স্বয়ং সংসদৰ মজিয়াতে ফাদিল হ’ল মোদী চৰকাৰৰ এক ‘ধ্বংসলীলা’ৰ তথ্য। প্রধানমন্ত্রী নৰেন্দ্ৰ মোদীসহ বিজেপিয়ে অহংকাৰ কৰা দিল্লীৰ চেন্ট্রেল ভিষ্টা প্ৰকল্পৰ স্থানান্তৰিত ৪৩ শতাংশ গছেই অকাল মৃত্যুক সাবটি ল’ব লগা হ’ল।
উল্লেখ্য যে সংসদ ভৱন, উপ-ৰাষ্ট্ৰপতিৰ বাসভবন, কেন্দ্রীয় সচিবালয় আৰু প্রধানমন্ত্রীৰ নতুন কাৰ্যালয়ক সামৰি ৰূপায়িত এই বিয়াগোম প্রকল্পথলীৰ গছসমূহ আন স্থানলৈ স্থানান্তৰৰ প্ৰতিশ্ৰুতি মোদী চৰকাৰে দিছিল। সেই অনুসৰি প্ৰকল্পস্থলীৰ তিনি সহস্রাধিক গছ গুৰিৰে স’তে তুলি আন স্থানত ৰোপণৰ ব্যৱস্থা কৰে চৰকাৰে। কিন্তু সু-তদাৰকীৰ অভাৱত এই গছসমূহৰ এক বুজন সংখ্যক অর্থাৎ ৪৩ শতাংশই অকালতে মৃত্যুমুখত পৰে। স্বয়ং কেন্দ্ৰীয় চৰকাৰে এই তথ্য প্রকাশ কৰিছে।
অলপতে সংসদত কেন্দ্রীয় গৃহনির্মাণ আৰু নগৰ উন্নয়ন পৰিক্ৰমাৰ ৰাজ্যিক মন্ত্রী তোষণ চাহুৱে জনায় যে চেন্ট্রেল ভিষ্টা প্রকল্পস্থলীৰ পৰা ৩,৬৯০ জোপা গছ আন স্থানত পুনৰ ৰোপণৰ বাবে নিয়া হয়। ইয়াৰে ১,৫৪৫ গছে অকাল মৃত্যুক সাবটি ল’ব লগা হয়। এই সম্পর্কত মন্ত্রী চাহুৱে সদৰী কৰা অনুসৰি প্ৰকল্পস্থলীৰ পৰা গুৰিৰে স’তে তুলি নিয়া এই গছসমূহৰ ১,৭৩৪ জোপা বর্তমানে থকা কেন্দ্রীয় সচিবালয়ৰ স্থানত আছিল। আন ৪০২ জোপা নতুন সংসদ ভৱনৰ অট্টালিকাৰ স্থানত আছিল।
৩৯০ জোপা গছ আছিল উপ-ৰাষ্ট্ৰপতিৰ বাসভৱনৰ আস্থানত। আনহাতে ১৪৩ জোপা আছিল প্রধানমন্ত্রীৰ নতুন কার্যালয় আৰু বাসভৱনৰ স্থানত। লক্ষ্যণীয় যে বিগত দীপাৱলীৰ পৰা দিল্লীত পৰিৱেশ প্ৰদূষণে ভয়াৱহ ৰূপ ধাৰণ কৰি আছে। বায়ু নিৰ্মল কৰি ৰখাত গছে প্রধান ভূমিকা লয় যদিও মোদী চৰকাৰৰ হঠকাৰী কাৰ্যই সহস্রাধিক পূর্ণবয়স্ক গছক মৃত্যুৰ মুখলৈ ঠেলি দিয়া ঘটনাক বহুতে সহজভাৱে ল’ব পৰা নাই।
যি সময়ত জলবায়ু পৰিৱৰ্তনেও ভয়াৱহ ৰূপ লৈছে সেই সময়ত পৰিৱেশক লৈ কেনেদৰে এখন চৰকাৰ নিৰ্বিকাৰ হৈ থাকিব পাৰে তাক লৈ বহুতে আশ্চর্য প্রকাশ কৰিছে। অৱশ্যে কেন্দ্রীয় মন্ত্রী চাহুৱে সংসদত জনায় যে চেন্ট্রেল ভিষ্টা প্রকল্প নিৰ্মাণৰ ফলত হোৱা গছ-গছনিৰ ক্ষতিপূৰণৰ উদ্দেশ্যে চৰকাৰে দিল্লীৰ বদৰপুৰ অঞ্চলস্থিত এনটিপিচি ইক’পার্কত ২৪,৪৫০ জোপা গছ ৰোপণ কৰে। তদুপৰি ঘিটর্নি অঞ্চলতো চৰকাৰে ১,৭৩০ জোপা ৰোপণৰ ব্যৱস্থা কৰে।
উল্লেখ্য যে গুৱাহাটীৰ দীঘলীপুখুৰী পাৰৰ বহু গছ অসম চৰকাৰে উৰণীয়া সেতু নিৰ্মাণৰ বাবে স্থানান্তৰ কৰা বুলি দাবী কৰি আহিছে।
যিহেতু চেন্ট্রেল ভিষ্টা প্ৰকল্পৰ ক্ষেত্ৰতে সহস্রাধিক সংৰোপিত গছৰ অকাল মৃত্যু হ’ল। দীঘলীপুখুৰী পাৰৰ স্থানান্তৰিত গছসমূহৰ অৱস্থা কেনে সেয়া সহজে অনুমেয় হৈছে। কেন্দ্রীয় মন্ত্রী চাহুৱে লগতে সদৰী কৰা অনুসৰি চেন্ট্রেল ভিষ্টা প্ৰকল্পৰ গছসমূহ সংৰোপণৰ বাবে ২০২৩-২৪ আৰু ২০২৫-২৬ত কেন্দ্রই ৫.২ কোটি টকা ব্যয় কৰে। উল্লেখ্য যে ব্ৰিটিছ যুগৰ সংসদ ভৱনৰ পৰিৱৰ্তে নতুন সংসদ ভৱনযুক্ত চেন্ট্রেল ভিষ্টা প্রকল্প নিৰ্মাণৰ কাম মোদী চৰকাৰে ২০১৯ত আৰম্ভ কৰে।
এই বিয়াগোম প্রকল্প ৰূপায়ণে দিল্লীৰ পৰিৱেশ ধ্বংস কৰাৰ আশংকা কৰিও বহুতে অসন্তুষ্টি প্রকাশ কৰিছিল। সচৰাচৰৰ দৰে এইসকলৰ অসন্তুষ্টিক সমূলি গুৰুত্ব নিদি মোদী চৰকাৰে অহমিকা প্ৰকাশৰে গছ-বন ধ্বংস কৰি এই বিয়াগোম প্রকল্প ৰূপায়ণ কৰে।