ৰাজ্যৰ শিক্ষা বিভাগৰ চূড়ান্ত হেমাহীৰ বাবে একাংশ শিক্ষানুষ্ঠানৰ ছাত্ৰ-ছাত্ৰীয়ে উচিত শিক্ষাৰ পৰা বঞ্চিত হ’বলগীয়া হৈছে । একেদৰে একাংশ প্ৰধান শিক্ষকে মধ্যাহ্ন ভোজনৰ ধন আত্মসাৎ কৰি নিজৰ জেপ গৰম কৰিছে । দুই এজন অসৎ শিক্ষকৰ বাবে বাৰে বাৰে লজ্জানত, অপমানিত হয় শিক্ষক সমাজ । এনে এক ঘটনা সংঘটিত হৈছে বকো হাই স্কুলত । বিদ্যালয় পৰিদৰ্শকৰ অধীনৰ ১৯৪৯ত স্থাপন কৰা এখন অগ্ৰণী শিক্ষানুষ্ঠান বকো হাই স্কুলৰ প্ৰধান শিক্ষক প্ৰদীপ বৰ্মনে মধ্যাহ্ন ভোজনৰ প্ৰায় ছয় লাখ টকা কৌশলৰে সৰকাইছে । এই ঘটনাই হতচকিত কৰি তুলিছে বকোৰ সচেতন মহলক ।
বৃহত্তৰ বকো অঞ্চলক জ্ঞানৰ গৰিমাৰে পোহৰাই তোলা হীৰকজয়ন্তী বৰ্ষ উদযাপন কৰিবলৈ প্ৰস্তুতি চলোৱা বহুজনৰ বিদ্যা মন্দিৰ বকো হাইস্কুলৰ ঐতিহ্যত কালিমা সানিলে প্ৰধান শিক্ষকগৰাকীয়ে । শিক্ষক সমাজক কলংকিত কৰা এক অধ্যায় পোহৰলৈ আহিছে । ইতিমধ্যে ঘটনা সন্দৰ্ভত বকো আৰক্ষী থানাত প্ৰধান শিক্ষক প্ৰদীপ বৰ্মনৰ বিৰুদ্ধে গোচৰ তৰা হৈছে ।
একেদৰে আজি দক্ষিণ পশ্চিম কামৰূপ ছাত্ৰ সন্থাই ঘটনা সন্দৰ্ভত বকো ৰাজহ চক্ৰ বিষয়াৰ জৰিয়তে উপায়ুক্তলৈ স্মাৰক পত্ৰ প্ৰেৰণ কৰিছে । ইফালে, সমগ্ৰ কাৰচাজি ফাদিল হোৱাত প্ৰধান শিক্ষকৰ নিৰ্লজভাৱে সংবাদ মাধ্যমৰ আগত স্বীকাৰোক্তি দিলে পুনৰ বিদ্যালয়ৰ একাউণ্টত জমা কৰা হ’ব ধনৰাশি ।
ইতিমধ্যে বিদ্যালয় পৰিচালনা সমিতি আৰু বিদ্যালয়ৰ একাংশ শিক্ষকে ঘটনা সন্দৰ্ভত লিখিত অভিযোগ দাখিল কৰিছে বিদ্যালয় পৰিদৰ্শকৰ কাৰ্যালয়ত । পৱিত্ৰ শিক্ষা বৃত্তিত জড়িত একাংশ শিক্ষকৰ বাবে বাৰে বাৰে লজ্জানত, অপমানিত হয় শিক্ষক সমাজ ।
পৰিচালনা সমিতিক অন্ধকাৰত ৰাখি পাঁচ লাখ ৭০ হেজাৰ টকা উইথড্ৰ’ কৰিছিল । বিদ্যালয়ৰ পিএনবি একাউণ্টৰ পৰা উইথড্ৰ’ কৰা হৈছিল ধনৰাশি । ৪৮ বেগ মধ্যাহ্ন ভোজনৰ চাউল বিতৰ্কতো জড়িত প্ৰধান শিক্ষক প্ৰদীপ বৰ্মন । সমগ্ৰ ঘটনা আইএছক অৱগত কৰা হৈছে । বকোৰ সৰ্বত্ৰে প্ৰধান শিক্ষকৰ কাণ্ডক লৈ চৰ্চা চলিছে ।
