Matriculation Will be held twice a year:
কেন্দ্রীয় মাধ্যমিক শিক্ষা ব’র্ড (চিবিএছই)ৰ দৰে অসমৰ ৰাজ্যিক শিক্ষা ব’ৰ্ডৰ অধীনতো বছৰটোত দুবাৰ মেট্রিক পৰীক্ষা অনুষ্ঠিত কৰা সন্দৰ্ভত পৰীক্ষা-নিৰীক্ষা চলি আছে। দেওবাৰে শিক্ষামন্ত্রী ডাঃ ৰণোজ পেগুৱে ইয়াত এই কথা সদৰী কৰে।
শোণিতপুৰৰ ডুমডুমাস্থিত আদর্শ স্নাতক মহাবিদ্যালয়ৰ আন্তঃগাঁথনি আৰু শিক্ষা ব্যৱস্থাৰ বুজ লয় মন্ত্রীজনে। পাছত তেওঁ সাংবাদিকৰ আগত কয় যে অসমত প্ৰকৃতাৰ্থত বছৰত দুবাৰ মেট্ৰিক পৰীক্ষা অনুষ্ঠিত হয়। যিসকল ছাত্র-ছাত্রী মূল পৰীক্ষাত কৃতকাৰ্য নহয়, সেইসকলৰ বাবে আকৌ এটা পৰীক্ষা অনুষ্ঠিত কৰা হয়। এই পৰীক্ষাক ‘কম্পার্টমেন্টেল’ বুলি কোৱা হয়।
শেহতীয়াভাৱে চিবিএহইয়ে বছৰত দুবাৰ দশম শ্ৰেণীৰ পৰীক্ষা অনুষ্ঠিত কৰিব বুলি কৰা ঘোষণা সন্দর্ভত তেওঁ কয়, ‘আমিও বিষয়টো পৰীক্ষা কৰি আছো। আমাৰ মুক্ত স্কুল আছে, এনআইঅ’এছ আছে। তাতো দুবাৰ পৰীক্ষা পতাৰ ব্যৱস্থা আছে। গতিকে আমিও বিষয়টো পৰীক্ষা কৰি চাম।’ অৱশ্যে শৈক্ষিক বৰ্ষৰ সময়সূচীক লৈ কোনো সিদ্ধান্ত গ্রহণ কৰা নাই বুলি শিক্ষামন্ত্রী ডাঃ পেগুৱে সদৰী কৰে।
এই সম্পর্কত তেওঁ কয়, ‘ৰাজ্যত শৈক্ষিক বৰ্ষৰ সময়সূচী নির্ধাৰণৰ পৰীক্ষা-নিৰীক্ষাৰ বাবে বিভাগীয়ভাৱে এখন সমিতি গঠন কৰা হৈছে বিষয়টো জটিল। শিক্ষাবিদসকলৰ পৰা আৰু জ্যেষ্ঠ নাগৰিকসকলৰ পৰা আমালৈ বহু পৰামৰ্শ আহিছে। ‘অৱশ্যে কেৱল অসমে শিক্ষাবৰ্ষৰ সময়সূচী সলনি কৰিলে নহ’ব বুলিও উল্লেখ কৰি তেওঁ আৰু কয়, ‘অসমৰ পৰা বহু ল’ৰা-ছোৱালীয়ে উচ্চ শিক্ষা গ্রহণ কৰিবলৈ দেশৰ বিভিন্ন ৰাজ্যলৈ যায়। তাত যদি সময়সূচীৰ পৰিৱৰ্তন নহয় আৰু যদি অসমত পৰিৱৰ্তন হয় তেন্তে মাজত দুই-তিনি মাহ অসমৰ ল’ৰা-ছোৱালীয়ে অপেক্ষা কৰি থাকিব লাগিব।
তদুপৰি আমাৰ বহু ছাত্র-ছাত্রী বিভিন্ন প্রতিযোগিতামূলক পৰীক্ষাতো অবতীর্ণ হয়। অসম বহুক্ষেত্রত আগবঢ়া। আমাৰ এইবাৰ মেট্রিক পৰীক্ষাৰ ফলাফল আগতে ওলাইছে আৰু চিবিএছইৰ পাছত ওলাইছে। আমি মহাবিদ্যালয়সমূহত নামভৰ্তি পৰীক্ষা শেষ কৰিলো। চিইউইটিৰ ফলাফল ঘোষণাত পলম হ’ল। তেওঁলোকৰ বাবে অপেক্ষা কৰি থাকিবলগীয়া হৈছে।’ অহা পহিলা আগষ্টৰ পৰাহে মহাবিদ্যালয়সমূহত পাঠদান আৰম্ভ হ’ব বুলি তেওঁ সদৰী কৰে এই সমগ্ৰ দিশ পৰীক্ষা-নিৰীক্ষা কৰিবলৈ বিভাগীয়ভাৱে সমিতিখন গঠন কৰা হৈছে বুলি ডাঃ পেগুৱে কয়।
আনহাতে, অলপতে ধেমাজিত কৰ্তব্যৰত অৱস্থাতে এজন সাংবাদিকক টিএমপিকেৰ কৰ্মীয়ে প্ৰহাৰ কৰা বুলি উত্থাপন হোৱা অভিযোগ সম্পর্কত আজি ডাঃ পেগুৱে কয়, ‘এই সম্পর্কত স্থানীয়ভাবে টিএমপিকেই এটা বিবৃতি দিছে। দুটা পক্ষৰ মাজত এখন কাজিয়া হৈছিল বুলি উল্লেখ কৰি মোক কোৱা হৈছে যে কাজিয়াখনৰ মাজত সাংবাদিকজন সোমাই পৰে।’
অৱশ্যে এনেধৰণে হাতত লাঠি লৈ সাংবাদিক বুলিয়ে নহয়, কাৰোবাক আক্রমণ কৰাটো এটা গর্হিত কাম বুলি মন্ত্রীজনে মন্তব্য কৰে ঘটনাটো নিন্দা কৰি তেওঁ কয়, ‘এই ঘটনাৰ মই নিন্দা কৰিছো। কোনেও আইন হাতত তুলি ল’ব নালাগে। আৰক্ষী-প্রশাসন আছে। তেওঁলোকে ব্যৱস্থা গ্রহণ কৰিবই। মই জনাত তেওঁলোকে ব্যৱস্থা গ্রহণ কৰিছে |