Fake Doctors:✒️ৰাজ্যত সক্রিয় হৈ আছে বহু ভুৱা চিকিৎসক। ‘অসম কাউঞ্চিল অফ মেডিকেল ৰেজিষ্ট্ৰেচন’ (এচিএমআৰ) নামৰ সংস্থাটোৰ তদন্তত এই উদ্বেগজনক তথ্য পোহৰলৈ আহিছে। গুৱাহাটী মহানগৰীকে ধৰি বিশেষকৈ পিছপৰা অঞ্চলসমূহত এতিয়াও একাংশই নিজকে চিকিৎসকৰূপে চিনাকি দি ৰোগীৰ জীৱনক লৈ হেতালি খেলি ৰমৰমীয়া ব্যৱসায় চলাই গৈছে।
এনে ভুৱা চিকিৎসকৰ এখন দীঘলীয়া তালিকা প্ৰস্তুত কৰি সংস্থাটোৰ অনুসন্ধানকাৰী দলে তদন্ত অব্যাহত ৰাখিছে। উল্লেখ্য যে যোৱা চাৰি-পাঁচ বছৰত ৰাজ্যত অর্ধশতাধিক ভুৱা চিকিৎসকক আৰক্ষীয়ে গ্ৰেপ্তাৰ কৰিছে।
সমান্তৰালভাৱে চলিত বৰ্ষৰ জানুৱাৰীত ভুৱা চিকিৎসকৰ বিৰুদ্ধে অভিযান চলাবলৈ ‘অসম কাউঞ্চিল অফ মেডিকেল ৰেজিষ্ট্ৰেচনে’ এক তদাৰকী কোষ গঠন কৰি বিভিন্ন স্থানত অভিযান অব্যাহত ৰাখিছে। এই অভিযানৰ অংশৰূপে চলিত বৰ্ষত তদাৰকী কোষে ১৪ জন ভুৱা চিকিৎসকৰ বিৰুদ্ধে এজাহাৰ দাখিল কৰিছে বুলি সদৰী কৰিছে তদাৰকী কোষৰ বিষয়া ডাঃ অভিজিৎ নেওগে।
‘দৈনিক অগ্রদূত’ৰ আগত ডাঃ নেওগে কয় যে ২০১৪ৰ পৰা তেওঁ ভুৱা চিকিৎসকৰ বিৰুদ্ধে সক্রিয় হৈ আহিছে আৰু এই সন্দৰ্ভত গুৱাহাটী উচ্চ ন্যায়ালয়ত এক গোচৰো চলি আছে। জানুৱাৰীত গঠন হোৱা এচিএমআৰৰ তদাৰকী কোষে লাভ কৰা অভিযোগৰ ভিত্তিত ১৪খন এজাহাৰ দাখিল কৰিছে আৰু এই এজাহাৰৰ ভিত্তিত আৰক্ষীয়ে ৰাজ্যখনৰ বিভিন্ন প্ৰান্তৰ পৰা ১০জন ভুৱা চিকিৎসকক গ্ৰেপ্তাৰ কৰাৰ লগতে দুজনৰ বিৰুদ্ধে তদন্ত অব্যাহত আছে।
উল্লেখ্য যে ৰাইজৰ অভিযোগৰ ভিত্তিত কমেও ১০জন সন্দেহজনক চিকিৎসকৰ বিৰুদ্ধে তদাৰকী কোষে তদন্ত অব্যাহত ৰাখিছে বুলি তেওঁ উল্লেখ কৰি ৰাজ্যখনৰ পৰা ভুৱা চিকিৎসকক উৎখাত কৰিবলৈ ৰাইজৰ সহযোগিতা কামনা কৰে।
