এপ্ৰিল মাহত দেশজুৰি তাপপ্ৰবাহ আৰু প্ৰচণ্ড গৰমে জনজীৱন অসহনীয় কৰি তুলিছিল । অৱশ্যে মাজে মাজে সক্ৰিয় হোৱা পশ্চিমি ধুমুহাৰ প্ৰভাৱত দেশৰ বিভিন্ন প্ৰান্তত ধুমুহা-বতাহ আৰু বৰষুণো হৈছিল, যাৰ ফলত মাহৰ অন্তিম সময়ত তাপমাত্রা অধিক বৃদ্ধি নাপালে।
এই পৰিপ্ৰেক্ষিতত, মে’ মাহত তাপমাত্রা বৃদ্ধি পাব বুলি পূৰ্বানুমান প্ৰকাশ কৰিছিল ভাৰতীয় আবহাৱা বিভাগ(India Meteorological Department)এ। কিন্তু শেহতীয়াকৈ পশ্চিমি ধুমুহাৰ সক্ৰিয়তাৰ ফলত এতিয়া ধাৰণা কৰা হৈছে যে মে’ মাহতো দিনৰ সৰ্বোচ্চ তাপমাত্রা সাধাৰণ পৰ্যায়ত বা তাতকৈ কম থাকিব পাৰে।
বতৰ বিজ্ঞান বিভাগৰ মতে, দেশৰ উত্তৰ-পশ্চিমাঞ্চলৰ কিছু অংশ, মধ্য ভাৰত আৰু উত্তৰ-পূৱ ভাৰতৰ দক্ষিণাংশত তাপমাত্রা সাধাৰণ বা তাৰ তলত থাকিব পাৰে।
আনহাতে, দেশৰ দক্ষিণ প্ৰান্ত, উত্তৰ-পূৱ আৰু উত্তৰ-পশ্চিমৰ কিছু অঞ্চলত দিনৰ তাপমাত্রা সাধাৰণতকৈ অধিক হ’ব পাৰে। সামগ্ৰিকভাৱে মে’ মাহৰ অধিকাংশ সময় ধুমুহা-বতাহ আৰু বৰষুণৰ মাজতেই অতিবাহিত হোৱাৰ সম্ভাৱনা প্ৰকাশ কৰা হৈছে।
বতৰ বিজ্ঞানীসকলে জনোৱা মতে, মাৰ্চ মাহৰ পৰা দেশত পশ্চিমি ধুমুহাৰ প্ৰৱণতা বৃদ্ধি পাইছে। আৰব সাগৰৰ পৰা অহা জলীয় বাষ্পই এই ধুমুহা-বতাহ আৰু বৰষুণৰ অনুকূল পৰিৱেশ সৃষ্টি কৰিছে। মে’ মাহত এই প্ৰৱণতা আৰু বৃদ্ধি পোৱাৰ সম্ভাৱনা আছে।
মৃত্যুঞ্জয় মহাপাত্ৰ(Mrutyunjay Mohapatra)ৰ মতে, মে’ মাহত দেশজুৰি গড় বৃষ্টিপাততকৈ অধিক বৰষুণ হ’ব পাৰে। কিছুমান অঞ্চলত এই পৰিমাণ ১১০ শতাংশ পৰ্যন্ত বৃদ্ধি পাব পাৰে।
যদিও অধিকাংশ স্থানত সাধাৰণ বা তাতকৈ অধিক বৰষুণ হোৱাৰ সম্ভাৱনা আছে, তথাপি সম্পূৰ্ণভাৱে তাপপ্ৰবাহ নোহোৱা হ’ব বুলি ক’ব নোৱাৰি। কিছুমান অঞ্চলত স্বাভাৱিকতকৈ অধিক তাপপ্ৰবাহো দেখা যাব পাৰে।
বিশেষকৈ হিমাচল প্ৰদেশ উত্তৰাখণ্ড, উত্তৰ-পূৱ বিহাৰ, দেশৰ পূৰ্ব উপকূলীয় ৰাজ্যসমূহ, গুজৰাট আৰু মহাৰাষ্ট্ৰত অধিক তাপপ্ৰবাহৰ সম্ভাৱনা প্ৰকাশ কৰা হৈছে।
