লকডাউনৰ সুযোগ লৈ কাজিৰঙাত গড় হত্যাৰ পৰিকল্পনা ব্যৰ্থ 

সম্প্ৰতি কৰ’না ভাইৰাছক নিয়ন্ত্ৰণ কৰিবলৈ দিয়া লকডাউনৰ সময়ছোৱাত ৰাজ্যৰ বিভিন্ন প্ৰান্তত ব্যস্ত আছে  প্ৰশাসনে ৷ লক ডাউনৰ সময়ছোৱাত প্ৰশাসনৰ ব্যস্ততাৰ পূৰ্ণ সুযোগ গ্ৰহণ কৰিছে কাজিৰঙাৰ চোৰাং চিকাৰীয়ে ৷ কিন্তু গড় হত্যা কৰি খৰ্গ বিক্ৰী কৰিবলৈ লোৱাৰ পৰিকল্পনাক সোমবাৰে কমাৰগাঁও আৰক্ষীয়ে ব্যৰ্থ কৰি গাগম ইকো নামৰ এটা দুধৰ্ষ চিকাৰীক গ্ৰেপ্তাৰ কৰে ৷ ইপিনে অসমৰ দুই প্ৰভাৱশালী চোৰাং চিকাৰীয়ে ভাড়াতীয়া হিচাপে আনিছিল বুলি বিস্ফোৰক স্বীকাৰোক্তি কৰে গ্ৰেপ্তাৰ কৰা চিকাৰী গাগমে ৷ অৱশ্যে তদন্তৰ খাতিৰত অসমৰ দুই চিকাৰীৰ নাম সংবাদ মাধ্যমৰ আগত প্ৰকাশ কৰা নাই আৰক্ষীয়ে ৷ আনহাতে দুই প্ৰভাৱশালী চোৰাং চিকাৰীকো  অতি শীঘ্ৰেই গ্ৰেপ্তাৰ কৰা হ’ব বুলি জানিবলৈ দিয়ে কমাৰগাঁও আৰক্ষী থানাৰ ভাৰপ্ৰাপ্ত আৰক্ষী বিষয়া ময়ূৰজিত গগৈয়ে ৷ আৰক্ষীয়ে গ্ৰেপ্তাৰ কৰা গাগম ইকোৰ পৰা দুটা বন্ধুক, যথেষ্ট পৰিমাণৰ সক্ৰিয় গুলি,চোকা অস্ত্ৰ শস্ত্ৰ উদ্ধাৰ কৰিছে ৷