Mid-Day Meal:
ৰাজ্যৰ প্ৰাথমিক বিদ্যালয়ত ছাত্ৰ-ছাত্ৰীৰ উপস্থিতি আৰু মধ্যাহ্ন ভোজনক লৈ বৃহৎ অনিয়মৰ তথ্য পোহৰলৈ আহিছে। এখন বিদ্যালয়ৰ শ্ৰেণীত এদিনত যিমান সংখ্যক ছাত্র-ছাত্রী উপস্থিত থাকে, মধ্যাহ্ন ভোজন ব্যৱস্থা সিমান সংখ্যকৰে হ’ব লাগে।
কেতিয়াবা মধ্যাহ্ন ভোজন গ্ৰহণ কৰা ছাত্ৰ-ছাত্ৰীৰ সংখ্যা দুই-এজন কম হ’ব পাৰে। দুই-এক ছাত্র-ছাত্রীয়ে কোনো কাৰণত কোনোবা দিনা মধ্যাহ্ন ভোজন গ্ৰহণ নকৰাটো স্বাভাৱিক কথা। ইয়াৰ বিপৰীতে একাংশ বিদ্যালয়ত উপস্থিত থকা ছাত্র-ছাত্ৰীৰ বিপৰীতে মধ্যাহ্ন ভোজন গ্রহণ কৰা ছাত্ৰ-ছাত্ৰীৰ সংখ্যা অধিক হোৱা আৰু কেতিয়াবা চকুত লগাকৈ কম হোৱাৰ তথ্য উন্মোচিত হৈছে।
ফলস্বৰূপে বিষয়টো মুখ্যমন্ত্রী ড: হিমন্ত বিশ্ব শৰ্মায়ো পৰ্যবেক্ষণ কৰিছে। উল্লেখ্য যে ৰাজ্যৰ শিক্ষা বিভাগত অদৃশ্য ছাত্র-ছাত্রী আৰু মধ্যাহ্ন ভোজনক লৈ দীর্ঘদিনৰ পৰা বিয়াগোম অনিয়ম সংঘটিত হৈ আহিছে। এই অনিয়ম প্ৰতিৰোধৰ অন্যতম উপায় হিচাপে শিক্ষা সেতু এপ ব্যৱহাৰ কৰা হৈছে। তৎসত্ত্বেও ৰাজ্যৰ এক বৃহৎ সংখ্যক বিদ্যালয়ত উপস্থিত থকা ছাত্ৰ-ছাত্ৰী আৰু মধ্যাহ্ন ভোজন গ্ৰহণ কৰা শিক্ষাৰ্থীৰ সংখ্যাৰ মাজত বৃহৎ গড়মিল ধৰা পৰাটো উদ্বেগৰ বিষয় হৈ পৰিছে।
উল্লেখ্য যে কালি সমগ্র শিক্ষা অসমৰ মিছন সঞ্চালক ড: ওম প্রকাশৰ অধ্যক্ষতাত এখন পর্যালোচনা সভা অনুষ্ঠিত হয়। সকলো জিলাৰ বিদ্যালয় পৰিদৰ্শক, জিলা প্রাথমিক শিক্ষা বিষয়া, খণ্ড প্রাথমিক শিক্ষা বিষয়া আদিৰ অংশগ্ৰহণৰে অনুষ্ঠিত এই পর্যালোচনা সভাত আন বিষয়াৰ লগতে ছাত্ৰ-ছাত্ৰীৰ উপস্থিতিৰ সংখ্যাৰ লগত মধ্যাহ্ন ভোজন গ্ৰহণ কৰা শিক্ষাৰ্থীৰ সংখ্যাত বৃহৎ অমিলৰ বিষয়টো আলোচনা কৰা হয়।
প্ৰথমবাৰৰ বাবে বিষয়টো কালি আলোচনা কৰাৰ পাছত জিলাসমূহৰ বিষয়াসকলক তৎকালে এই ক্ষেত্ৰত ব্যৱস্থা গ্ৰহণ কৰিবলৈ নিৰ্দেশ দিয়া হয়। উপস্থিতি আৰু মধ্যাহ্ন ভোজন গ্ৰহণ কৰা ছাত্ৰ-ছাত্ৰীৰ সংখ্যা সমান হ’বই লাগিব বুলি মিছন সঞ্চালকজনে জিলাবোৰক জনাই দিয়ে। শিক্ষা বিভাগৰ সূত্ৰই সদৰী কৰা অনুসৰি, অধিকাংশ জিলাতে এনে অমিলৰ ঘটনা সংঘটিত হৈছে।
এদিন-দুদিন নহয়, ধাৰাবাহিকভাৱে এনে ঘটনা সংঘটিত হৈছে। অথচ এনে হোৱাটো সম্ভৱ নহয়। শিক্ষা সেতু এপৰ জৰিয়তে যিহেতু সকলো বিষয়া নিয়ন্ত্রিত হয়, তেনে ক্ষেত্ৰত এই ধৰণৰ অমিল গুৰুতৰ হিচাপে গণ্য কৰা হৈছে। এই গড়মিল কিহৰ বাবে হৈছে, তাৰ অনুসন্ধান কৰিবলৈয়ো জিলা পৰ্যায়ৰ বিষয়াসকলক নির্দেশ দিয়া হৈছে।