Uttar Pradesh:✒️যোগী ৰাজ্যত আৰক্ষীৰ লাঠিচাৰ্জত বিজেপি কৰ্মীৰ মৃত্যুৰ অভিযোগ। ঘটনাটোত ১১ জন আৰক্ষী জোৱানক শাস্তি প্ৰদান কৰে আদিত্যনাথ প্ৰশাসনে।
নিলম্বন কৰা হৈছে ছজন আৰক্ষী জোৱানক। বাকী পাঁচজনক জিলা আৰক্ষী লাইনলৈ প্ৰেৰণ কৰা হৈছে।জিলা আৰক্ষীৰ শীৰ্ষ বিষয়াগৰাকীয়ে জিলা দণ্ডাধীশক যাৱতীয় ব্যৱস্থা গ্ৰহণ কৰিবলৈ কয়।
আৰক্ষী সূত্ৰই জনোৱা মতে, নিহত বিজেপি কৰ্মীজন ছিয়াৰম উপাধ্যায় ওৰফে জাকু উপাধ্যায় বুলি চিনাক্ত কৰা হৈছে। তেওঁৰ বয়স ৩৫ বছৰ। তেওঁ অঞ্চলটোৰ বিজেপি কৰ্মী হিচাপে পৰিচিত।
মঙলবাৰে গাজীপুৰ আৰক্ষী জিলাৰ অন্তৰ্গত ননহাৰা অঞ্চলৰ স্থানীয় ৰাইজে বিদ্যুৎ বিচ্ছিন্নতা আৰু প’ল স্থাপনক লৈ থানাত প্ৰতিবাদ সাব্যস্ত কৰে। দলটোৰ ভিতৰত আছিল ছিয়াৰম।সেই বিক্ষোভ হঠাতে হিংসাত্মক ৰূপ ধাৰণ কৰে।
পৰিস্থিতি নিয়ন্ত্ৰণলৈ আনিবলৈ আৰক্ষীয়ে প্ৰতিবাদকাৰী ৰাইজক লাথিচাৰ্জ কৰাৰ অভিযোগ উত্থাপন হয়। এই পৰিস্থিতিত গুৰুতৰভাৱে আহত হয় এজন বিজেপি কৰ্মী।পাছত তেওঁক উদ্ধাৰ কৰি চিকিৎসালয়লৈ লৈ যোৱা হয় আৰু তাতেই তেওঁৰ মৃত্যু হয়।
মৃত বিজেপি কৰ্মীজনৰ পৰিয়ালে অভিযোগ কৰা মতে, আৰক্ষীয়ে ছিয়াৰামক পথত পেলাই তীব্ৰ প্ৰহাৰ কৰাৰ ফলত বিজেপি কৰ্মীজনৰ মৃত্যু হয়। ঘটনাৰ লগত জড়িত আৰক্ষীক শাস্তি প্ৰদানৰ দাবী জনাইছে ।
অৱশ্যে আৰক্ষীৰ বিৰুদ্ধে উত্থাপিত অভিযোগ অস্বীকাৰ কৰে আৰক্ষী অধীক্ষক ইৰাজ ৰাজাই।এটা ভিডিঅ’ বিবৃতিত তেওঁ জনাই যে বিদ্যুৎ বিচ্ছিন্ন হোৱাৰ বাবে স্থানীয় লোকে থানাত প্ৰতিবাদ সাব্যস্ত কৰিছিল।
কিন্তু সেইদিনা অৰ্থাৎ ন ছেপ্টেম্বৰত লাঠিচাৰ্জ হোৱা নাছিল।তেওঁ লগতে কয় যে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে। ঘটনা সন্দৰ্ভত তদন্ত আৰম্ভ কৰা হৈছে। কুনুলো দোষী সাব্যস্ত হ’লে ব্যৱস্থা গ্ৰহণ কৰা হ’ব।