✒️অসমত জল জীৱন মিছনৰ চূড়ান্ত ব্যর্থতাক উদঙালে কেন্দ্ৰীয় পৰ্যবেক্ষকৰ দলে। কেন্দ্ৰীয় চৰকাৰৰ ধ্বজাবাহী আঁচনিখনৰ ৰূপায়ণ হোৱা কাম-কাজৰ মান পৰীক্ষাৰ বাবে বিগত বর্ষত যি বিশেষজ্ঞ প্রতিনিধি দল অসমলৈ আহিছিল তেওঁলোকৰ তথ্যতে অসম আঁচনিখন ৰূপায়ণত সম্পূৰ্ণৰূপে ব্যর্থ হোৱাটো প্ৰতিপন্ন হৈছে।
ৰাজ্যৰ জনস্বাস্থ্য কাৰিকৰী বিভাগ তথা জল জীৱন আঁচনি ৰূপায়ণৰ শীৰ্ষ সূত্ৰই সদৰী কৰে যে কে’বাটাও গোটত ভাগ ভাগ হৈ কেন্দ্রীয় পর্যবেক্ষকৰ দলে অসমৰ মুঠ ৪৪০ টা প্রকল্প পৰিদৰ্শন তথা পর্যবেক্ষণ কৰে। এই পর্যবেক্ষণৰ জৰিয়তে তেওঁলোকে নির্দিষ্ট প্রকল্পকেইটাক মানৰ ৰেটিং দিয়ে।
এই ৰেটিঙত মাত্র ৩১ টা প্রকল্পইহে আটাইতকৈ ভাল কাম হোৱা বুলি পাঁচটা তৰা চিহ্ন লাভ কৰিবলৈ সক্ষম হয়। আনহাতে, ২৫ টা প্রকল্পই চাৰিটা তৰা চিহ্ন পায়। ১১৮ টা প্রকল্পই তিনিটা তৰা চিহ্ন পায়। ইয়াৰ বাদে বাকী সকলো প্ৰকল্পই দুটা আৰু এটা তৰা চিহ্ন পায়।
ৰেটিঙৰ এই তথ্যয়েই ৰাজ্যত জল জীৱন আঁচনিখনৰ পয়ালগা ৰূপ উদঙাই দিছে। উল্লেখ্য যে নৰেন্দ্ৰ মোদী নেতৃত্বাধীন চৰকাৰৰ দ্বাৰা ৰূপায়ণ কৰা ধ্বজাবাহী আঁচনিবোৰ অসমত ৰূপায়ণত আটাইতকৈ ব্যর্থ হোৱা বুলি জল জীৱনৰ নামেই প্রথমে উচ্চাৰিত হয়।
অসম চৰকাৰে বলপূর্বকভাবেহে আঁচনিখনৰ সফলতা দাবী কৰি আহিছে। কমিছনভোগীৰ দৌৰাত্ম্যত আঁচনিখনক লৈ সংঘটিত কেলেংকাৰিৰ অন্ত নাই। ইয়াৰ পৰিপ্ৰেক্ষিতত অসমক আন চাৰিখন ৰাজ্যৰ লগত জলশক্তি মন্ত্রণালয়ে বিশেষভাৱে সতর্ক কৰি দিবলৈও বাধ্য হৈছে।
উল্লেখ্য যে দেশৰ গ্ৰামাঞ্চলৰ জনসাধাৰণক বিশুদ্ধ খোৱা পানী যোগানৰ লক্ষ্যৰে কেন্দ্ৰীয় চৰকাৰে ২০১৯-২০ত গ্ৰহণ কৰা আঁচনিখন সম্পূৰ্ণ কৰাৰ লক্ষ্য লোৱা হৈছিল ২০২৩-২৪ত।
কিন্তু অসমসহ কেইখনমান ৰাজ্যত আঁচনিখনৰ অগ্রগতি একেবাৰে লেহেমীয়া। তদুপৰি আঁচনি ৰূপায়ণত বৃহৎ কেলেংকাৰিৰ অভিযোগো কেন্দ্রই লাভ কৰাত বিশেষজ্ঞ দলৰ জৰিয়তে নমুনাভিত্তিত আঁচনিবোৰ পৰীক্ষাৰ সিদ্ধান্ত জলশক্তি মন্ত্রণালয়ে গ্রহণ কৰে।
