তুৰস্কত ১৫ বছৰৰ তলৰ শিশুৰ বাবে নিষিদ্ধ ছ’চিয়েল মিডিয়া

Turkey passes law to ban use of social media for children :✒️শিশু-কিশোৰসকলৰ ছ’চিয়েল মিডিয়া ব্যৱহাৰৰ ওপৰত নিয়ন্ত্ৰণ অধিক কঠোৰ কৰিবলৈ তুৰস্কে নতুন পদক্ষেপ গ্ৰহণ কৰিছে। বুধবাৰে গভীৰ নিশা তুৰস্কৰ সংসদত এই সন্দৰ্ভত এখন গুৰুত্বপূৰ্ণ আইন গৃহীত কৰা হয়।

নতুন আইন অনুসৰি, পশ্চিম এছিয়াৰ এই দেশত ১৫ বছৰৰ তলৰ সকলো শিশুৰ বাবে ছ’চিয়েল মিডিয়া ব্যৱহাৰ সম্পূৰ্ণৰূপে নিষিদ্ধ কৰা হৈছে।

অৱশ্যে এই আইনখন কেতিয়াৰ পৰা কাৰ্যকৰী হ’ব, সেই বিষয়ে এতিয়াও আনুষ্ঠানিক ঘোষণা হোৱা নাই।

নতুন আইনৰ অধীনত ফেচবুক, টিকটক, ইউটিউব, এক্স, স্নেপচ্যাট, ইনষ্টাগ্ৰাম আদি জনপ্ৰিয় ছ’চিয়েল মিডিয়া প্লেটফৰ্মসমূহ ১৫ বছৰৰ তলৰ ব্যৱহাৰকাৰীৰ বাবে বন্ধ কৰা হ’ব।

ইয়াৰ লগতে ডিজিটেল গেমিং কোম্পানি আৰু অন্যান্য অনলাইন প্লেটফৰ্মসমূহৰ ক্ষেত্ৰতো নতুন নিয়ম প্ৰৱৰ্তন কৰা হৈছে। তুৰস্কত সেৱা আগবঢ়াবলৈ হ’লে সকলো ডিজিটেল প্লেটফৰ্মে এই নিয়মসমূহ মানি চলিব লাগিব।

লগতে অধিক ব্যৱহাৰকাৰী থকা প্লেটফৰ্মসমূহে তুৰস্কত স্থানীয় প্ৰতিনিধি নিয়োগ কৰিব লাগিব বুলিও আইনত উল্লেখ কৰা হৈছে।

বিশ্বজুৰি শিশু-কিশোৰসকলৰ অনলাইন সুৰক্ষা নিশ্চিত কৰাৰ বাবে বিভিন্ন দেশত কঠোৰ পদক্ষেপ গ্ৰহণ কৰা হৈছে। আগৰ বছৰ অষ্ট্ৰেলিয়াই প্ৰথম দেশ হিচাপে ১৬ বছৰৰ তলৰ শিশুৰ বাবে ছ’চিয়েল মিডিয়া ব্যৱহাৰ নিষিদ্ধ কৰিছিল।

সেই নিষেধাজ্ঞাৰ অন্তৰ্গত ফেচবুক, টিকটক, ইউটিউব, এক্স, স্নেপচ্যাট আৰু ইনষ্টাগ্ৰামসহ বহু জনপ্ৰিয় প্লেটফৰ্ম আছিল।

অষ্ট্ৰেলিয়াৰ পথ অনুসৰণ কৰি ডেনমাৰ্ক আৰু ফ্ৰান্সেও শিশু-কিশোৰসকলৰ ছ’চিয়েল মিডিয়া ব্যৱহাৰৰ ওপৰত নিয়ন্ত্ৰণ কঠোৰ কৰিছে। একে দিশে আগবাঢ়িছে ব্ৰিটেইন আৰু ভাৰতো। বিভিন্ন দেশত এতিয়া এই বিষয়ত নীতিগত আলোচনা চলি আছে।

ভাৰতত এতিয়ালৈকে কেন্দ্ৰীয় চৰকাৰে এনে কোনো আনুষ্ঠানিক নিষেধাজ্ঞা ঘোষণা কৰা নাই। অৱশ্যে অনলাইন আসক্তি হ্ৰাস কৰাৰ বাবে বিভিন্ন নীতি-নিৰ্দেশনাৰ ইঙ্গিত পোৱা গৈছে।

সাম্প্ৰতিক অৰ্থনৈতিক সমীক্ষাতো ডিজিটেল আসক্তি নিয়ন্ত্ৰণৰ উদ্দেশ্যে অনলাইন কাৰ্যকলাপ সীমিত কৰাৰ পৰামৰ্শ আগবঢ়োৱা হৈছে।

একেদৰে কেবাখনো ৰাজ্যেও এই বিষয়ত পদক্ষেপ গ্ৰহণৰ চিন্তা-ভাবনা আৰম্ভ কৰিছে। গোৱা চৰকাৰে ১৬ বছৰৰ তলৰ শিশুৰ বাবে ছ’চিয়েল মিডিয়া নিষিদ্ধ কৰাৰ বিষয়ত বিবেচনা কৰিছে। অন্ধ্ৰপ্ৰদেশ চৰকাৰেও এই সন্দৰ্ভত আলোচনা আৰম্ভ কৰিছে।