ্বাঞ্চলৰ ৰাজ্যসমূহত বিদেশী নাগৰিকৰ ৰুদ্ধহীন অনুপ্ৰৱেশ প্ৰতিৰোধৰ বাবে পর্যাপ্ত সাংবিধানিক ব্যৱস্থা আৰু প্রশাসনীয় কাৰ্য ব্যৱস্থা শূণ্য বুলি ক্ষোভ প্ৰকাশ কৰিছে উত্তৰ-পূব খিলঞ্জীয়া মঞ্চই ।
বৃহস্পতিবাৰে হাতীগাঁওস্থিত উত্তৰ-পূব খিলঞ্জীয়া মঞ্চৰ কাৰ্যালয়ত এক সংবাদমেলযোগে উত্তৰ-পূৰ্বাঞ্চলৰ কেইবাটাও সমস্যাক লৈ উদ্বেগ প্ৰকাশ কৰে উত্তৰ-পূব খিলঞ্জীয়া মঞ্চৰ সভাপতি/ অধ্যক্ষ অনুপ চেতিয়া আৰু মহাসচিব এন. ইবুংগোঢৌবিয়ে । সংবাদমেলখনত সভাপতিগৰাকীয়ে উল্লেখ কৰে, “খিলঞ্জীয়া লোকসকলে বহুদিন ধৰি সন্মুখীন হৈ অহা জটিলতম পৰিস্থিতিৰ ভয়াবহতাই আমাক গভীৰভাৱে চিন্তিত কৰি তোলাৰ পটভূমিত আপোনালোকৰ তাৎক্ষণিক দৃষ্টি আক হস্তক্ষেপ বিচাৰিবলৈ বাধ্য কৰাইছে ।”
“ভাৰত উপমহাদেশৰ উত্তৰ-পূৱ অঞ্চল হ’ল সাংস্কৃতিক আৰু জাতিগত অনির্বাচনীয় বৈচিত্র্যৰ এক অনন্য সমাহাৰ- যি অঞ্চলত খিলঞ্জীয়া জনগোষ্ঠীসমূহে যুগ যুগ ধৰি বসবাস কৰি আহিছে আৰু সাধাৰণ আৰ্থ-সামাজিক-সাংস্কৃতিক-ৰাজনৈতিক প্রত্যাহ্বানসমূহৰ অংশীদাৰ হৈ আহিছে। এইসমূহৰ এক জৰুৰী আৰু আতংকজনক বিষয় হ’ল চুবুৰীয়া চীন, ম্যানমাৰ আৰু বাংলাদেশৰ সৈতে থকা আন্তঃৰাষ্ট্ৰীয় সীমাৰ ভয়াৱহ প্রভাব। এই প্রভাৱ ইমানেই গভীৰ তথা জটিল যে তাৰ ফলতেই অঞ্চলটোলৈ বিদেশী নাগৰিকৰ ৰুদ্ধহীন অনুপ্ৰৱেশ প্ৰতিৰোধৰ বাবে পর্যাপ্ত সাংবিধানিক ব্যৱস্থাৰ অনুপস্থিতি আৰু প্রশাসনীয় কাৰ্য ব্যৱস্থাৰ শূণ্যতাই ইতিমধ্যে আমাৰ অঞ্চলৰ জনসাধাৰণে ভোগ কৰি অহা পৰিস্থিতি দিনক দিনে অধিক ভয়াবহ কৰি তুলিছে।” সভাপতিগৰাকীয়ে প্ৰেছ বিবৃতিৰ জৰিয়তে এই কথা জানিবলৈ দিয়ে।
