Chinese family:✒️দূৰদূৰণিত কর্মসূত্রে হওক বা আন সূত্রেই হওক বাস কৰা বহুতে মাজে সময়ে নিজৰ পুৰণি ঠাইৰ ঘৰত থাকিবলৈ বিচাৰে। ইয়ে মনলৈ এক সজীৱতা আনে বুলিও বহুতে বিশ্বাস কৰে। এনে কাৰণতে চীনৰ জুয়ুয়ান গাঁৱত এটা ১৫ মহলীয়া প্রকাণ্ড অট্টালিকা গঢ় লৈ উঠিছে।
এই অট্টালিকাত একেটা পৰিয়ালৰ চাবিটা প্ৰজন্মৰ শতাধিক লোকে বাস কৰে। অট্টালিকাটোত ২২ টা এপার্টমেন্ট আছে। একেদৰে অট্টালিকাটোত এলিভেটব, ভূগর্ভস্থ পার্কিংস্থল আৰু মাজে মাজে মুকলি ঠায়ো আছে। গতিকে এই অট্টালিকা এক উন্নত মানৰ এপার্টমেণ্টৰ দৰে লাগে। কিন্তু এই অট্টালিকা দৰাচলতে এক ক্ষুদ্র উলম্ব চুবুৰি সদৃশহে।
এই অট্টালিকাৰ গৰাকীসকলৰ মনলৈ এনে এটা অট্টালিকা নিৰ্মাণৰ পৰিকল্পনা আহে যেতিয়া তেওঁলোকৰ পুৰণি ঘৰবোৰে জৰাজীৰ্ণ ৰূপ ল’বলৈ
ধৰে। এইসকলৰ পুত্র-কন্যাসকলে ইতিমধ্যে বিভিন্ন সূত্রে আন নগৰ-চহৰত বাস কৰিবলৈ লৈছে। দূৰৈত বাস কৰাসকলেও মাজে সময়ে পিতৃগৃহলৈ আহি কিছুদিন কটাবলৈ বিচাৰে। ইয়ে এই অট্টালিকাৰ গৰাকীসকলক এনে এটা বৃহৎ তথা সুউচ্চ অট্টালিকা নির্মাণ কৰাবলৈ উদ্বুদ্ধ কৰে। ভবা মতে কাম।
অৱশেষত তেওঁলোকে এই ১৫ মহলীয়া সুউচ্চ অট্টালিকা নির্মাণ কৰায়। লক্ষ্যণীয়ভাবে গৃহ নিৰ্মাণৰ স’তে জলবায়ুৰো এক প্রত্যক্ষ সংযোগ থাকে। ৰাষ্ট্ৰসংঘৰ পৰিৱেশ কৰ্মসূচীৰ মতে, পকী গৃহ আৰু অন্যান্য নির্মাণকার্য বিশ্বৰ ৩৪ শতাংশ কার্বন নির্গমনৰ বাবে দায়ী। গতিকে সুকীয়াকৈ গৃহ নির্মাণৰ পৰিৱৰ্তে এই বৃহৎ পৰিয়ালে একে ঠাইতে এটা অট্টালিকা নির্মাণ কৰাটো পৰিবেশগত দিশৰ পৰাও প্রশংসনীয় বুলি চর্চা হৈছে।
তদুপৰি ঘৰটোত বাস কৰা পৰিয়ালসমূহে একেটা ঘৰতে বাস কৰাৰ বাবে ব্যক্তিগত গোপনীয়তাও হেৰুৱাবলগীয়া হোৱা নাই। এই ঘৰটো মুঠ ২০টা পৰিয়ালে ঐক্যবদ্ধ হৈ নিৰ্মাণ কৰে। অট্টালিকাটোত ২২টা গৃহ আছে।
ইয়াৰ ভূমি মহলা প্ৰথম অৱস্থাত গুদামৰূপে ব্যৱহাৰ কৰিবলৈ ৰখা হৈছিল। অৱশ্যে এতিয়া এই মহলা খাদ্যৰ ভঁৰালৰূপে ব্যৱহাৰ কৰা হয়। অট্টালিকাটোত বাস কৰা পৰিয়ালসমূহৰ ল’ৰা-ছোৱালীয়ে খেলাৰ বাবে চৌহদত মুকলি ঠায়ো আছে। গতিকে আন বহু এপার্টমেন্টতকৈ এই অট্টালিকা সুকীয়া। এই অট্টালিকাৰ বাসিন্দাসকলৰ মাজৰ এজন জ্যেষ্ঠ ব্যক্তিয়ে জনায় যে প্রথমে তেওঁৰ আত্মীয়-স্বজনসকলে সুকীয়াকৈ গৃহ নিৰ্মাণৰ পৰিকল্পনাও কৰিছিল।
কিন্তু পৰৱৰ্তী সময়ত তেওঁলোকে সিদ্ধান্ত সলনি কৰে। তেওঁলোকে একেলগে একেটা ঘৰতে বাস কৰাৰ সিদ্ধান্ত লৈ এই সুউচ্চ অট্টালিকা নিৰ্মাণ কৰোৱায়। অৱশ্যে এই অট্টালিকা নিৰ্মাণৰ ক্ষেত্ৰত পৰিৱেশ সচেতনতায়ো ক্ৰিয়া কৰে। অট্টালিকাটোৰ নির্মাতাসকলে বিবেচনা কৰে যে একোটা গৃহ কেৱল আশ্রয়স্থলে নহয়। একোটা ঘৰে কিমান ভূমি আগুৰি লয় আৰু ঘৰটো নিৰ্মাণৰ বাবে কেনে ধৰণৰ সামগ্ৰীৰ প্রয়োজন তাৰ প্ৰতিও দৃষ্টি ৰাখে তেওঁলোকে।
কাৰণ নতুন নতুন পকী ঘৰ নিৰ্মাণে পৰিৱেশৰ ওপৰতো বিৰূপ প্রভাৱ পেলাইছে। জলবায়ু পৰিৱৰ্তনৰ প্ৰতি অৰিহণা যোগাইছে। সেয়েহে এই অট্টালিকা নিৰ্মাণকাৰীসকলে নিৰ্মাণ কাৰ্যৰ ফলত যাতে পৰিৱেশৰ ওপৰত অশুভ প্ৰভাৱ নপৰে তাৰ প্ৰতি দৃষ্টি ৰাখিও পৰিয়ালৰ সকলোৰে বাবে মাথোঁ এটা গৃহ নির্মাণ কৰোৱায়। ইয়াৰ ফলত আন ঠাইত গছ-বন কটাৰ প্ৰয়োজন নহ’ল।
অন্যথা শতাধিক লোকে বাস কৰিবৰ বাবে আন ঠাইত গছ-বন কাটি পৰিৱেশ ধ্বংস কৰিবলগীয়া হ’লহেঁতেন। উল্লেখ্য যে চীনত জলবায়ু পৰিৱৰ্তনে ভয়াৱহ প্ৰভাৱ পেলাবলৈ লৈছে। ইয়াৰ প্ৰতিও লক্ষ্য ৰাখি এই পৰিয়ালে এই সুউচ্চ অট্টালিকা নির্মাণ কৰোৱায়। ইয়াৰ সুবাদত পৰিয়ালটোৰ চাৰিটা প্ৰজন্মৰ শতাধিক সদস্যই একেলগে বাস কৰিব পৰা হৈছে।