Measurement Collection Unit:
যিকোনো অপৰাধমূলক কাৰ্য সংঘটিত কৰি এতিয়াৰ পৰা অনায়াসে সাৰি যাব নোৱাৰিব অপৰাধী ৷ কিয়নো বিজ্ঞানসন্মতভাৱে আৰু এখোজ আগুৱালে অসম আৰক্ষী। অপৰাধমূলক পদ্ধতি চিনাক্তকৰণ আইন ২০২২ অধীনত অসমত স্থাপন কৰা হৈছে Measurement Collection Unit(এমচিইউ) অসমত স্থাপন কৰি অপৰাধ অনুসন্ধানক আধুনিকীকৰণৰ দিশত এক উল্লেখযোগ্য পদক্ষেপ গ্ৰহণ কৰিছে অসম আৰক্ষীয়ে ।
নতুন ব্যৱস্থাৰ জৰিয়তে অপৰাধমূলক তথ্য বৈজ্ঞানিকভাৱে সংগ্ৰহ আৰু সংৰক্ষণৰ সুবিধা প্ৰদান কৰা হৈছে, যাৰ ফলত অভ্যাসগত অপৰাধীসকলে আইনৰ পৰা সাৰি যোৱাটো অসম্ভৱ হৈ পৰিছে।
উন্নত বৈজ্ঞানিক কৌশল ব্যৱহাৰ কৰি অপৰাধীৰ ডি এন এৰ নমুনা ৰেকৰ্ড কৰি সংৰক্ষণ কৰিব এম চি ইউয়ে। বৰ্তমানৰ ফিংগাৰপ্ৰিণ্ট ডাটাবেছৰ দৰেই এমচিইউয়ে অপৰাধীৰ ৰেটিনা আৰু সম্পূৰ্ণ শৰীৰৰ ডাটা স্কেন কৰি কেন্দ্ৰীভূত ডিজিটেল ডাটাবেছত সংৰক্ষণ কৰিব।
এই তথ্যসমূহ পিছত ভাৰতৰ যিকোনো ঠাইৰ পৰা লাভ কৰিব পৰা যায় ৷যাৰ ফলত আৰক্ষীয়ে যিকোনো অপৰাধমূলক গোচৰৰ সৈতে জড়িত তথ্যসমূহ দ্ৰুতভাৱে ক্ৰছ-চেক কৰিব পাৰে।
এমচিইউত সংযুক্ত চফট্ ৱেৰে অপৰাধৰ সৈতে জড়িত অপৰাধীসকলৰ তৎক্ষণাত পৰীক্ষণ সক্ষম কৰে I যাৰ ফলত তদন্ত যথেষ্ট ক্ষিপ্ৰ হয়। অসমৰ সকলো জিলা সদৰত এই ব্যৱস্থা ৰূপায়ণ কৰা হৈছে আৰু ৰাজ্যৰ ভিতৰতে এই ধৰণৰ প্ৰথমটো ব্যৱস্থা গুৱাহাটীত কৰা হৈছে ।
গুৰুত্বপূৰ্ণ কথাটো হ’ল এমচিইউয়ে মহিলা আৰু শিশুৰ বিৰুদ্ধে অপৰাধৰ সৈতে জড়িত অপৰাধীৰ ডিএনএ নমুনাও সংৰক্ষণ কৰিব ৷ যাৰ ফলত সুৰক্ষা আৰু জবাবদিহিতা বৃদ্ধি পোৱাটো নিশ্চিত হ’ব।
এই বৈজ্ঞানিক পদক্ষেপৰ জৰিয়তে অসম আৰক্ষীৰ লক্ষ্য হৈছে আইন প্ৰয়োগক শক্তিশালী কৰা আৰু কোনো পুনৰাবৃত্তিকাৰী অপৰাধীয়ে যাতে ন্যায়ৰ পৰা হাত সাৰিব নোৱাৰে।
উল্লেখ্য যে পূৰ্বতে ডিএনএ নমুনা সংৰক্ষণ কৰা হৈছিল বহি:ৰাজ্যত। এমচিএউ অসমত স্থাপনৰ কথা সদৰি কৰে অসম আৰক্ষীৰ বিশেষ সঞ্চালক প্ৰধান তথা চিআইডিৰ মূৰব্বী মুন্না প্ৰসাদ গুপ্তাই।
