কোকৰাঝাৰত যুৱ প্ৰজন্মৰ হাৰ্টথ্ৰব জুবিন গাৰ্গ

কোকৰাঝাৰ ,২৫ আগষ্ট :- কাঞ্চনজঙ্ঘাৰ প্ৰমোচনৰ বাবে আজি কোকৰাঝাৰত উপস্থিত হ’ল যুৱ প্ৰজন্মৰ হাৰ্টথ্ৰব জুবিন গাৰ্গ । কোকৰাঝাৰ সদৰ চহৰৰ নাতিদূৰৈৰ ভোটগাঁও হাইস্কুল প্ৰাংগনত আজি জুবিন গাৰ্গ উপস্থিত হৈ কেবা সহস্ৰাধিক অনুৰাগীৰ মাজত কাঞ্চনজঙ্ঘাৰ বাণিজ্যিক প্ৰচাৰকাৰ্য চলায় । অনুৰাগীৰ হৰ্ষধ্বনি আৰু অতি উৎসাহময় পৰিস্থিতিৰ মাজত জুবিন গাৰ্গে অহা ৬ চেপ্টেম্বৰত মুক্তিপাবলগীয়া কাঞ্চনজঙ্ঘা সকলোকে চাবলৈ আহ্বান জনায় । মোৰ কোনো জাতি নাই , মোৰ কোনো ধৰ্ম নাই , মোৰ কোনো ভগৱান নাই , মই মুক্ত , মই কাঞ্চনজঙ্ঘা সংলাপেৰে জুবিন গাৰ্গে কাঞ্চনজঙ্ঘাৰ প্ৰচাৰ কাৰ্য আৰম্ভ কৰি এটি গীতো পৰিৱেশন কৰে । তুমুল হৰ্ষধ্বনি আৰু যুৱ প্ৰজন্মৰ ব্যাপক উৎসাহ উদ্দীপনাৰ মাজত জুবিন গাৰ্গে কোকৰাঝাৰত কাঞ্চনজঙ্ঘাৰ বাণিজ্যিক প্ৰচাৰ সামৰি বঙাইগাঁওলৈ প্ৰস্থান কৰে । বঙাইগাঁওতো জুবিন গাৰ্গে কাঞ্চনজঙ্ঘাৰ বাণিজ্যিক প্ৰচাৰ কাৰ্য চলাব ।
আনহাতে সংবাদ মাধ্যমৰ আগত জুবিন গাৰ্গে কাঞ্চণজঙ্ঘা সফল হব বুলি মন্তব্য কৰি তেওঁ নিজকে ধনাত্মক মনৰ মানুহ বুলি দাবী কৰে । সকলোকে কাঞ্চনজঙ্ঘা চাবলৈ আহ্বান জনাই জুবিন গাৰ্গে এয়া তেওঁৰ তৃতীয় ছবি বুলি মন্তব্য কৰে । অনুৰাগীয়ে তেওঁৰ ভৰি মচি দিয়া কাৰ্য বেয়া পায় বুলি উল্লেখ কৰি তেওঁলোকৰ প্ৰতি মৰম -আশীৰ্বাদ আছে আৰু তেওঁলোকৰ বাবেই কাম কৰি আছে বুলি মন্তব্য প্ৰকাশ কৰিছে জুবিন গাৰ্গে । আনহাতে আৰ্চাৰ গহেলা বড়োৰ প্ৰতি পূৰ্বে ঘোষণা কৰা আৰ্থিক সাহাৰ্য অচিৰেই প্ৰদান কৰা হব বুলিও মন্তব্য কৰিছে জুবিন গাৰ্গে