Assam:✒️দেশ প্রথম, দল দ্বিতীয় আৰু ব্যক্তি তৃতীয় ধ্বনি দিয়া নৰেন্দ্ৰ মোদী নেতৃত্বাধীন কেন্দ্ৰৰ বিজেপি চৰকাৰে নাগৰিকত্বৰ দৰে অতি গুৰুত্বপূৰ্ণ আৰু স্পৰ্শকাতৰ বিষয়তো ল’ৰা-ধেমালি আৰম্ভ কৰিলে নেকি?
বিৰোধীয়ে আশংকা কৰি অহাৰ দৰে বহু বিতর্কিত নাগৰিকত্ব (সংশোধনী) আইন (কা)ৰ সময়সীমা বৃদ্ধি কৰি চুবুৰীয়া বাংলাদেশ, পাকিস্তান আৰু আফগানিস্তানৰ ছয় ধর্মীয় সংখ্যালঘু লোকক নাগৰিকত্ব প্রদান কৰিবলৈও মোদী চৰকাৰে যে কুষ্ঠবোধ নকৰিব, তাৰ ইংগিত সম্প্রতি স্পষ্ট হৈছে।
অসম আৰু পশ্চিমবংগৰ বিধানসভা নিৰ্বাচনৰ আগে আগে মোদী চৰকাৰে গ্রহণ কৰা এই সংক্রান্তীয় এক স্থিতিয়ে তুমুল প্রতিক্রিয়াৰ সৃষ্টি কৰিছে। উল্লেখ্য যে মোদী চৰকাৰে অনা নাগৰিকত্ব (সংশোধনী) আইনৰ জৰিয়তে ২০১৪ৰ ৩১ ডিচেম্বৰলৈকে ভাৰতলৈ অহা পাকিস্তান, বাংলাদেশ আৰু আফগানিস্তানৰ হিন্দুকে ধৰি অমুছলমান ছয় ধৰ্মাৱলম্বী লোকক ভাৰতীয় নাগৰিকত্ব প্রদানৰ ব্যবস্থা কৰা হৈছে।
সম্প্ৰতি চৰকাৰে উক্ত সময়সীমা ২০১৪ৰ ডিচেম্বৰৰ পৰা ২০২৪ৰ ডিচেম্বৰলৈ ১০ বছৰ বৃদ্ধিৰ কৌশল অবলম্বন কৰাৰ আভাস স্পষ্ট হৈছে। ইয়াকে কৰিবলৈ চৰকাৰে চলিত বৰ্ষৰ এপ্ৰিলৰ পৰা বলবৎ হোৱা প্রব্রজন আৰু বিদেশী আইন-২০২৫ৰ ১৩ নম্বৰ ধাৰাৰ আশ্রয় লৈছে।
উক্ত আইনৰ অধীনত কেন্দ্রীয় গৃহ মন্ত্রণালয়ে শেহতীয়াকৈ প্রকাশ কৰা এক বাজপত্র ঘোষণাত কোৱা হৈছে যে ২০২৪ৰ ৩১ ডিচেম্বৰলৈকে বৈধভাবে হওক বা অবৈধভাৱে হওক ভাৰতলৈ অহা হিন্দু, শিখ, বৌদ্ধ, জৈন, পার্চি আৰু খ্রীষ্টান এই ছয় ধৰ্মাৱলম্বী লোকে ভাৰতত শৰণাৰ্থীৰূপে থাকিব পাৰিব।
