Mohan Bhagwat:
অহা ছেপ্টেম্বৰত প্রধানমন্ত্রী নৰেন্দ্ৰ মোদীয়ে ৭৫ বছৰ পূৰ্ণ কৰিব। ইয়াৰ লগে লগে তেওঁ দায়িত্বৰ পৰা অব্যাহতি ল’ব নেকি? সম্প্রতি এই চর্চাকে অধিক গতি দিলে আৰএছএছৰ মুৰব্বী মোহন ভাগৱতে। উল্লেখ্য যে মোদীয়ে পূৰ্বে ৭৫ বছৰ পূৰ্ণ কৰা ব্যক্তিক মন্ত্ৰিত্ব বা তেনে দায়িত্ব প্রদানৰ বিপক্ষে সৰৱ হৈছিল। একমাত্র বয়স বৃদ্ধিৰ বাবে বিজেপিৰ প্ৰতিষ্ঠাপক দুই নেতা লালকৃষ্ণ আদৱানী আৰু মুৰলী মনোহৰ যোশীকো অৱসৰ গ্ৰহণ কৰিবলৈ মোদীয়ে বাধ্য কৰিছিল বুলি চর্চা চলি আহিছে। সেয়েহে একে নীতি অনুসৰণ কৰি মোদীয়েও অৱসৰ গ্ৰহণ কৰিব নেকি বুলি সম্প্ৰতি পুনৰ চৰ্চা হৈছে।
আনকি সংঘ পৰিবাৰৰ অভ্যন্তৰতো এনে চর্চা হোৱা বুলি একাংশ বিৰোধী দলে দাবী কৰিছে। কাৰণ কালি নাগপুৰত আৰএছএছৰ প্ৰয়াত নেতা মৰোপান্ট পিংলেৰ জীৱন আধাৰিত এখন গ্রন্থ উন্মোচনী অনুষ্ঠানত বিজেপিৰ অভিভাৱক সংগঠনটোৰ মুৰব্বী ভাগৱতে এক ইংগিতপূর্ণ মন্তব্য কৰি কয় যে বয়স ৭৫ বছৰ পূৰ্ণ হোৱাৰ লগে লগে এজন ব্যক্তিয়ে ৰাজহুৱা দায়িত্বৰ পৰা নিজেই অব্যাহতি ল’ব লাগে। অনুষ্ঠানত আৰএছএছ মুৰব্বীজনে পিংলেৰ এটা উক্তিৰ আঁত ধৰি কয়, ‘মৰোপান্টই এবাৰ কৈছিল যে যেতিয়াই ৭৫ বছৰ বয়স হয়, তেতিয়াই এজন ব্যক্তি থমকি ৰোৱা উচিত।
তাৰ মানে আপোনাৰ (ব্যক্তিজনৰ) বয়স হৈছে। আপুনি অব্যাহতি লওক। আমাক কাম কৰিবলৈ দিয়ক।’ আৰএছএছ মুৰব্বীজনৰ এই বক্তব্য প্ৰচাৰ হোৱাৰ পাছতে একাংশ বিৰোধী দলে প্রতিক্রিয়া প্রকাশ কৰিছে। শিৱসেনা (ইউবিটি)ৰ নেতা সঞ্জয় ৰাউটে দাবী কৰে যে দৰাচলতে আৰএছএছ মুৰব্বীয়ে পৰোক্ষভাবে প্রধানমন্ত্রী মোদীলৈ অৱসৰৰ বাৰ্তা প্ৰেৰণ কৰিবলৈ বিচাৰিছে। বিষয়টোক লৈ পূৰ্বৰ উদাহৰণ দি শিৱসেনা নেতা বাউটে লগতে কয়, ‘ইয়াৰ পূৰ্বে লালকৃষ্ণ আদৱানী, মুৰলী মনোহৰ যোশী, যশোৱন্ত সিংসহ ৭৫ বছৰ পূৰ্ণ কৰা বিজেপি নেতাসকলক অৱসৰ ল’বলৈ বাধ্য কৰে মোদীয়ে। এতিয়া দেখা যাওঁক তেওঁ নিজে সেই পথ অৱলম্বন কৰিব নে নকৰে?’
উল্লেখ্য যে যোৱা মাৰ্চত প্রধানমন্ত্রী মোদীয়ে নাগপুৰস্থিত আৰএছএছৰ মুখ্য কাৰ্যালয় ভ্রমণ কৰে। তেওঁৰ এই ভ্রমণক লৈ প্রতিক্রিয়া প্রকাশ কৰি ৰাউটে দাবী কৰিছিল যে প্রধানমন্ত্রীয়ে পদত্যাগ কৰিবলৈ প্ৰস্তুতি চলাইছে। প্রধানমন্ত্ৰিত্বৰ কাৰ্যকালত প্ৰথমবাৰৰ বাবে মোদীয়ে আৰএছএছৰ মুখ্য কাৰ্যালয় ভ্ৰমণ কৰাক লৈ বাউটে প্রকাশ কৰা এই প্রতিক্রিয়ায়ো চর্চা অর্জন কৰে।
অৱশ্যে তেওঁ দাবী কৰাৰ দৰে মোদীয়ে পদত্যাগ নকৰিলে। একেদৰে বিজেপিয়েও মোদীৰ পদত্যাগৰ সম্ভাৱনা অহীকাৰ কৰি আহিছে। আনকি যোৱা বছৰৰ মে’ত কেন্দ্রীয় গৃহমন্ত্রী অমিত শ্বাহে দাবী কৰে যে ৭৫ বছৰ বয়স পূৰ্ণ কৰাৰ পাছতো মোদীয়ে অৱসৰ গ্ৰহণ নকৰে। বিজেপিৰ সংবিধানত এনে নিয়ম নাই বুলিও শ্বাহে দাবী উত্থাপন কৰে। তৎসত্ত্বেও ভাগৱতে কালি কৰা এই ইংগিতসূচক মন্তব্যই বিভিন্ন স্তৰত চৰ্চা অৰ্জন কৰিছে।