Nagaon:
দৈনিক অগ্ৰদূত ডিজিটেল ডেক্স :–প্ৰয়াত তৰুণ গগৈৰ মন্ত্ৰীসভাৰ সদস্য পদ শুৱনি কৰি ২০১৬ ত নিজ গৃহ সমষ্টি মাৰ্ঘেৰিটাত পৰাভূত হোৱাৰ পিছতো কংগ্ৰেছ দলে নগাঁৱত সংস্থাপিত কৰি বিগত দুটা লোকসভা নিৰ্বাচনত জয়ী কৰাইছিল প্ৰদ্যুৎ বৰদলৈক ৷ কিন্ত বিধানসভা নিৰ্বাচনলৈ মাজত মাত্ৰ ২১দিন থকা অৱস্থাত লাহৰিঘাটৰ বৰ্তমানৰ বিধায়কজনক দলীয় টিকট দিয়াৰ বিৰোধিতা কৰি প্ৰদ্যুৎ বৰদলৈয়ে মঙলবাৰে কংগ্ৰেছৰ পৰা দলত্যাগ কৰাৰ পিছত বুধবাৰে দুপৰীয়া মুখ্যমন্ত্ৰী ড:হিমন্ত বিশ্ব শৰ্মাৰ দিল্লীস্থ বাসগৃহত আনুষ্ঠানিকভাৱে যোগদান কৰে বিজেপিত ৷
নগাঁৱৰ সাংসদ গৰাকীৰ বিজেপি বসনপিন্ধাৰ পিছত ক্ষোভৰ বহি:প্ৰকাশ হয় নগাঁৱত ৷ বৰদলৈক দুবাৰকৈ সাংসহ হিচাপে জয়ী কৰাত অগ্ৰণী ভূমিকা লোৱা কংগ্ৰেছ কৰ্মী সকলে নগাঁও জিলা কংগ্ৰেছ কাৰ্যালয় ৰাজীৱ ভৱনত উপস্থিত হৈ এফালৰ পৰা প্ৰদ্যুৎ বৰদলৈৰ ফটো ,পোষ্টাৰ আদি এৰুৱাই ভাঙি লণ্ড- ভণ্ড কৰে ৷
আনহাতে ৰাজীৱ ভৱনত উপস্থিত থকা নগাঁও- বটদ্ৰৱা সমষ্টিৰ কংগ্ৰেছৰ টিকট প্ৰত্যাশি মৃণাল হাজৰিকাই বৰদলৈৰ বিজেপি গমনত তীব্ৰ ক্ষোভ প্ৰকাশ কৰি কয় এইয়া নগঞা ৰাইজৰ প্ৰতি তেওঁৰ বিশ্বাসঘাটকতা ৷ পাঁচ বছৰৰৰ বাবে তেওঁক লোকসভালৈ বিপুল ভোটেৰে নিৰ্বাচিত কৰাৰ পিছত নিজৰ ব্যক্তিগত স্বাৰ্থ আৰু ক্ষমতাৰ লালসাত দলত্যাগ কৰি নিজৰ নগ্ন ৰূপটো পুনৰ উদঙাই দিলে ৷ আগন্তুক দিনত ইয়াৰ যোগ্য প্ৰত্যুত্তৰ অসমৰ ৰাইজে দিব ৷