ভাৰতৰ প্ৰযুক্তি আৰু উদ্যোগ খণ্ডত আজি সংযোজিত হ’ল এক ঐতিহাসিক অধ্যায়। প্ৰধানমন্ত্ৰী নৰেন্দ্ৰ মোদীয়ে উত্তৰ প্ৰদেশৰ গ্ৰেটাৰ নয়েডাৰ ইয়ামুনা চিটিত উত্তৰ ভাৰতৰ প্ৰথম ছেমিকণ্ডক্টৰ উৎপাদন ইউনিটৰ ভিত্তি স্থাপন কৰিলে। এই বৃহৎ প্ৰকল্পটো হৈছে এইচচিএল আৰু Foxconn ৰ যৌথ উদ্যোগ।
এই ছেমিকণ্ডক্টৰ ইউনিটত ইলেক্ট্ৰনিক চিপৰ সংযোজন আৰু পৰীক্ষণ (OSAT) কাৰ্য সম্পন্ন কৰা হ’ব। মোবাইল ফোন, লেপটপ, অটোমোবাইল, টেলিকম আৰু কনজিউমাৰ ইলেক্ট্ৰনিক্স খণ্ডত ব্যৱহৃত অত্যাধুনিক চিপ উৎপাদনৰ ক্ষেত্ৰত এই প্ৰকল্পে বিশেষ ভূমিকা পালন কৰিব বুলি আশা কৰা হৈছে।
প্ৰধানমন্ত্ৰীয়ে ভাষণত কয় যে, ভাৰতক বিশ্বমানৰ ছেমিকণ্ডক্টৰ উৎপাদন কেন্দ্ৰ হিচাপে গঢ়ি তোলাৰ দিশত এই পদক্ষেপ এক গুৰুত্বপূৰ্ণ মাইলফলক। ‘মেক ইন ইণ্ডিয়া’ আৰু ‘আত্মনির্ভৰ ভাৰত’ অভিযানে এতিয়া বাস্তৱ ৰূপ ল’বলৈ আৰম্ভ কৰিছে বুলি তেওঁ মন্তব্য কৰে।
এই প্ৰকল্পৰ জৰিয়তে হেজাৰ হেজাৰ প্ৰত্যক্ষ আৰু পৰোক্ষ চাকৰিৰ সুযোগ সৃষ্টি হ’ব। লগতে স্থানীয় উদ্যোগ, শিক্ষা-প্ৰতিষ্ঠান আৰু দক্ষতা উন্নয়ন কাৰ্যসূচীৰ লগতো ইয়াৰ সংযোগ স্থাপন হ’ব।
বিশেষজ্ঞসকলৰ মতে, এই ইউনিট স্থাপন হ’লে আমদানি নিৰ্ভৰতা হ্ৰাস পোৱাৰ লগতে ভাৰতৰ ৰপ্তানি সম্ভাৱনাও বহুগুণে বৃদ্ধি পাব।
উল্লেখ্য যে, বিশ্বজুৰি চিপ সংকটৰ অভিজ্ঞতাৰ পাছত ভাৰত চৰকাৰে ছেমিকণ্ডক্টৰ খণ্ডত বৃহৎ বিনিয়োগ আৰু নীতি-সহায় আগবঢ়াই আহিছে।
উত্তৰ ভাৰতৰ এই প্ৰথম ছেমিকণ্ডক্টৰ ইউনিটে দেশৰ প্ৰযুক্তি বিপ্লৱত এক নতুন দিশ উন্মোচন কৰিলে বুলি ধৰা হৈছে।