তাৰ বাবে ৰূপায়ণ হৈ থকা প্ৰকল্পবোৰৰ কামো অনির্দিষ্ট কালৰ বাবে স্থগিত ৰখা হয়। বিগত বর্ষত এই পদক্ষেপ গ্রহণ কৰাৰ পাছতে জলশক্তি মন্ত্রণালয়ে প্ৰেৰণ কৰা বিশেষজ্ঞ প্রতিনিধি দলে ৰাজ্যৰ সকলো জিলালৈ গৈ নমুনাভিত্তিত ৪৪০ টা প্রকল্প পৰ্যবেক্ষণ কৰে।
এই পর্যবেক্ষণত স্পষ্ট হোৱা ফলাফলত অসম আঁচনিখন ৰূপায়ণত ব্যর্থ হোৱাটো প্রকাশ্য হৈ পৰিছে। অসম চৰকাৰৰ বিভাগীয় সূত্রই সদৰী কৰে যে ব্যৰ্থতা স্পষ্ট হোৱাৰ বাবেই হয়তো পর্যবেক্ষণৰ বাবে কাম স্থগিত ৰখা নির্দেশনাটো অদ্যাপি বাহাল ৰখা হৈছে।
অসমৰ লগতে দেশৰ মুষ্টিমেয় কেইখনমান ৰাজ্যতো একেধৰণৰ ব্যৰ্থতা ধৰা পৰিছে। বিশেষকৈ অসমসহ পাঁচখন ৰাজ্যৰ ব্যৰ্থতা গুৰুতৰ ৰূপত ধৰা পৰিছে।
অসমৰ জল জীৱন মিছনৰ সূত্ৰত প্রকাশ যে আঁচনিখনৰ ব্যৰ্থতা জিলাই জিলাই ধৰা পৰিছে। বিশেষজ্ঞ দলৰ তথ্যত যিবোৰ দুৰ্বলতা স্পষ্ট হৈছে সেইবোৰৰ মূল কথা হ’ল কমিছনৰাজ।
আঁচনি আবণ্টন পৰ্যায়ৰ পৰাই কমিছনৰাজ দৌৰাত্ম্য এনেদৰে চলে যে তাৰ পৰিণাম আঁচনি এখন ৰূপায়ণত প্রতিফলিত হয়। কেলেংকাৰি এডাল মালাৰ দৰে একেবাৰে শীৰ্ষ পৰ্যায়ৰ পৰা ঠিকাদাৰলৈকে বিস্তৃত হৈ আছে।
সূত্ৰত প্রকাশ যে আঁচনি এখনৰ বিস্তৃত প্রকল্প প্রতিবেদনত চৰকাৰে ধাৰ্য কৰি দিয়া ব্যৱস্থাবোৰেই থাকে, তাক ৰূপায়ণতহে আপোচ কৰা হয়। সেইকাৰণে পৰ্যবেক্ষকৰ দল যোৱা প্ৰতিখন জিলাত ধৰা পৰিছে প্ৰকল্পৰ নিৰ্মাণ বিসংগতি।
দৰঙৰ কে’বাটাও প্রকল্পত দুর্বল কাম হোৱা বুলি কোৱা হৈছে। বৰাকৰ জিলাকেইখনৰ কামো সন্তোষজনক নহয় বুলি মন্তব্য কৰা হৈছে। ধুবুৰী, বঙাইগাঁৱৰ পৰা আৰম্ভ কৰি পাহাৰীয়া জিলা কাৰ্বি আংলঙলৈকে নিৰ্মাণ বিসংগতি ধৰা পৰিছে।
সূত্ৰটোৱে সদৰী কৰে যে অধিকাংশ প্রকল্পৰে নলীবোৰ নিৰ্ধাৰিত মানৰ নহয়। মাটিৰ তলত কেনে মানৰ নলী সংস্থাপিত কৰা হৈছে সেইবোৰ সাধাৰণ ৰাইজৰ চকুত নপৰে। তদুপৰি স্বাভাৱিকভাৱে সাধাৰণ ৰাইজ সেই বিষয়ে জ্ঞাতও নহয়।
ফলস্বৰূপে পানী নলীৰে বৈ যোৱাৰ পূৰ্বেই বহু প্রকল্প অর্থহীন হৈ পৰিছে। আকৌ কোনোবাটো প্রকল্পত পানী যোগান আৰম্ভহ’লেও কেইদিনমান পাছতে বিকল হৈ মাহৰ পাছত মাহ পৰি ৰৈছে।