উচ্চতৰ মাধ্যমিকৰ নতুন শিক্ষা বৰ্ষত বছৰজুৰি কৰা হ’ব জুবিন গাৰ্গৰ চৰ্চা। প্ৰাণৰ শিল্পীগৰাকীৰ হত্যাৰ গোচৰৰ শুনানি দ্রুত আদালতত অব্যাহত আছে। আজিও ইয়াৰ শুনানি অনুষ্ঠিত হয়। ইয়াৰ মাজতে অসম ৰাজ্যিক বিদ্যালয় শিক্ষা পৰিষদৰ ২০২৬-২৭শিক্ষা বৰ্ষৰ শৈক্ষিক দিনপঞ্জী প্ৰকাশ কৰা হৈছে আৰু ইয়াতে গ্ৰহণ কৰা হৈছে জুবিন গাৰ্গক লৈ বর্ষজোৰা চৰ্চাৰ শিতান। জুবিনৰ কে’বাটাও বিশেষ উক্তিক লৈ শিক্ষা বৰ্ষটোৰ প্ৰতিটো মাহত চৰ্চা কৰা হ’ব আৰু সেই বিষয়বোৰো দিনপঞ্জীত উদ্ধৃত কৰা হৈছে।
তদুপৰি এটা পাঠত জুবিন গাৰ্গৰ বিষয়েও সন্নিবিষ্ট হৈছে। এই বিশেষ পদক্ষেপৰ সন্দৰ্ভত দিনপঞ্জীখনত উল্লেখ কৰা হৈছে যে বিশেষ বিশেষ উল্লেখযোগ্য বিষয়ক লৈ পূর্বেও চর্চা কৰা হৈছিল। ইয়াৰ ভিতৰত অন্যতম হ’ল মহাত্মা গান্ধীৰ ১৫০ বছৰীয়া জন্মজয়ন্তী, আজাদী কা অমৃত মহোৎসৱ, জি-২০ আৰু ইছৰ’। সেই তালিকাতে এইবাৰ সংযোজিত হোৱা বিষয়বস্তু হৈছে জুবিন গাৰ্গ।
দিনপঞ্জীখনত সকলো শিক্ষানুষ্ঠানৰ মুৰব্বী আৰু শিক্ষকসকলক অনুৰোধ জনাই উল্লেখ কৰা হৈছে যে তেওঁলোকে এই শিক্ষা বর্ষটোত জুবিন গাৰ্গক লৈ নিজৰ নিজৰ শিক্ষানুষ্ঠানত পৰিৱেশ গঢ়ি তুলিব লাগিব। জুবিন গাৰ্গৰ সৃষ্টিশীলতা, মানবীয়তা আদি দিশবোৰ ইয়াত আলোচনা কৰিব লাগিব। প্রতি মাহত কোনবোৰ বিষয়ক লৈ বিশেষভাৱে চৰ্চা কৰিব লাগিব সেয়াও দিনপঞ্জীত উদ্ধৃত কৰা হৈছে।
এই বিষয়বোৰ প্ৰয়াত শিল্পীজনৰ উল্লেখযোগ্য কেইটামান উক্তিৰ পৰা গ্ৰহণ কৰা হৈছে। সেই অনুসৰি মে’ত আলোচনা কৰিবলগীয়া জুবিনৰ উক্তিটো হ’ল ‘যিকোনো শোষণ-নিষ্পেষণৰ পৰা প্ৰতিজন মানুহক মুক্তি লাগে। কিন্তু আমাক শাস্তি লাগে।
ৰাজনৈতিক বিশ্লেষণ সমীকৰণ মই নাজানো। কিন্তু আত্মাৰ নিৰ্দেশ মই অনুভৱ কৰো।’ জুনত চৰ্চা কৰিবলগীয়া উক্তিটো হ’ল ‘অর্থনীতি যেতিয়া বিদেশীৰ হাতলৈ যায় তেতিয়া কলা নিঃশেষ হয়।’ জুলাইৰ উক্তিটো হ’ল ‘মানুহক দুখ দি ঈশ্বৰক পূজা কৰি লাভনাই, দুখীজনৰ মুখত হাঁহি বিৰিঙাব পাৰিলেই ঈশ্বৰক সেৱা কৰা হয়।’
এনেদৰে প্ৰতি মাহৰ বাবে উল্লেখ কৰা আন উক্তিবোৰৰ ভিতৰত আছে ‘মই জাতিভেদত বিশ্বাস নকৰো। অকল মানুহ বুলি ভাবো। নিজকে শুদ্ধ অসমীয়া বুলি ভাবো’; ‘নাম থাকিলে বদনাম থাকেই’, ‘কিতাপ নপঢ়া জাতিক কেবল গামোচাই বচাব নোৱাৰে’, ‘কেতিয়াও নিজক ঢিলাই দিব নালাগে। যোদ্ধা মনোভাবটো সদায় মনৰ ভিতৰত থাকিব লাগে। সেইটো লৈয়েই মই আগুৱাই গৈ আছো সদায়’, ‘পৃথিৱীখন দুটা বস্তুৱেই চলায়। এটা হৈছে মগজু আৰু আনটো হৈছে হৃদয়’, ‘কিছুমান মানুহ টকাৰ ধনী, কিছুমান মনৰ ধনী। মই মনৰ ধনী হ’বলৈ বিচাৰো’, ‘নতুন প্রজন্মই যদি অকল পাঠ্যপুথিৰ মাজতে সীমাবদ্ধ থাকে, তেন্তে তেওঁলোকে শিক্ষা ঠিকেই পাব কিন্তু জ্ঞান নাপাব। চাকৰি পাব কিন্তু জীৱনৰ সোৱাদ উপলব্ধি কৰিব নোৱাৰিব’, ‘ভগৱান আকাশত নাথাকে, ভগৱান সকলোৰে মাজত থাকে, ভগৱান ফুলত থাকে-গছত থাকে’ আৰু ‘মোতকৈ বেছি মোৰ কৰ্মখিনিক, মোৰ সৃষ্টিখিনিক মানুহে মনত ৰাখিলে মই বেছি ভাল পাম।’