Impacts of climate change:
প্রচণ্ড গৰমে জীবন যাত্রা দুর্বিষহ কৰাৰ সময়ত সম্ভৱতঃ বহুতে তুষাৰপাত হোৱা স্থানসমূহৰ কথা মনত পেলায়। উৎকট গৰমৰ দিনত বহুতে কল্পনাও কৰে ছুইজাৰলেণ্ডৰ দৰে দেশৰ মানুহ সুখী বুলি; কিন্তু আগৰ দিন নাই। গোলকীয় বতৰ পৰিৱৰ্তনৰ ফলত চৌদিশে সলনি হ’বলৈ ধৰিছে পৰিৱেশ। ঠাণ্ডা ঠাইৰূপে চিহ্নিত ইউৰোপৰ বিভিন্ন দেশতো প্রচণ্ড গৰম পৰিবলৈ ধৰিছে।
আনকি স্পেইনত চলিত গ্রীষ্মকালত পাৰাস্তম্ভই ৪২ ডিগ্রী চেলছিয়াছকো স্পর্শ কৰিছে। একেই অসহনীয় পৰিৱেশ বিৰাজ কৰিছে ফ্রান্স, পর্তুগাল, ইটালী, গ্রীচ আৰু ছুইজাৰলেণ্ডতো। শুকুলা বৰফে ঢাকি থোৱা ছুইজাৰলেণ্ডৰ দৰে দেশতে উষ্ণতাৰ এই অস্বাভাৱিক বৃদ্ধিয়ে বহুতকে হতবাক কৰিছে।
আনকি এনে পৰিস্থিতিত একাংশই আশংকা কৰিবলৈ লৈছে যে অৱস্থাৰ পৰিৱৰ্তন নহ’লে আগন্তুক দুবছৰৰ ভিতৰত ইউৰোপ বসবাসৰ বাবে অযোগ্য হৈ উঠিব। উল্লেখ্য যে বহুতৰ বাবে অবিশ্বাস্য হ’লেও সত্য যে উৎকট গৰমৰ বাবে কালি উইম্বলডন প্রতিযোগিতাৰ অন্ত নৌপৰোতেই দুবাৰৰ মহিলা ছিংগলছৰ ফাইনেলিষ্ট উনছ জাবেওৰে বিদায় লয়। খেলত তেওঁ বুলগেৰিয়াৰ ভিক্টোৰিয়া টোমোভাৰ বিৰুদ্ধে ৬-৭ (৫-৭), ০-২ ব্যৱধানত পিছ পৰিছিল।
গৰমে অৱস্থা কাহিল কৰি তোলাত অৱশেষত তেওঁ প্রতিযোগিতাৰ পৰা বিদায় লয়। গতিকে ইউৰোপৰ পৰিৱেশ সম্প্ৰতি গৰমে কেনে অসহ্যকৰ কৰি তুলিছে সেয়া সহজে অনুমেয়। ইউৰোপৰ সাম্প্ৰতিক পৰিস্থিতিক লৈ উদ্বিগ্ন হৈছে ইউৰোপীয় সংঘও। মহাদেশখনৰ পৰিৱেশৰ এই অস্বাভাৱিক পৰিৱৰ্তনে কোটি কোটি লোকৰ জীৱন বিপদাপন্ন কৰিব বুলি আশংকা কৰিছে ইউৰোপীয় ইউনিয়নৰ ক’পাৰনিকাছ জলবায়ু পৰিৱৰ্তন আৰু বিশ্ব পৰিৱেশ সংস্থাই। সদায় পর্যটকক আকৰ্ষণ কৰি থকা এই দেশসমূহত গৰম কেনেদৰে পৰিছে তাৰ এক বিৱৰণ উল্লেখ কৰা হ’ল-
