অতিৰিক্ত ওজনৰ বাবে বঞ্চিত হয় মাতৃৰ শেষকৃত্যৰ পৰা

সাধাৰণ দুই-চাৰি কেজি ওজন কমাবলৈকে মানুহে অনেক কছৰৎ কৰিবলগীয়া হয়। তেনে অৱস্থাত শৰীৰৰ পৰা ৮৫ কেজি ওজন জোঁকাৰি পেলোৱাটো মুঠেই সহজ কথা নহয়। অথচ তেনে এক ঘটনাই সম্প্রতি পোহৰলৈ আহিছে। অত্যধিক ইচ্ছাশক্তি থাকিলেহে এই ধৰণৰ অসম্ভৱক সম্ভৱ কৰিব পৰা যায়।

অৱশ্যে ইয়াৰ অন্তৰালত আছে এক করুণ কাহিনী। কেবল কঠোৰ পৰিশ্ৰম, স্বাস্থ্যকৰ ডায়েট আৰু শৰীপচৰ্চাই ইয়াৰ বাবে যথেষ্ট নহয়। ইয়াৰ বাবে এনে মনোবল থকা প্রয়োজন, সেয়া বোধহয় সকলোৰে নাথাকে।

২২ বছৰীয়া ছভিক চাহু। সম্প্রতি ৮৫ কেজি ওজন কমাই সামাজিক মাধ্যমত ভাইৰেল হৈ পৰিছে এইজন যুৱক। ইয়াৰ আগতে তেওঁৰ শৰীৰৰ ওজন আছিল ১৬০ কেজি; কিন্তু অবিৰত শৰীৰচৰ্চা আৰু হাইপ্ৰ’টিন ডায়েটৰ জৰিয়তে ছভিকে নিজৰ এই ৰূপান্তৰৰে সঁচাকৈয়ে আচৰিত কৰি তুলিছে সকলোকে।

সম্প্রতি সামাজিক মাধ্যমত এটা আবেগঘন প’ষ্ট দিছে ছভিকে। জনাইছে যে ক’ভিডৰ সময়ত তেওঁৰ মাতৃৰ মৃত্যু হয়। সেই সময়ত ছভিকৰ ওজন আছিল ১৬০ কেজি। অতিৰিক্ত স্থূলতাৰ কাৰণে শৰীৰত বাহ লৈছি একাধিক ৰোগে।

উচ্চ ৰক্তচাপ, মধুমেহ, আৰ্থৰাইটিছ, আনকি শ্বাস-প্রশ্বাসৰ সমস্যাতো ভূগিছিল তেওঁ। ক’ভিডকালত মাতৃৰ বিয়োগৰ সময়ত ছভিক সমস্যাত পৰে। কিয়নো তেওঁক যি পিপিই কিট পৰিধান কৰিবলৈ দিয়া হৈছিল, সেয়া আছিল তেওঁৰ দেহৰ তুলনাত অতিশয় সৰু। ফলত শেষকৃত্য কৰিবলৈ গৈ তেওঁ বিড়ম্বনাৰ সম্মুখীন হয়।

মাতৃৰ শেষকৃত্য কৰিবলৈ তেওঁক স্থানীয় প্রশাসনে বাধা প্রদান কৰে। বাধ্য হৈ ছভিকে সেইদিনা দুটা পিপিই কিট পৰিধান কৰিবলগীয়া হৈছিল। মাতৃৰ বিয়োগত শোকৰ ছাঁ, তাতে মাতৃৰ বাবে অন্তিম কৰণীয়খিনিত বাধা পায় তেওঁ অত্যন্ত আবেগিক হৈ পৰিছিল।

সেই আবেগিক মুহূর্ততে তেওঁ প্রতিজ্ঞা কৰিছিল। এনেদৰে আৰু নহ’ব। এইবাৰ কিবা এটা বিহিত ব্যৱস্থা লোৱাৰ প্ৰয়োজন হৈছে। জীৱিত কালত মাতৃয়ে ছভিকৰ শৰীৰক লৈ প্রতিমুহূর্ততে উদ্বিগ্ন হৈ থাকিছিল। সেয়ে সেইদিনা মাতৃৰ শেষকৃত্যত থিয় দি যুৱকজনে প্রতিজ্ঞা কৰিছিল যে যিকোনো প্ৰকাৰে হওক শৰীৰৰ ওজন হ্রাস কৰি স্বাভাৱিক জীৱনলৈ ঘূৰি আহিব লাগিব।

অৱশেষত সেই প্রতিশ্রুতি পূৰণ কৰিলে তেওঁ। সামাজিক মাধ্যমত প’ষ্ট জি ছভিকে জনাইছে যে এতিয়া আৰু তেওঁ আগৰ দৰে প্ৰতিদিনে ৰক্তচাপ জুখিব ননালাগে। নির্দিষ্ট সময় লৈ লৈ ঔষধ সেৱন কৰিব নালাগে। ওজন হ্রাস কৰাৰ পাছত তেওঁ সকলো ৰোগৰ পৰা মুক্ত হ’ব পাৰিছে। অসুস্থ জীৱনৰ পৰা আঁতৰি আহি তেওঁৰ এই নতুন যাত্রা প্রয়াত মাতৃৰ বাবেই সম্ভৱ হোৱা বুলিও যুৱকজনে মন্তব্য কৰিছে। এটা নতুন জীৱন লাভকৰিছে তেওঁ।