বৈধভাবে অহাসকলৰ ভিছাৰ ম্যাদ উকলিলেও তেওঁলোকক দেশৰ পৰা বহিষ্কাৰ কৰা নহ’ব। এই সংক্রান্তীয় কেন্দ্রীয় গৃহ মন্ত্রণালয়ৰ উক্ত জাননীত কোৱা হয়, ধর্মীয় নিৰ্যাতনৰ ভুক্তভোগী হোৱাৰ বাবে বা ধর্মীয় উৎপীড়নৰ ভয়ত ২০২৪ৰ ৩১ ডিচেম্বৰ বা তাৰ পূর্বে পাৰপত্ৰ বা আন ভ্রমণ নথি অবিহনে আফগানিস্তান, বাংলাদেশ আৰু পাকিস্তানৰ পৰা ভাৰতত আশ্রয় লোৱা হিন্দু, শিখ, বৌদ্ধ, জৈন, পার্চি আৰু খ্রীষ্টান লোকসকলে ভাৰতত থাকিব পাৰিব।
একেদৰে এই তিনি চুবুৰীয়া দেশৰ পৰা ধৰ্মীয় উৎপীড়নৰ ভুক্তভোগী হৈ বা ধর্মীয় উৎপীড়নৰ ভয়ত পাৰপত্ৰ বা আন ভ্রমণ নথিসহ ভাৰতত আশ্রয় লোৱা উক্ত ছটা ধৰ্মাৱলম্বী লোকৰ যিসকলৰ নথিপত্ৰৰ ম্যাদ উকলিছে সেইসকলেও ভাৰতত থাকিব পাৰিব।’
গতিকে চুবুৰীয়া তিনি দেশৰ পৰা যোৱা বছৰৰ ৩১ ডিচেম্বৰলৈকে অহা উক্ত ছটা ধর্মাবলম্বী লোকক নাগৰিকত্ব প্ৰদানৰ দিশত মোদী চৰকাৰে এখোজ আগুৱালে বুলি চর্চা হৈছে।
লক্ষ্যণীয় যে ‘কা’ বিৰোধী আন্দোলনকাৰীসকলে অভিযোগ উত্থাপন কৰিছিল যে পাকিস্তানী, বাংলাদেশী আৰু আফগানী ধর্মীয় সংখ্যালঘু লোকক নাগৰিকত্ব প্রদানৰ ক্ষেত্ৰত ‘কা’ত যি সময়সীমা উল্লেখ আছে সেই সময়সীমা পৰৱৰ্তী সময়ত বৃদ্ধি পোৱাৰ আশংকা আছে।
কেন্দ্রীয় গৃহ মন্ত্রণালয়ৰ শেহতীয়া এই জাননীত ‘কা’ৰ কথা ঘুণাক্ষৰেও উল্লেখ নাই যদিও ইয়াৰ অধীনত এই চুবুৰীয়া তিনি দেশৰ ধৰ্মীয় সংখ্যালঘু লোকক (২০২৪ৰ ডিচেম্বৰলৈকে অহা) নাগৰিকত্ব প্ৰদানৰ দিশত মোদী চৰকাৰে এটা খোজ আগবঢ়ালে বুলি ব্যাপক চর্চা হৈছে।
২০২৪ৰ ৩১ ডিচেম্বৰলৈ অহা ছয় ধৰ্মাৱলম্বী বিদেশীয়ে ভাৰতীয় নাগৰিকত্ব পাবনে?
