Zubeen Khetra Visit Garima Saikia Garg:আজি ৰাজ্যজুৰি পালন কৰা হয় গৰু বিহু ৷ কিবা যেন এক উকা উকা, ৰিঙা ৰিঙা অনুভৱ! বিহু বুলি নাচনীয়ে কঁকাল ভাঙিবলৈ লৈও থমকিছে, ঢোলত ছেও দিবলৈ সত যোৱা নাই ঢুলীয়াৰ। কাৰণ এইবাৰ বিহুত নাই অসমীয়াৰ হিয়াৰ আমঠু, প্ৰাণৰ শিল্পী জুবিন গাৰ্গৰ চেনেহৰ আৱেশ। জুবিনবিহীন বিহুত এইবাৰ বহু মঞ্চ হৈ ৰ’ব উকা, বহুজনে পালন কৰিব মাথোঁ হেঁপাহৰ ৰঙালীৰ আনুষ্ঠানিকতা।
নির্বাচনী ধামখুমীয়াৰ মাজৰে নঙলামুখত থিয় দিয়া ৰঙালীক আদৰিবলৈ ৰাজ্যত এইবাৰ নাই পূৰ্বৰ উখল-মাখল। প্রিয় শিল্পীক অনাহুত পৰিস্থিতিত হেৰুওৱাৰ বিষাদৰ পৰা এতিয়াও মুক্ত হ’ব পৰা নাই অসমীয়া। এইবেলি বিহু মঞ্চত নাথাকিব জুবিনৰ মায়াবী কণ্ঠ। ‘এক অতি যন্ত্রণাদায়ক অনুভৱ। জুবিনদা অবিহনে বিহু মঞ্চখনেই আধৰুৱা। জুবিনদাবিহীন বিহু যে কেতিয়াবা উদযাপন কৰিব লাগিব সেই কথা ভাবিবই পৰা নাছিলো।’ এইদৰে কয় এজন উদ্যোক্তাই। জুবিন অবিহনে গভীৰ শূন্যতাই ৰঙালীৰ ৰং ম্লান কৰিছে বুলি কয় মহানগৰীৰ বাসিন্দাই। পদূলিৰ ব’হাগক আদৰিবলৈ অন্তৰে যেন সাহস কৰিব পৰা নাই বুলিও তেওঁ কয়।
আজি গৰু বিহুৰ দিনা হেজাৰ আধুনিকতাই গৰকিলেও অসমৰ আকাশে-বতাহে ব’হাগ তথা ৰঙালী বিহুৰ গুঞ্জন চিৰ প্ৰবহমান। কিন্তু এইবাৰ বহু পৰিমাণে পৰিৱেশ স্তিমিত। বিধানসভা নিৰ্বাচনৰ ভোটগ্রহণ সমাপ্ত হ’ল যদিও কঁকালত টঙালি বান্ধি বিহু উদযাপনৰ বাবে সাজু হ’ব পৰা নাই বিহুবলিয়া অসমীয়াই। কিয়নো প্ৰাণৰ শিল্পীৰ প্রয়াণৰ শোক এতিয়াও সজীৱ হৈয়ে আছে। ৰাজ্যত এইবাৰ জুবিন গাৰ্গবিহীন প্রথম বিহু উদযাপন হ’ব। পৰম্পৰা ৰক্ষা কৰি বিহুক আদৰিবলৈ সাজু হ’লেও ৰাজহুৱা উদযাপনত জুবিনৰ অভাৱ বাৰুকৈয়ে অনুভব কৰিছে অসমীয়াই। জুবিন নাই বাবেই কে’বাখনো উল্লেখযোগ্য মঞ্চৰ বিহু এইবাৰ স্থগিত ৰখা হৈছে। জুবিনৰ অনুপস্থিতিৰ বিষাদ অসমতে সীমাবদ্ধ থকা নাই, দেশৰ বিভিন্ন প্রান্ততে অনুভূত হৈছে প্রিয় শিল্পীৰ অনুভৱ। নগালেণ্ডৰ মন্ত্ৰী টেমজেন ইমনা আলঙে ৰঙালী বিহুৰ শুভেচ্ছা সামাজিক মাধ্যমত জনাই লিখিছে, ‘জুবিনদা আপোনাক মিছ কৰিম।’
আনহাতে মঙলবাৰে গৰু বিহুৰ দিনাই জুবিন ক্ষেত্ৰত উপস্থিত হয় গৰিমা শইকীয়া গাৰ্গ ৷জুবিন ক্ষেত্ৰত উপস্থিত হৈ প্ৰিয়জনক বিচাৰি উচুপি উঠিল গৰিমা শইকীয়া গাৰ্গ আৰু জুবিন গাৰ্গৰ ভগ্নী পামী বৰঠাকুৰ, সহ:শিল্পী ৰাজা বৰুৱা ৷