শনিবাৰে পুৱা হঠাৎ সমগ্ৰ দেশত লাখ লাখ লোকৰ মোবাইল ফোন বাজি উঠাত বহুতে ভয় খাই পৰে। ফোনৰ পৰ্দাত ‘Extremely Severe Alert’ অৰ্থাৎ অত্যন্ত জৰুৰী সতৰ্কবাণী দেখা যায়। যদিও চৰকাৰৰ ফালৰ পৰা স্পষ্ট কৰা হৈছে যে, এইটো সম্পূৰ্ণৰূপে পৰীক্ষামূলক ব্যৱস্থা, আৰু আতংকিত হোৱাৰ কোনো প্ৰয়োজন নাই।
কেন্দ্ৰীয় চৰকাৰে জনোৱা মতে, এই ‘Cell Broadcast’ প্ৰযুক্তি সম্পূৰ্ণ দেশীয় পদ্ধতিত বিকাশ কৰা হৈছে। প্ৰাকৃতিক দুৰ্যোগ বা যিকোনো জৰুৰী পৰিস্থিতিত দেশবাসীক তৎক্ষণাত সতৰ্ক কৰিবলৈ এই ব্যৱস্থা গ্ৰহণ কৰা হৈছে।
দুই মে’ত কেন্দ্ৰীয় গৃহমন্ত্ৰী অমিত শ্বাহ আৰু কেন্দ্ৰীয় যোগাযোগ মন্ত্ৰী জ্যোতিৰাদিত্য সিন্ধিয়াই যৌথভাৱে এই সেৱাৰ সূচনা কৰে। চৰকাৰৰ মতে, বৃহৎ বিপদৰ ক্ষেত্ৰত সতৰ্ক কৰাৰ বাবে এই পৰীক্ষামূলক বাৰ্তা লাখ লাখ নাগৰিকৰ মোবাইললৈ প্ৰেৰণ কৰা হৈছিল।
এইধৰণৰ বাৰ্তা লাভ কৰিলে সাধাৰণ জনসাধাৰণৰ কোনো ধৰণৰ পদক্ষেপ লোৱাৰ প্ৰয়োজন নাই।
এই ব্যৱস্থাৰ কেন্দ্ৰবিন্দু হৈছে ‘SACHET’ নামৰ এটা ইন্টিগ্ৰেটেড এলাৰ্ট প্লাটফৰ্ম, যাক Centre for Development of Telematics য়ে বিকাশ কৰিছে। আন্তঃৰাষ্ট্ৰীয় মানদণ্ড অনুসৰি নিৰ্মিত এই ব্যৱস্থা বৰ্তমান দেশৰ ৩৬খন ৰাজ্য আৰু কেন্দ্ৰশাসিত অঞ্চলত কাৰ্যকৰী কৰা হৈছে।
উল্লেখযোগ্য যে, এই ব্যৱস্থাৰ জৰিয়তে ইতিমধ্যে ১৯টাতকৈ অধিক ভাৰতীয় ভাষাত ১৩৪ বিলিয়নতকৈ অধিক সতৰ্কবাণী প্ৰেৰণ কৰা হৈছে। মূলতঃ প্ৰাকৃতিক দুৰ্যোগ, বতৰ সতৰ্কতা আৰু ঘূৰ্ণিঝড়ৰ সময়ত এই ব্যৱস্থাৰ ব্যৱহাৰ কৰা হয়।
নতুন ‘Cell Broadcast’ প্ৰযুক্তি সাধাৰণ SMS ব্যৱস্থাতকৈ অধিক উন্নত। এই সতর্কবার্তাসমূহ মোবাইলৰ ‘Do Not Disturb’ মোডো উপেক্ষা কৰি উচ্চ শব্দত ব্যৱহাৰকাৰীৰ মনোযোগ আকৰ্ষণ কৰে আৰু স্ক্ৰিনত স্পষ্টভাৱে প্ৰদৰ্শিত হয়।
ভূমিকম্প, চুনামি, বজ্ৰপাতৰ লগতে গেছ লিক বা ৰাসায়নিক বিপদৰ দৰে জৰুৰী অৱস্থাতো এই ব্যৱস্থাই তৎক্ষণাত তথ্য প্ৰেৰণ কৰিব পাৰিব। সম্পূৰ্ণ ৰূপে কাৰ্যকৰী হ’লে এই ব্যৱস্থাই সকলো ধৰণৰ মোবাইল ফোনত একেলগে সতর্কবার্তা প্ৰেৰণ কৰি জনসাধাৰণলৈ দ্ৰুত তথ্য পঠিয়াবলৈ সক্ষম হ’ব।