মোদী চৰকাৰে প্ৰব্ৰজন আৰু বিদেশী আইনৰ অধীনত চুবুৰীয়া তিনি দেশৰ ধৰ্মীয় সংখ্যালঘু লোকৰ ভাৰতত আশ্রয় গ্রহণ সম্পর্কীয় এই জাননী জাৰি কৰাত এই লোকসকলে ভাৰতীয় নাগৰিকত্ব পাব নেকি বুলি ব্যাপক চর্চা হৈছে।
একাংশৰ মতে, এইসকলে নাগৰিকত্ব বিচাৰি ‘কা’ৰ অধীনত আবেদন জনাব পাৰিব। অৱশ্যে ইয়াৰ বাবে নাগৰিকত্ব (সংশোধনী) আইনৰ সামান্য সংশোধন ঘটাব লাগিব। বর্তমানলৈ মোদী চৰকাৰে আইনখনৰ নতুন সংশোধনী অনা নাই। লক্ষ্যণীয় যে কেন্দ্রীয় গৃহ মন্ত্রণালয়ে শেহতীয়া জাননী নাগৰিকত্ব (সংশোধনী) আইনৰ অধীনত জাৰি কৰা নাই।
তাৰ পৰিৱৰ্তে চৰকাৰে প্রব্রজন আৰু বিদেশী আইন ২০২৫ৰ আশ্রয় লৈছে। এই আইনৰ অধীনত ভাৰতত থাকিবলৈ সুবিধা পোৱাসকলে নাগৰিকত্ব বিচাৰি ‘কা’ৰ অধীনত আবেদন জনোৱাৰ সুযোগ পোৱাৰ সম্ভাৱনা আছে। অৱশ্যে তেওঁলোকৰ নাগৰিকত্বৰ আবেদন মঞ্জুৰ কৰিবলৈ হ’লে ‘কা’ৰ সংশোধনীৰ প্রয়োজন হ’ব।
গতিকে এই ক্ষেত্রত সংসদৰ ভূমিকা আছে। এনে অৱস্থাত একাংশই চৰ্চা কৰিছে যে সংসদৰ আগন্তুক শীতকালীন অধিবেশনত চৰকাৰে ‘কা’ৰ সংশোধনী অনাৰ সম্ভাৱনা আছে। অৱশ্যে এই ক্ষেত্ৰত চৰকাৰে কি পদক্ষেপ লৈছে সেয়া স্পষ্ট হোৱা নাই।
তৎসত্ত্বেও একাংশই প্রতিক্রিয়া প্রকাশ কৰিছে যে কেন্দ্ৰীয় গৃহ মন্ত্রণালয়ৰ শেহতীয়া এই জাননী হৈছে ২০২৪ৰ ৩১ ডিচেম্বৰলৈ ভাৰতলৈ অহা আফগানী, পাকিস্তানী আৰু বাংলাদেশী ধর্মীয় সংখ্যালঘু লোকক ভাৰতীয় নাগৰিকত্ব প্ৰদানৰ প্ৰথমটো খোজ।
কাৰণ এইসকলক ভাৰতত থকাৰ অনুমতি বা অধিকাৰ প্ৰদান কৰা হৈছে। এই ক্ষেত্ৰত বৈধ বা অবৈধৰ বিচাৰ কৰা নহ’ব।
কেন্দ্ৰক প্ৰচুৰ ক্ষমতা প্রদান কৰিছে প্ৰব্ৰজন আৰু বিদেশী আইনে
প্রব্রজন আৰু বিদেশী আইন ২০২৫ কাৰ্যকৰী হৈছে চলিত বৰ্ষৰ চাৰি এপ্ৰিলৰ পৰা। এই আইনে কেন্দ্ৰীয় চৰকাৰক প্ৰচুৰ ক্ষমতা প্রদান কৰিছে। আইনখনৰ উদ্দেশ্যও জলজল পটপট। কোন কোন বিদেশী ভাৰতলৈ আহিব পাৰিব, কেনেদৰে আহিব পাৰিব আৰু কি নথি থাকিলে ভাৰতত থাকিব পাৰিব সেয়া উক্ত আইনত পুংখানুপুংখভাবে উল্লেখ আছে।
ইয়াৰ সমান্তৰালভাৱে ভাৰত চৰকাৰৰ হাতত বিদেশী সম্পর্কীয় কি কি ক্ষমতা থাকিব সেই কথাও স্পষ্টভাবে উল্লেখ আছে। এই আইনত কোৱা হৈছে যে বৈধ পাৰপত্ৰ আৰু ভিছা অবিহনে কোনেও ভাৰতত প্ৰৱেশ কৰিব নোৱাৰিব।
