Indo-Bangla:
দৈনিক অগ্ৰদূত ডিজিটেল ডেক্স:সদ্যসমাপ্ত অসম আৰু পশ্চিমবংগৰ বিধানসভা নির্বাচনত বিজেপিয়ে বৃহৎ জয় সাব্যস্ত কৰাৰ পাছতে বিদেশী সমস্যাক লৈ তৎপৰতা প্ৰদৰ্শন কৰিবলৈ লৈছে নৰেন্দ্ৰ মোদী চৰকাৰে। অবৈধ বিদেশীক প্রত্যর্পণৰ বাবে মোদী চৰকাৰে সম্প্রতি বাংলাদেশৰ সহযোগিতা বিচাৰিছে।
নতুন দিল্লীত বৈদেশিক মন্ত্রণালয়ৰ সাপ্তাহিক সংবাদমেলত মন্ত্রণালয়ৰ মুখপাত্ৰ ৰণধীৰ জয়ছোৱালে কয়, ‘ভাৰতৰ পৰা অবৈধ বিদেশীক ঘূৰাই পঠোৱাৰ বাবে বাংলাদেশৰ সহযোগিতাৰ প্ৰয়োজন। ২,৮৬২ জনৰ নাগৰিকত্ব পৰীক্ষণৰ কাম বাংলাদেশে পেলাই থৈছে। ইয়াৰে কেতবোৰ পৰীক্ষণ কাম পাঁচ বছৰৰো অধিককাল নিষ্পত্তিহীন হৈ পৰি আছে।’
উল্লেখ্য যে পশ্চিমবংগত বিজেপিৰ ঐতিহাসিক জয়ৰ পাছত অলপতে বাংলাদেশৰ বৈদেশিক মন্ত্ৰী খলিলুৰ ৰহমানে ভাৰতৰ বিদেশী বহিষ্কৰণক লৈ প্ৰতিক্রিয়া প্রকাশ কৰে। ভাৰতৰ এই ব্যৱস্থাৰ বিৰোধিতা কৰাৰ ইংগিত দি তেওঁ ঢাকাত এখন সংবাদমেলত তেওঁ কয়, ‘আপোনোলোক (সাংবাদিক)-এ দেখিছে যে অসমৰ
মুখ্যমন্ত্রীয়ে বিদেশী বহিষ্কৰণক লৈ যি কথা ক’লে আমি তাৰ বিৰুদ্ধে যি শক্তিশালী ব্যৱস্থা গ্রহণ কৰিব লাগে আমি গ্রহণ কৰিম।’ একেদৰে দেশখনৰ বিখ্যাত অগ্রণী সংবাদপত্র ‘প্রথম আলো’ত এটা প্রবন্ধত কয়, ‘পশ্চিমবংগত বিজেপিৰ বিজয় আৰু অসমৰ ক্ষমতালৈ ড:হিমন্ত বিশ্ব শৰ্মাৰ প্ৰত্যাৱৰ্তনে আমাৰ দেশৰ পূব আৰু পশ্চিম সীমান্তত গেৰুৱা চাপ বৃদ্ধি কৰিছে।’
উল্লেখ্য যে সদ্যসমাপ্ত নির্বাচনত বিজেপিয়ে অনুপ্ৰৱেশৰ সমস্যাটোক লৈ পশ্চিমবংগতো ব্যাপক প্ৰচাৰ চলায়। আনকি কেন্দ্ৰীয় গৃহমন্ত্রী অমিত শ্বাহে বিভিন্ন প্ৰচাৰ সভাত হুংকাৰ দিছিল যে দেশৰ পৰা বাছি বাছি এজন এজনকৈ বাংলাদেশী বহিষ্কৰণ কৰা হ’ব। গতিকে দুয়োখন ৰাজ্যত বিজেপিৰ ঐতিহাসিক জয়ক লৈ উদ্বিগ্ন হৈ বাংলাদেশে ভাৰতৰ বাবে অনাকাংক্ষিত মন্তব্য কৰিছে।
বাংলাদেশৰ এনে মন্তব্যৰ প্ৰতিক্ৰিয়া প্ৰকাশ কৰি বৈদেশিক পৰিক্ৰমাৰ মুখপাত্র জয়ছোৱালে লগতে কয়, ‘আমাৰ নীতি হ’ল যে ভাৰতত অবৈধভাবে বাস কৰা সকলো বিদেশী নাগৰিকক আইন, প্রতিষ্ঠিত দ্বিপাক্ষিক ব্যৱস্থা আৰু নিয়মাৱলী অনুসৰি বহিষ্কাৰ কৰিব লাগিবই। আমি আশা কৰো যে বাংলাদেশেও নাগৰিকত্ব পৰীক্ষণৰ কাম ক্ষিপ্ৰতৰ কৰিব যাতে অবৈধ বিদেশী বহিষ্কৰণৰ কাম মসৃণভাবে চলে।’
উল্লেখ্য যে যোৱা ২৬ এপ্রিলত অসমৰ মুখ্যমন্ত্ৰীয়ে ঘোষণা কৰে যে ২০ জন বাংলাদেশীক ওভতাই পঠোৱা হৈছে। মুখ্যমন্ত্ৰীৰ এই ঘোষণাক লৈ বাংলাদেশে তীব্র প্রতিক্রিয়া প্রকাশ কৰি ঢাকাস্থিত ভাৰতীয় উচ্চায়ুক্তক তলব কৰিছিল।