TCS:
দেশত নিবনুৱা সমস্যাই ভয়াৱহ ৰূপ ধাৰণ কৰি থকাৰ সময়তে টাটা কনছালটেন্সী ছার্ভিচেছ (টিচিএছ) প্রতিষ্ঠানে ১২ হেজাৰ কৰ্মীক অব্যাহতি দিয়াৰ সিদ্ধান্ত লৈছে। দেশৰ বৃহত্তম তথ্য প্রযুক্তি সেৱা যোগানদাতা প্রতিষ্ঠানটোৱে গ্রহণ কৰা এই সিদ্ধান্তই চৌদিশে তুমুল আলোড়নৰ সৃষ্টি কৰিছে। মূলতঃ কৃত্রিম বুদ্ধিমত্তা (এআই)ৰ আগ্রাসনৰ ফলত প্রতিষ্ঠানটোৰ এই বৃহৎ সংখ্যক চাকৰিয়ালে কামৰ পৰা অব্যাহতি পাব বুলি চর্চা হৈছে।
তদুপৰি মার্কিন ৰাষ্ট্ৰপতি ড’নাল্ড ট্রাম্পৰ ধূসৰ বাণিজ্যিক নীতিয়েও টাটা গ্ৰুপৰ প্ৰতিষ্ঠানটোক এনে কঠোৰ সিদ্ধান্ত ল’বলৈ বাধ্য কৰা বুলি বহুতে মন্তব্য কৰিছে। সূত্ৰই প্ৰকাশ কৰা অনুসৰি টিচিএছে চাকৰিৰ পৰা অব্যাহতি দিবলৈ লোৱা এই কৰ্মচাৰীসকলে প্রতিষ্ঠানটোৰ মধ্যম আৰু জ্যেষ্ঠ ব্যৱস্থাপনা পর্যায়ত কাৰ্যনিৰ্বাহ কৰি আছে। তেওঁলোকৰ কাম-কাজ কৃত্রিম বুদ্ধিমত্তাৰ দ্বাৰা সম্পন্ন কৰোৱাৰ সিদ্ধান্ত প্রতিষ্ঠানটোৱে লোৱা বুলিও সূত্রই ইংগিত দিছে।
সূত্ৰৰ মতে, এই কৰ্মচাৰীসকল বিশ্বৰ বিভিন্ন স্থানত নিয়োজিত হৈ আছে। চলিত বৰ্ষৰ ভিতৰতে প্রতিষ্ঠানটোৱে এইসকলক চাকৰিৰ পৰা অব্যাহতি দিয়াৰ সিদ্ধান্ত গ্রহণ কৰিছে। উল্লেখ্য যে সম্প্রতি টিচিএছৰ মুঠ চাকৰিয়ালৰ সংখ্যা ছয় লাখ ১৩ হেজাৰ ৬৯ জন। ইয়াৰে দুই শতাংশ অর্থাৎ ১২ হেজাৰক অব্যাহতি দিয়াৰ সিদ্ধান্ত লৈছে প্রতিষ্ঠান কর্তৃপক্ষই।
এই সম্পর্কত প্রতিষ্ঠান কর্তৃপক্ষই এক বিবৃতিত কয়, ‘প্রতিষ্ঠানক ভৱিষ্যতৰ বাবে সাজু কৰা আৰু ব্যৱসায় সম্প্ৰসাৰণ, কৃত্রিম বুদ্ধিমত্তা নিয়োগ আৰু কৰ্মবল পৰিৱৰ্তনৰ বাবে এই সিদ্ধান্ত লোৱা হৈছে। ‘ লক্ষ্যণীয় যে চলিত বৰ্ষৰ এপ্রিল-জুনৰ সময়ছোৱাত টিচিএছে পাঁচ হেজাৰ নতুন কৰ্মচাৰীক নিযুক্তি দিছিল।