CID Head quarter: চিআইডিৰ লকআপৰ নিশাৰ আলহী হোৱা শ্যামকানু, সিদ্ধার্থক মাৰাথন জেৰা এছআইটিৰ

অসমীয়াৰ হিয়াৰ আমঠু জুবিন গাৰ্গৰ ৰহস্যজনক মৃত্যুৰ মূল অভিযুক্ত শ্যামকানু মহন্ত আৰু সিদ্ধাৰ্থ শৰ্মাক চিআইডিৰ হেডকোৱাৰ্টাৰৰ লকআপত কালিৰে পৰা পৰা অব্যাহত আছে এছআইটিৰ মাৰাথন জেৰা । জেৰাত ওলাইছে ন ন তথ্য ৷ কামৰূপ মহানগৰৰ মুখ্য ন্যায়িক দণ্ডাধীশৰ আদালতে কালি ১৪ দিনৰ বাবে চিআইডিৰ জিন্মাত দিয়াৰ পিচত কালি দুই অভিযুক্তই পাৰ কৰিলে চিআইডিৰ লকআপত ৷

উল্লেখ্য যে ছিংগাপুৰত হাৰ্টথব জুবিন গাৰ্গৰ ৰহস্যজনক মৃত্যু ঘটনাৰ পিছৰে পৰা আত্মগোপন কৰি আছিল শ্যামকানু মহন্ত আৰু সিদ্ধাৰ্থ শৰ্মা৷ দুই অভিযুক্তৰ কৰায়ত্ত দাবীত ৰাজ্যজুৰি জুবিন অনুৰাগী সৰব হৈ আছিল ৷

অৱশেষত মঙলবাৰে দুপৰ নিশা দিল্লী ইন্দিৰা গান্ধী আন্তৰাষ্ট্ৰীয় বিমান বন্দৰৰ পৰা চিআইডিয়ে গ্ৰেপ্তাৰ কৰে শ্যামকানু মহন্ত ৷ মহন্ত নিশা ভাগত ছিংগাপুৰৰ পৰা আহি এয়াৰপৰ্টত উপস্থিত হৈছিল। আনহাতে সিদ্ধাৰ্থ শৰ্মাক গ্ৰেপ্তাৰ কৰে দিল্লী – হাৰিয়ানা সীমান্তৱৰ্তী গুৰগাঁৱৰ পৰা ৷

উল্লেখ্য যে বুধবাৰে পুৱাৰে পৰা বৰঝাৰৰ গোপীনাথ বৰদলৈ আন্তৰ্জাতিক বিমান বন্দৰত গঢ়ি তোলা হয় আৰক্ষী, অৰ্ধ সামৰিক বাহিনী আৰু ৰেপিড এক্সন ফ’ৰ্চৰ কটকটীয়া নিৰাপত্তা ৷ আটকাধীন শ্যামকানু আৰু সিদ্ধার্থকএখন বুলেটপ্ৰুফ বাহনত তুলি আৰক্ষীৰ দলে বৰঝাৰ বিমানবন্দৰৰ পৰা পোনে পোনে ৰাওনা হয় মহানগৰীৰ গীতা নগৰস্থিত কামৰূপৰ মুখ্য ন্যায়িক দণ্ডাধীশৰ বাসগৃহলৈ ৷

মনকৰিবলগীয়া যে দুৰ্গা পূজাৰ বাবে আদালত বন্ধ হোৱা হেতুকে চিজিএমৰ বাসগৃহলৈকে অনা হয় দুই অভিযুক্তক ৷