সকলো ঠিক থাকিলে আজি মুখ্যমন্ত্ৰী পদত শপথ গ্ৰহণ কৰাৰ কথা আছিল তেওঁৰ। সেই উপলক্ষে চেন্নাইও সাজু হৈ উঠিছিল। হেজাৰ হেজাৰ ‘টিভিকে’ সমৰ্থকে নিজৰ নেতাক মুখ্যমন্ত্ৰীৰ আসনত দেখিবলৈ উৎকণ্ঠাৰে অপেক্ষা কৰি আছে।
কিন্তু সকলো আশাত এতিয়া বাধা হৈ থিয় দিছে আৰলেকাৰৰ কঠোৰ স্থিতি। ১১৮ৰ ‘ম্যাজিক ফিগাৰ’ স্পৰ্শ নকৰালৈকে কোনোপধ্যেই থলপতি বিজয়(Thalapathy Vijay)ক শপথবাক্য পাঠ নকৰাব বুলি স্পষ্ট জানিয়ে দিছে ৰাজ্যপালে।
উল্লেখযোগ্য যে, এইবাৰৰ নিৰ্বাচনত চমকপ্ৰদভাৱে তামিলনাডু(Tamil Nadu)ত একক বৃহত্তম দল হিচাপে আত্মপ্ৰকাশ কৰিছে ‘টিভিকে’। কিন্তু এতিয়াও সংখ্যাগৰিষ্ঠতাৰ ‘জাদু সংখ্যা’ স্পৰ্শ কৰিব পৰা নাই দলটোৱে। ২৩৪ আসনৰ তামিলনাডু বিধানসভাত চৰকাৰ গঠন কৰিবলৈ প্ৰয়োজন ১১৮খন আসন। আনহাতে, ‘টিভিকে’ৰ দখলত আছে ১০৮খন আসন।
এই পৰিস্থিতিত ভাৰতীয় জাতীয় কংগ্ৰেছে বিজয়ৰ দলক সমৰ্থন জনাইছে। ফলত বৰ্তমান বিজয়ৰ পক্ষত মুঠ ১১৩জন বিধায়কৰ সমৰ্থন আছে। তথাপিও সংখ্যাগৰিষ্ঠতা লাভ কৰিবলৈ এতিয়াও প্ৰয়োজন পাঁচজন বিধায়কৰ সমৰ্থন।
সূত্ৰৰ খবৰ অনুসৰি,ভাৰতীয় কমিউনিষ্ট পাৰ্টি, ভাৰতীয় কমিউনিষ্ট পাৰ্টি (মাৰ্ক্সবাদী) আৰু বিদুথালাই চিৰুথাইগল কাছিৰ দৰে দলৰ স’তে ইতিমধ্যে আলোচনা আৰম্ভ কৰিছে বিজয়ে। কিন্তু এতিয়ালৈকে কোনো দলেই আনুষ্ঠানিক সমৰ্থনপত্ৰ দাখিল কৰা নাই। ফলত জটিলতা অব্যাহত আছে।
১১৩জন বিধায়কৰ সমৰ্থন লৈয়েই বৰ্তমান চৰকাৰ গঠন কৰিব বিচাৰিছে থলপতি। এই দাবী লৈ তেওঁ ইতিমধ্যে দুবাৰ ৰাজ্যপালৰ স’তে সাক্ষাৎ কৰিছে। কিন্তু ১১৮জন বিধায়কৰ সমৰ্থনপত্ৰ নোপোৱালৈকে শপথগ্ৰহণ সম্ভৱ নহয় বুলি স্পষ্ট কৰিছে ৰাজ্যপাল আৰ. ভি. আৰলেকৰে।
বিজয়ৰ দলৰ অভিযোগ, দিল্লীৰ ইংগিততেই ইচ্ছাকৃতভাৱে শপথগ্ৰহণ প্ৰক্ৰিয়া ৰোধ কৰি ৰখা হৈছে। তেওঁলোকৰ দাবী, একক বৃহত্তম দল হিচাপে চৰকাৰ গঠনৰ প্ৰথম অধিকাৰ ‘টিভিকে’ৰ। নিয়ম অনুসৰি, কোনো দল বা জোটে স্পষ্ট সংখ্যাগৰিষ্ঠতা নাপালে বৃহত্তম দলকেই চৰকাৰ গঠনৰ সুযোগ দিয়া হয়।
লগতে সংখ্যাগৰিষ্ঠতা প্ৰমাণ কৰিব লাগে বিধানসভাত, ৰাজ্যপালৰ সন্মুখত নহয়। ৰাজভৱনে কোনোপধ্যেই আগতীয়াকৈ সংখ্যাগৰিষ্ঠতাৰ প্ৰমাণ বিচাৰিব নোৱাৰে বুলিও দাবী দলটোৰ।
ইফালে, সূত্ৰৰ দাবী অনুসৰি, অতি সোনকালে যদি ৰাজ্যপালে বিজয়ক শপথবাক্য পাঠ নকৰায়, তেন্তে ‘টিভিকে’ আদালতৰ দ্বাৰস্থ হ’ব পাৰে। দলটোৰ অভিযোগ, ৰাজ্যপালৰ স্থিতি সম্পূৰ্ণ বেআইনী।
তাৎপৰ্যপূর্ণভাৱে, চৰকাৰ গঠনত সমৰ্থন নিদিলেও ৰাজ্যপালৰ এই ভূমিকাৰ বিৰোধিতা কৰি বিজয়ৰ কাষত থিয় দিছে দ্ৰাবিড় মুন্নেত্ৰ কাঝাগম আৰু বিদুথালাই চিৰুথাইগল কাছিৰ দৰে তামিল দলসমূহ। ডিএমকেৰ এজন নেতাই মন্তব্য কৰিছে, “ৰাজ্যপালে যি কৰিছে সেয়া সংবিধানবিৰোধী, লগতে তামিল স্বাভিমানৰ বিপৰীত।”
আনকি ৰাজ্যপালৰ বিৰুদ্ধে প্ৰতিবাদ সাব্যস্ত কৰাৰ সিদ্ধান্ত লৈছে কংগ্ৰেছেও। এই সকলোৰ মাজতেই পুনৰ আশাৰ সঞ্চাৰ হৈছে বিজয় শিবিৰত। সূত্ৰৰ খবৰ অনুসৰি, ভিচিকে নেতাসকলে বিজয়ক সমৰ্থন কৰাৰ সম্ভাৱনা বিচাৰ-বিবেচনা কৰি আছে। যদি সেই সমৰ্থন লাভ কৰে, তেন্তে বিজয়ৰ হাতত বিধায়কৰ সংখ্যা ১১৭লৈ বৃদ্ধি পাব পাৰে।