প্ৰেছ বিবৃতিখনত উল্লেখ কৰে, “শেহতীয়া বছৰসমূহত আমাৰ অঞ্চলটোৰ পৰিৱৰ্তিত অনাকাংক্ষিত জনগাঁথনিয়ে বহুমুখী সংকটৰ সৃষ্টি কৰিছে, যাৰ ফলত খিলঞ্জীয়া জনগোষ্ঠীসমূহৰ সুসম অস্তিত্বৰ প্রতি ভয়াৱহ ভাবুকিৰ সৃষ্টি কৰিছে। ইতমিধ্যে দ্রুতগতিৰে বিকশিত হোৱা সাম্প্রতিক বিশ্বত খিলঞ্জীয়া লোকসকলৰ বাবে তেওঁলোকে হেৰুৱাই পেলোৱা অর্থনৈতিক আৰু ৰাজনৈতিক সুযোগসমূহৰ পটভূমিত এক কৃত্রিম তথা বিৰাট ব্যৱধানৰ সৃষ্টি হৈছে, যাৰ ফলত এই জনগোষ্ঠীসমূহক অধিক সংশয়তাৰ পিনে তথা অনিশ্চয়তাৰ পিনে ঠেলি পঠিওৱা হৈছে। এনে উদ্বেগবোৰৰ পৰিপ্ৰেক্ষিতত, উত্তৰ-পূৰ্বাঞ্চলৰ ৰাজ্যসমূহক প্রতিনিধিত্ব কৰা লোকসভা আৰু ৰাজ্যসভাৰ সকলো সদস্যকে খিলঞ্জীয়া জনগোষ্ঠীসমূহৰ স্বাৰ্থৰক্ষাৰ বাবে এক ঐক্যবদ্ধ পন্থা গ্রহণ কৰিবলৈ আমি আহ্বান জনাইছো। যিহেতু খিলঞ্জীয়া লোকসকলে সম্মুখীন হোৱা ক্রমবর্দ্ধমান প্রত্যাহ্বানসমূহ অতি সুনিশ্চিতভাবে, জৰুৰীভাবে সামুহিক সংকল্পৰে মোকাবিলা কৰাটো সাম্প্ৰতিক সময়ছোৱাত অতিশয় জৰুৰী হৈ পৰিছে।”
সভাপতিগৰাকীয়ে সকলোকে আহ্বান জনায় সংবাদমেলখনত কয়, “আমি আপোনালোকক আহ্বান জনাইছো- আপোনালোকে এই অঞ্চলৰ নিৰ্বাচিত প্রতিনিধি হিচাপে, উত্তৰ-পূৰ্বাঞ্চলৰ সাংসদ হিচাপে, ঐক্যবদ্ধ হৈ অইন সাংসদসকলৰ সৈতেও সমন্বয় সাধন কৰি এখন উমৈহতীয়া মঞ্চ সৃষ্টি কৰি কাৰ্যপন্থা গ্রহণ কৰক। উত্তৰ-পূব খিলঞ্জীয়া মঞ্চ (North East Indigeuons Peoples’ Forum) ই আপোনালোকৰ এনে প্রচেষ্টাৰ সৈতে জড়িত হৈ প্রত্যাহ্বানসমূহৰ মোকাবিলা কৰিবলৈ সাজু হৈ আছে ।”
আনহাতে সংবাদমেলখনত মহাসচিব এন. ইবুংগোঢৌবিয়ে সংসদৰ লগতে ৰাজ্য পৰ্যায়ৰ প্ৰতিনিধিসকলক উদ্দেশ্যি অনুৰোধ কৰে যে এক শক্তিশালী উমৈহতীয়া মঞ্চ সৃষ্টি কৰি খিলঞ্জীয়া লোকসকলৰ অস্তিত্বৰ প্ৰতি ভাবুকি কঢ়িয়াই অনা জনগাঁথনিগত পৰিৱৰ্তন ৰোধ কৰিবলৈ নীতি নিৰ্দ্ধাৰণ সুৰক্ষাৰ বাবেও যথাযথ ব্যৱস্থাৰ বাবে সকলোৱে আগবাঢ়ি আহিব লাগে । খিলঞ্জীয়া জনগোষ্ঠীসমূহৰ অর্থনৈতিক ভিত্তি সবল কৰিবলৈ আৰু উন্নয়ন সাধন কৰিবলৈ লক্ষ্য নিৰ্দ্ধাৰণ কৰা অর্থনৈতিক সুযোগ কঢ়িয়াই অনাৰ বাবে সকলোৱে অগ্ৰসৰ হোৱাটো বাঞ্চনীয় ।