আইনখনৰ ৩৩ নম্বৰ ধাৰাই চৰকাৰক প্ৰভূত ক্ষমতা প্রদান কৰিছে। এই ধাৰাত কোৱা হৈছে, পৰিস্থিতি বিচাৰ কৰি ৰাজপত্র জাননীৰ জৰিয়তে কেন্দ্ৰীয় চৰকাৰে প্ৰয়োজনত বিদেশী সম্পর্কীয় কথা সালসলনি কৰিব পাৰিব। পৰিস্থিতি সাপেক্ষে ‘ব্যতিক্রম’ও নির্ধাৰণ কৰিব পাৰে চৰকাৰে।
অর্থাৎ স্বদেশত ধর্মীয় উৎপীড়নৰ ভুক্তভোগী হৈ অথবা ধর্মীয় নির্যাতনৰ ভয়ত ২০২৪ৰ ৩১ ডিচেম্বৰলৈ ভাৰতত আশ্রয় লোৱা পাকিস্তানী, বাংলাদেশী আৰু আফগানী ছয় ধর্মীয় সংখ্যালঘু লোকক সম্প্রতি চৰকাৰে শৰণাৰ্থীৰ মৰ্যাদা প্রদানৰ জাননী জাৰি কৰিলে। ইয়াৰ আগলৈ চৰকাৰে ‘কা’ৰ ক্ষেত্ৰতহে ধর্মীয় উৎপীড়নৰ কথা উল্লেখ কৰিছিল।
‘কা’ৰ অধীনত গোচৰ মীমাংসা নোহোৱা লোকৰ নামো থাকিব ভোটাৰ তালিকাত!
প্রব্রজন আৰু বিদেশী আইন ২০২৫ৰ অধীনত কেন্দ্রীয় গৃহ মন্ত্রণালয়ে জাৰি কৰা শেহতীয়া এই জাননীয়ে আন এটা দিশতো তাৎপর্য বহন কৰিছে। উল্লেখ্য যে কিছুদিন পূর্বে দেশৰ নিৰ্বাচন আয়োগে প্রকাশ কৰে যে ‘কা’ৰ অধীনত নাগৰিকত্ব বিচাৰি যিসকলে আবেদন কৰিছে তেওঁলোকৰ আবেদনৰ মীমাংসা হওক বা নহওক আবেদনকাৰীসকলৰ নাম ভোটাৰ তালিকাৰ পৰা বাদ নপৰে।
যদি কেন্দ্ৰৰ শেহতীয়া এই নির্দেশনামর্মে ভাৰতত থাকিবলৈ সুবিধা পোৱা কোনো লোকে ‘কা’ৰ অধীনত নাগৰিকত্ব বিচাৰি আবেদন জনায়, তেন্তে তেওঁলোকৰো নাম ভোটাৰ তালিকাত অন্তর্ভুক্ত হ’ব নেকি? এই প্রশ্ন বহুতৰ মনত উদ্ভৱ হৈছে।
অসমৰ অধিকাংশ সন্দেহজনক ভোটাৰেই হিন্দু বাঙালী!
একাংশই চৰ্চা কৰিছে যে অসমৰ ভোটাৰ তালিকাত থকা ‘সন্দেহজনক ভোটাৰ (ডি-ভোটাৰ) ৰ অধিকাংশই হৈছে হিন্দু বাঙালী। এনে অৱস্থাতে কেন্দ্ৰই জাৰি কৰা এই জাননীয়ে বিজেপিৰ শিবিৰক উৎফুল্লিত কৰিছে। এই জাননী জাৰিৰ বাবে পশ্চিমবংগৰ দুই জ্যেষ্ঠ বিজেপি নেতা সুকান্ত মজুমদাৰ আৰু শান্তনু ঠাকুৰে প্রধানমন্ত্রী মোদী আৰু কেন্দ্রীয় গৃহ মন্ত্রী শ্বাহক ধন্যবাদ জনাইছে।
ইয়াৰ বিপৰীতে বিৰোধী শিবিৰ এই জাননীৰ বিৰুদ্ধে সৰৱ হৈছে। তৃণমূল কংগ্ৰেছৰ নেতা কুনাল ঘোষে কয়, ‘চিএএ, এনআৰচি, এছআইআৰ এই সকলো একাকাৰ কৰি বিজেপিয়ে দৰাচলতে মানুহক বিভ্রান্ত কৰিছে। এই কৌশল সফল নহয়।’