তেওঁ কয় যে ভুৱা তথা সন্দেহজনক চিকিৎসকৰ বিৰুদ্ধে ৰাইজে অভিযোগ দাখিল কৰিব পৰাকৈ তদাৰকী কোষে শীঘ্ৰে এক ট্র’ল ফ্রী নম্বৰ মুকলি কৰি দিব। সদ্যহতে ভুৱা চিকিৎসকৰ সন্দৰ্ভত তথ্য থাকিলে acmr.vigilance@gmail.comত মেইল কৰিবলৈ তেওঁ সকলোৰে প্ৰতি আহ্বান জনায়।
ইফালে, কেন্দ্রীয় তদন্তকাৰী সংস্থাৰ অভিযানত দেশৰ ভিতৰত অসমত সর্বাধিক ভুৱা চিকিৎসক সক্ৰিয় হৈ থকাৰ তথ্য পোহৰলৈ আহিছে। বিদেশৰ পৰা নাইবা দেশৰ একাংশ প্রতিষ্ঠানৰ পৰা সন্দেহজনক ডিপ্ল’মাৰ প্ৰমাণপত্ৰ লৈ একাংশই নিজকে চিকিৎসকৰূপে চিনাকি দি অসমত ক্লিনিক খুলি চিকিৎসা সেৱা চলাই যোৱাৰ গুৰুতৰ তথ্য তদন্তকাৰী সংস্থাসমূহৰ অভিযানত পোহৰলৈ আহিছিল।
অৱশ্যে এনে ভুৱা চিকিৎসকৰ বিৰুদ্ধে ৰাজ্যৰ স্বাস্থ্য বিভাগ তথা চৰকাৰ যিদৰে সক্ৰিয় হ’ব লাগিছিল, সেয়া হোৱা নাই বুলি বিভিন্ন সময়ত অভিযোগ উত্থাপিত হৈ আহিছে। অৱশ্যে চলিত বৰ্ষৰ জানুৱাৰীত এচিএমআৰৰ অধীনত তদাৰকী কোষ গঠন কৰা হৈছে যদিও ৰাজ্যত সক্রিয় হৈ থকা ভুৱা চিকিৎসকৰ ৰমৰমীয়া ব্যৱসায়িক ক্ষেত্ৰখন উৎখাত কৰিবলৈ সক্ষম হোৱা নাই।
উল্লেখ্য যে ৰাজ্যত সক্রিয় হৈ থকা ভুৱা চিকিৎসকৰ এই বেহাখন একাংশ ৰাজনৈতিক নেতাই বিভিন্ন সময়ত ৰক্ষণাবেক্ষণ দি অহাৰো অভিযোগ আছে। আনকি ভুৱা চিকিৎসকে একাংশ দালালক নিয়োগ কৰি সংশ্লিষ্ট পক্ষক মেনেজ কৰি অহাৰো অভিযোগ আছে।
যাৰ ফলত স্বয়ং মুখ্যমন্ত্ৰীৰ ঘনিষ্ঠ বুলি দাবী কৰি দদৰাত চৌধুৰী উপাধিৰ এজন সন্দেহজনক চিকিৎসকে দীর্ঘদিন ধৰি ক্লিনিক খুলি সকলো প্ৰকাৰৰ চিকিৎসা সেৱা বিনাবাধাই প্ৰদান কৰি আহিছে। অভিযোগ অনুসৰি, চৌধুৰী উপাধিৰ চিকিৎসকজনে একাংশ সাংবাদিক আৰু ৰাজনৈতিক নেতাক মাহিলি উপাৰ্জনৰ এটা অংশ প্রদান কৰি অহাৰ লগতে কামৰূপৰ জিলা স্বাস্থ্য বিভাগৰ একাংশ বিষয়াক মেনেজ কৰি আহিছে।
যাৰ ফলত সন্দেহজনক চিকিৎসকজনে বিনা বাধাই দৈনিক দুই-তিনিশ ৰোগীৰ জীৱনক লৈ হেতালি খেলি ৰমৰমীয়া ব্যৱসায় চলাই গৈছে।