চত্তীশগড়ত সদ্যসমাপ্ত প্ৰথম খেল’ ইণ্ডিয়া ট্ৰাইবেল গেমছৰ ৰেষ্টলিং ইভেণ্টত পদকপ্ৰাপ্ত অসম দলৰ খেলুৱৈসকলক অভিনন্দন জনোৱাৰ উদ্দেশ্যে বুধবাৰে নগাঁও ক্ৰীড়া সংস্থাৰ স্প’ৰ্টছ ক্লাব পেভিলিয়নত দিনৰ এঘাৰ বজাত অসম ৰেষ্টলিং সন্থাই এক বিশেষ অনুষ্ঠানৰ আয়োজন কৰিছে৷
অসম ৰেষ্টলিং সন্থাৰ মুখ্য উপদেষ্টা উজ্জল বৰুৱা, সভাপতি ৰাতুল শৰ্মা আৰু সাধাৰণ সম্পাদক গৌৰাংগ ৰয়ে জানিবলৈ দিয়ামতে, উক্ত প্ৰতিযোগিতাত পদকপ্ৰাপ্ত খেলুৱৈসকল হ’ল-গোলাঘাটৰ দেৱী দৈমাৰী, প্ৰীতিমা খাখলাৰী, আকাশ কাৰডং, কাৰ্বি আংলঙৰ ৰূপ্টালিণ টিমুংপী, মাইনাৰী খাখলাৰী আৰু আনিচা বসুমতাৰী৷
উল্লেখিত খেলুৱৈকেইগৰাকীৰ ভিতৰত ফ্ৰীষ্টাইলৰ ছোৱালীৰ ৫৩ কিঃগ্ৰাঃৰ শাখাত প্ৰীতিমা খাখলাৰীয়ে আৰু ৬২ কিঃগ্ৰাঃৰ শাখাত দেৱী দৈমাৰীয়ে দ্বিতীয়স্থান লাভৰে ৰূপৰ পদক, ৫০ কিঃগ্ৰাঃৰ ৰূপ্টালিণ টিমুংপীয়ে, ৫৩ কিঃগ্ৰাঃত মাইনাৰী খাখলাৰীয়ে, ৬২ কিঃগ্ৰাঃৰ শাখাত আনিচা বসুমতাৰীয়ে আৰু ল’ৰাৰ গ্ৰীক’ৰোমানৰ ৬৭ কিঃগ্ৰাঃৰ শাখাত আকাশ কাৰড’মে তৃতীয়স্থান দখলৰে ব্ৰঞ্জৰ পদক লাভ কৰিবলৈ সক্ষম হৈছিল৷
অসম দলটোত জোনমণি দাস আৰু অনুষ্টুপ নৰহ প্ৰশিক্ষকৰূপে তথা টুলাৰাম নাৰ্জাৰী মেনেজাৰৰূপে আছিল বুলি অসম ৰেষ্টলিং সন্থাৰ সাধাৰণ সম্পাদকে লগতে জনাইছে৷ উল্লেখ্যনীয় যে, অসম ৰেষ্টলিং দলটোৱে ছোৱালী শাখাত দলগতভাৱে চেম্পিয়নৰ খিতাপ অধিকাৰ কৰিবলৈ সক্ষম হৈছিল৷