প্রতিদিনে কমেও দুবাৰ দাঁত ব্ৰাছ কৰাটো জৰুৰী বুলি আমি প্রায় সকলোৱেই জানো। বহুতেই দিনতে দুবাৰকৈ দাঁত ব্ৰাছ কৰে আৰু শিশুকো দাঁতৰ যত্ন ল’বলৈ শিকায়। তৎসত্ত্বেও বিভিন্ন কাৰণত দাঁত আৰু দাঁতৰ আলুত বেক্টেৰিয়াৰ সংক্ৰমণৰ বাবে অকালতে দাঁতৰ ক্ষয়, দাঁতৰ আলুৰ বিষ আদি নানা সমস্যা লাগিয়ে থাকে।
দাঁতৰ ক্ষয়ক লৈ মানুহৰ দুশ্চিন্তাৰ অন্ত নাথাকে। অথচ লোভনীয় খাদ্যবোৰো পৰিহাৰ কৰিব নোৱাৰি। যাৰ বাবে চিন্তা বেছিকৈ হয়। হৰম’নৰ ভাৰসাম্যহীনতা, খাদ্য তালিকাত খনিজ, ভিটামিন ‘এ’, ভিটামিন ‘ডি’ৰ অভাৱ আদি কাৰণতে দাঁত ক্ষয়ৰ সমস্যা হয়। সুস্থ থাকিবলৈ দাঁতৰ যত্ন লোৱাটো অতিশয় জৰুৰী। গতিকে জানি লওক দাঁত ক্ষয় ৰোধৰ কিছু সহজ উপায়
পুষ্টিকৰ খাদ্য খাব
খাদ্য তালিকাত ৰাখিব ভিটামিন আৰু খনিজ সমৃদ্ধ খাদ্য। এইবোৰ খাদ্যত থকা ফেট ছলিউবল প্রকৃতিয়ে দাঁতৰ ক্ষয় ৰোধৰ কাম কৰে। শাক-পাচলি খোৱাৰ লগতে নাৰিকলৰ তেল, এভ’কেডো, বাদাম আদি স্বাস্থ্যকৰ চৰ্বি খাদ্য তালিকাত ৰাখিব।
টুথপেষ্ট হওক ভেষজ
ৰাসায়নিক উপাদান কম থকা টুথপেষ্টহে ব্যৱহাৰ কৰিব। ভেষজ উপাদানেৰে তৈয়াৰী প্ৰচুৰ আয়ুর্বেদিক টুথপেষ্ট বজাৰত উপলব্ধ। দাঁতৰ ক্ষয় ৰোধ কৰাত এইবোৰৰ বেছিকৈ ব্যৱহাৰ কৰিব।
দাঁত পৰিষ্কাৰ কৰিব
নিশা খোৱাৰ পাছত আৰু পুৱা খোৱাৰ পাছত দাঁত ব্ৰাছ কৰিব। এই ক্ষেত্রত নৰম টুথব্ৰাছ ব্যৱহাৰ কৰাই শ্রেয়। দাঁত ব্রাছ কৰাৰ সময়ত জিভাও পৰিষ্কাৰ কৰিব।
মিঠা খাদ্য পৰিহাৰ
যিকোনো ধৰণৰ মিঠাযুক্ত খাদ্য আপোনাৰ খাদ্য তালিকাৰ পৰা বাদ দিব লাগিব। বিশ্ব স্বাস্থ্য সংস্থাৰ মতে, মিঠা জাতীয় খাদ্যই দাঁত ক্ষয়ৰ মাত্ৰা বহুগুণে বৃদ্ধি কৰে। সেয়ে মিঠা পৰিহাৰ কৰিব লাগিব।