ছুইজাৰলেণ্ড: আল্পছ পৰ্বতৰ কোলাত অৱস্থিত ছুইজাৰলেণ্ডৰ জুৰিখ, জেনেভা আদিত উৎকট গৰমে পৰিৱেশ অসহ্যকৰ কৰিছে। যোৱা দেওবাৰে এই স্থানসমূহত সর্বোচ্চ তাপমাত্রা ৩২ৰ পৰা ৩৫ ডিগ্রী চেলছিয়াছ পর্যন্ত হয়। ইউৰোপৰ দেশ বা ছুইজাৰলেণ্ডৰ বাবে এই অৱস্থা অস্বাভাৱিক। ইয়াৰ বিপৰীতে ভাৰতৰ কেতবোৰ অঞ্চলত উক্ত দিনা সর্বোচ্চ তাপমাত্রা ৩০ ডিগ্রী চেলছিয়াছৰ ওচৰে-পাঁজৰে থাকে। আনকি নতুন দিল্লীৰ সর্বোচ্চ তাপমাত্রা ২৭ ডিগ্রী চেলছিয়াছহে আছিল। অর্থাৎ গৰমৰ দিশৰ পৰা দিল্লীৰ স’তে ছুইজাৰলেণ্ডৰ একাধিক চহৰে যেন প্রতিদ্বন্দ্বিতাহে কৰে।
স্পেইন: যোৱা শনিবাৰে দক্ষিণ-পশ্চিম স্পেইনৰ লা গ্রানাডো চহৰত সর্বোচ্চ তাপমাত্রা ৪৬ ডিগ্রী চেলছিয়াছ হয়। বিগত ছয় দশকৰ পাছত এইবাৰ স্পেইনত এনে অসহনীয় গৰম পৰিছে।
পর্তুগাল: ফুটবল তাৰকা ক্রিস্টিয়ানো ৰোণাল্ড’ৰ দেশ পর্তুগালতো গৰমে জলা-কলা দিছে। দেশখনৰ মধ্য অঞ্চলৰ আলভেডা চহৰত পাৰাস্তম্ভ ৪৫ ডিগ্রী চেলছিয়াছ পর্যন্ত হৈছে। আনকি পর্তুগালৰ ৰাজধানী চহৰ লিছবনতো তাপমাত্রা ৪২ ডিগ্রী চেলছিয়াছ পর্যন্ত হৈছে।
ফ্রান্স: এইবাৰৰ গ্ৰীষ্মকালত ফ্রান্সতো গৰম অসহনীয় হৈছে। গ্রীষ্মপ্রবাহে দেশবাসীৰ অৱস্থা কাহিল কৰিছে। সম্প্ৰতি দেশখনৰ দক্ষিণ-পশ্চিম অঞ্চলৰ চহৰসমূহৰ সৰ্বোচ্চ তাপমাত্রা ৪০ ডিগ্ৰীৰ ওচৰে-পাঁজৰে আছে। দেওবাৰে দেশখনৰ দ্বিতীয় বৃহত্তম চহৰ মাৰ্ছাইৰ তাপমাত্রা ৪১ ডিগ্রী চেলছিয়াছ হয়। এনে অৱস্থাত সাধাৰণ লোকসকলক দিনৰ সময়ছোৱাত অপ্রয়োজনীয় কামত ঘৰৰ পৰা নোলাবলৈ চৰকাৰে আহ্বান জনাইছে।
ইটালী: এইবাৰৰ গ্ৰীষ্মকালত ইটালীৰ অৱস্থাও বিপজ্জনক হৈছে। যোৱা দেওবাৰে দেশখনৰ পালেৰমোৰ চহৰত তাপমাত্রা ৩৯ ডিগ্রী চেলছিয়াছ পর্যন্ত হয়। তাপমাত্রা এনে বৃদ্ধি পোৱাত চৰকাৰে ঘৰৰ পৰাই কাম-কাজ কৰিবলৈ দেশবাসীৰ প্ৰতি আহ্বান জনাইছে।
গ্ৰীচ: এইবাৰৰ গৰমত গ্ৰীচৰ অৱস্থাও কাহিল। দেশখনৰ একাংশ অঞ্চলৰ তাপমাত্রা ৪০ ডিগ্রী চেলছিয়াছ পর্যান্ত হৈছে। গতিকে গৰমৰ দাবানলৰ পৰা ৰক্ষা পাবলৈ দেশখনৰ কেতবোৰ অঞ্চলত আংশিক বন্ধ পালনো হৈছে।
ব্রিটেইন: সম্প্রতি ব্রিটেইনৰ অৱস্থাও গৰমে কাহিল কৰিছে। অৱশ্যে ছুইজাৰলেণ্ড, ফ্রান্স আদিৰ দৰে ব্রিটেইনৰ অৱস্থা অধিক শোচনীয় নহয়। তৎসত্ত্বেও দেশখনত সর্বোচ্চ তাপমাত্রা ৩৩ ডিগ্রী চেলছিয়াছ পর্যন্ত হৈছে ৷
