আজি ৰাজ্যজুৰি অনুষ্ঠিত হৈছে পশ্চিম বংগৰ বিধানসভা নিৰ্বাচনৰ প্ৰথম পৰ্যায়ৰ ভোটগ্ৰহণ । মুঠ ১৫২টা সমষ্টিত চলি থকা এই পৰ্যায়ত প্ৰায় ৩.৬ কোটি ভোটাৰে নিজৰ ভোটাধিকাৰ প্ৰয়োগ কৰি প্ৰাৰ্থীৰ ভাগ্য নিৰ্ধাৰণ কৰিছে।
এইবাৰৰ নিৰ্বাচনত মুখ্যমন্ত্ৰী মমতা বেনাৰ্জী (Mamata Banerjee)ৰ নেতৃত্বাধীন তৃণমূল কংগ্ৰেছ আৰু বিৰোধী দল বিজেপিৰ মাজত তীব্ৰ প্ৰতিদ্বন্দ্বিতা দেখা গৈছে।
বিশেষকৈ ভোটাৰ তালিকা সংশোধনক কেন্দ্ৰ কৰি সৃষ্টি হোৱা ৰাজনৈতিক উত্তেজনাই নিৰ্বাচনী পৰিৱেশ অধিক উত্তপ্ত কৰি তুলিছে।
ভোটাৰৰ অংশগ্ৰহণৰ ক্ষেত্ৰতো এইবাৰ উল্লেখযোগ্য সঁহাৰি পৰিলক্ষিত হৈছে। বিয়লি তিনি বজালৈকে প্ৰায় ৭৮.৭৭ শতাংশ ভোটদান সম্পন্ন হৈছে।
ইয়াৰ মাজতে মালদা জিলাৰ মালাতিপুৰ সমষ্টিৰ কন্দৰণ অঞ্চলত এক দুখজনক ঘটনা সংঘটিত হয়। ভোটদান কৰিবলৈ আহি এগৰাকী মহিলা ভোটাৰ হঠাতে অসুস্থ হৈ পৰে আৰু পাছত তেওঁৰ মৃত্যু ঘটে। পৰিয়ালৰ দাবী অনুসৰি, ভোটদান কৰি ওলোৱাৰ সময়তে এই ঘটনা সংঘটিত হৈছিল।
আনহাতে, ৰাজ্যখনৰ কেবাখনো স্থানত হিংসাত্মক ঘটনাৰ খবৰো পোৱা গৈছে। আজিও ভোটগ্ৰহণ চলাকালীন তৃণমূল কংগ্ৰেছ আৰু আম জনতা উন্নয়ন পাৰ্টীৰ কৰ্মীৰ মাজত সংঘৰ্ষ হয়, য’ত দুয়োফালৰ পৰা শিলগুটি নিক্ষেপ কৰা হয়। পৰৱৰ্তী সময়ত আৰক্ষী আৰু কেন্দ্ৰীয় নিৰাপত্তা বাহিনীয়ে লাঠিচালনা কৰি পৰিস্থিতি নিয়ন্ত্ৰণ কৰে।
একেদৰে ডমকাল অঞ্চলত ভোটাৰক ভয়-ভাব দেখুৱাই ভোটদানত বাধা দিয়াৰ অভিযোগ উত্থাপন হৈছে। এই ঘটনাক লৈ নিৰ্বাচন আয়োগে প্ৰতিবেদন বিচাৰিছে আৰু পৰৱৰ্তী সময়ত নিৰাপত্তা বাহিনী মোতায়েন কৰি পৰিস্থিতি নিয়ন্ত্ৰণ কৰা হয়।
উল্লেখযোগ্য যে, দ্বিতীয় পৰ্যায়ৰ ভোটগ্ৰহণ অহা ২৯ এপ্ৰিলত অনুষ্ঠিত হ’ব আৰু চাৰি মে’ত ভোটগণনা সম্পন্ন হ’ব।