ভাৰতত ক’ভিড-১৯ ৰ মোকাবিলাৰ ক্ষেত্ৰত বৃহৎ সংখ্যক আমোলাই প্ৰতিদিনে জাৰি কৰা নিত্য নতুন নীতি নিৰ্দেশনাই সাধাৰণ ৰাইজৰ মাজত বিশৃংখলতাৰ সৃষ্টি কৰিছে ৷ কৰ’না ভাইৰাছৰ সংক্ৰমণৰ দিনটোতে কমেও ৪,১৩০ টা নিৰ্দেশ জাৰি কৰিছে কেন্দ্ৰীয় চৰকাৰৰ লগতে বিভিন্ন ৰাজ্যৰ চৰকাৰে ৷ এই বৃহৎ সংখ্যক নিৰ্দেশৰ ফলত কাৰ্যক্ষেত্ৰত যথেষ্ট বিশৃংখলতাৰ সৃষ্টি হোৱা বুলি শেহতীয়া অধ্যয়নত প্ৰকাশ পাইছে। এনে পৰিপ্ৰেক্ষিতত আমোলাতন্ত্ৰৰ ভৰত গধুৰ হৈ পৰিছে ক’ভিড ১৯ ৰ মোকাবিলাৰ বাস্তৱ ছবিখন । এটাৰ পাছত আনটো সংস্কাৰিত নিৰ্দেশ গাইডলাইনে বাস্তৱ ৰূপায়ণকাৰীসকলক ভাৰাক্ৰান্ত কৰি তোলাই নহয়, ব্যাপক বিভ্ৰান্তিৰ সৃষ্টি কৰিছে । দেশৰ বিভিন্ন অংশৰ লগত অসমো বিচ্ছিন্ন নহয়। অসমতো নীতি নিৰ্দেশনাৰ ঢল বৈছে যদিও ইয়াৰ ফলত বাস্তৱ ৰূপায়ণকাৰী বিষয়া কৰ্মচাৰীসকল বিভ্ৰান্ত হৈছে ।
স্বাভাৱিকতে ইয়াৰ প্ৰভাৱ পৰিছে সাধাৰণ ৰাইজৰ ওপৰত । ৰাজনৈতিক বিশেষজ্ঞ অক্ষয় মংগলাই কয় যে ভাৰতৰ আমোলাতন্ত্ৰৰ অধিকাংশই আইন নীতি আৰু তত্ত্বগত বিষয়ৰ মাজত গভীৰভাৱে নিমজ্জিত হৈ আছে ৷ নীতি নিয়ম, প্ৰক্ৰিয়া আৰু পদবীৰ খলপৰ চক্ৰবেহুৰ আমোলাতান্ত্ৰিক সংস্কৃতিৰ মাজত সোমাই আছে প্ৰশাসনিক ব্যৱস্থাৱলী ৷ ইয়াৰ ফলত বহুসময়ত ম্লান হৈছে সাধাৰণ মানুহৰ জীৱন। নৃতত্ত্ববিদ নয়নিকা মাথুৰে কয় যে এনে এক প্ৰক্ৰিয়াৰ মাজেৰে কাম কৰা ভাৰতৰ আমোলাতন্ত্ৰ দৰাচলতে কাগজৰ বাঘ। ইয়াৰ যথাযোগ্য উদাহৰণ তথ্য জনা অধিকাৰ আইন ৷ এই আইনৰ জৰিয়তে নাগৰিকে চৰকাৰক প্ৰশ্ন কৰিব পাৰে আৰু দায়বদ্ধ কৰিব পাৰে । ফাইলবোৰ স্বচ্ছ হ’লেই এনে আইন ব্যৱহাৰ কৰিব পাৰে নাগৰিকে ৷ অৱশ্যে এনে আইন চৰকাৰ আৰু নাগৰিকৰ মাজত বিভ্ৰান্তিৰ সৃষ্টি কৰে। ক’ভিড ১৯ ৰ দৰে ভয়াৱহ সংকটৰ সময়ত ভাৰতীয় আমোলাতন্ত্ৰ অধিক সবল আৰু পোনপটীয়াভাৱে সক্ৰিয় হ’ব পাৰিলেহেঁতেন ৷ ইয়াৰ পৰিৱৰ্তে শেহতীয়া নিৰ্দেশবোৰ ইমানেই দীঘলীয়া হৈছে আৰু এনেদৰে লিখা হৈছে যিবোৰ তৃণমূলৰ এজন চৰকাৰী কৰ্মচাৰীৰ বাবে বুজি পোৱাটো কঠিন হৈ পৰে।
এই মন্তব্য ভাৰতৰ প্ৰাক্তন প্ৰশাসনিক বিষয়া পদ্মবীৰ সিঙৰ । আনহাতে দেশৰ বিভিন্ন প্ৰান্তত দেখা গৈছে যে চৰকাৰী নীতি নিৰ্দেশনা বাস্তৱ নীতি নোহোৱা বাবে সাধাৰণ ৰাইজ নানা আহুকালৰ সন্মুখীন হৈছে । ৰাইজৰ প্ৰয়োজনীয়তা বোধগম্য কৰাৰ ক্ষেত্ৰত আমোলাসকল বিফল হোৱা বুলিও অভিযোগ উঠিছে। অৱসৰপ্ৰাপ্ত বিষয়াজনে লগতে কয় যে আমোলাসকলৰ সাধাৰণতে দীঘলীয়া তথ্য প্ৰকাশ কৰি নিয়ন্ত্ৰণৰ প্ৰৱণতা থাকে ৷ ইয়াক নাশ কৰাৰ প্ৰয়োজন ৷আন এজন প্ৰাক্তন আই এছ বিষয়া অৰুণা শৰ্মাই কয় যে ভাৰতীয় আমোলাসকলে মহৎ দায়িত্ব পালন কৰিছে। সেই বুলি তেওঁলোকৰ ভূমিকা ধুৱলীকুৱলী কৰা উচিত নহয় । লগতে তেওঁ আমোলাসকল অৰ্থনৈতিক কাৰ্যকলাপ মুকলি কৰি দিয়াৰ সময়ত অধিক মনোযোগী হোৱাটো উত্তম বুলি কয় । ৰাজস্থানৰ আই এল ডি স্কিল ইউনিভাৰ্চিটিৰ উপাচাৰ্য তথা প্ৰাক্তন আই এছ বিষয়া ললিত পানোৱাৰে কয় যে তলাবন্ধ আৰু সামাজিক দূৰত্বৰ দৰে কঠোৰ নীতি নিয়ম ভাৰতীয় নাগৰিকৰ বাবে একেবাৰে নতুন বিষয় ৷ সেয়েহে মানুহ আতংকিত হৈছে ৷এই পৰিস্থিতিক আমোলাসকলে নিয়ন্ত্ৰণ কৰিবলৈ সক্ষম হোৱা বুলি তেওঁ মন্তব্য কৰে ।