ধনৰ লালসাত এইজন প্ৰধান শিক্ষক প্ৰদীপ বৰ্মনে ছাত্ৰ-ছাত্ৰীৰ মধ্যাহ্ন ভোজনৰ পাঁচ লাখ ৭০ হেজাৰ টকা কৌশলৰে সৰকাইছে । বিদ্যালয় পৰিচালনা সমিতিক অন্ধকাৰত ৰাখি, পৰিচালনা সমিতিৰ সভাপতি ফণী চৌধুৰীৰ পৰা প্ৰৱঞ্চনাৰে চহী লৈ বেংকৰ পৰা উলিয়াই পাঁচ লাখ ৭০ হেজাৰ টকা । ৭০ হেজাৰ টকা প্ৰয়োজন দেখুৱাই চাৰিখন চেকত চহী লয় প্ৰধান শিক্ষক প্ৰদীপ বৰ্মনে । তাৰ পাছত বিদ্যালয়ৰ নামত থকা পঞ্জাৱ নেচনেল বেংক বকোৰ পৰা উইথড্ৰ’ কৰে বিদ্যালয়ৰ মধ্যাহ্ন ভোজনৰ ধন । ১৫ জুলাইত উলিয়াই দুই লাখ টকা । ২২ জুলাইত দুই লাখ টকা । ২৭ জুলাইত এক লাখ আৰু ৩০ জুলাইত ৭০ হেজাৰ টকা উইথড্ৰ’ কৰে ।
বকো হাইস্কুলৰ প্ৰধান শিক্ষক প্ৰদীপ বৰ্মনৰ মধ্যাহ্ন ভোজনৰ ধন আত্মসাৎ সন্দৰ্ভত আজি দক্ষিণ পশ্চিম কামৰূপ ছাত্ৰ সন্থাই স্মাৰকপত্ৰ দাখিল কৰে । বকোৰ চক্ৰ বিষয়াৰ জৰিয়তে উপায়ুক্তলৈ স্মাৰকপত্ৰ প্ৰেৰণ কৰা হৈছে । স্মাৰকপত্ৰৰ জৰিয়তে দোষীৰ বিৰুদ্ধে উপযুক্ত ব্যৱস্থা গ্ৰহণৰ দাবী জনাইছে দক্ষিণ পশ্চিম কামৰূপ ছাত্ৰ সন্থাৰ সভাপতি মানস প্ৰতিমা শৰ্মা আৰু সম্পাদক অজিত আলীয়ে । বিদ্যালয়ৰ মধ্যাহ্ন ভোজনৰ পাঁচ লাখ ৭০ হেজাৰ টকা আত্মসাতৰ অভিসন্ধিৰে পৰিচালনা সমিতিৰ সভাপতি ফনিন্দ্ৰ চৌধুৰী আৰু বিদ্যালয়ৰ প্ৰধান শিক্ষক প্ৰদীপ বৰ্মনে বেংকৰ পৰা উলিয়ায় । বিদ্যালয় পৰিচালনা সমিতিক সম্পূৰ্ণ অন্ধকাৰত ৰাখি বেংকৰ টকা উলিওৱা বিষয়টো নীতি বিৰুদ্ধ কাম বুলি বিবেচনা কৰি বিষয়টো বিভাগীয়ভাৱে তদন্ত কৰি দোষীক উপযুক্ত শাস্তি প্ৰদান কৰিবলৈ দাবী উত্থাপন কৰে ।
একেদৰে, পৰিচালনা সমিতিৰ অনুমোদন অবিহনে উইথড্ৰ’ কৰি আত্মসাতৰ অভিসন্ধি সন্দৰ্ভত প্ৰধান শিক্ষকগৰাকীৰ বিৰুদ্ধে বকো থানাত এজাহাৰ দাখিল কৰা হৈছে । দোষীৰ বিৰুদ্ধে আইনী ব্যৱস্থা গ্ৰহণৰ বাবে এজাহাৰ দাখিল কৰিছে বকো হাইস্কুলৰ প্ৰাক্তন ছাত্ৰ দীপক কুমাৰ ৰাভাই । ঘটনাক কেন্দ্ৰ কৰি বৌদ্ধিক মহলত চৰ্চা অব্যাহত ।
ইতিমধ্যে বিদ্যালয় পৰিচালনা সমিতি আৰু বিদ্যালয়ৰ একাংশ শিক্ষকে ঘটনা সন্দৰ্ভত লিখিত অভিযোগ দাখিল কৰিছে বিদ্যালয় পৰিদৰ্শকৰ কাৰ্যালয়ত । পৱিত্ৰ শিক্ষা বৃত্তিত জড়িত একাংশ শিক্ষকৰ বাবে বাৰে বাৰে লজ্জানত, অপমানিত হয় শিক্ষক সমাজ । এনে শিক্ষকৰ বিৰুদ্ধে কি ব্যৱস্থা গ্ৰহণ কৰে সেয়া লক্ষণীয় হ’ব ।
