কৰ’না আক্ৰান্তৰ পৰিয়ালৰ বিৰুদ্ধে অমানৱীয় কাৰ্য সংঘটিত কৰি তীব্ৰ সমালোচনাৰ সন্মুখীন হৈছে বাংগালুৰু মহানগৰ পালিকা । মহানগৰখনৰ দুটি পৰিয়ালৰ সদস্যসকল ঘৰৰ ভিতৰত থকা অৱস্থাতে প্ৰৱেশ দুৱাৰ টিনপাতেৰে বন্ধ কৰি দিয়ে মহানগৰ পালিকাৰ কৰ্মীয়ে । সবাতোকৈ ডাঙৰ কথা ইয়াৰে এটি ঘৰত কোনো কৰ’না আক্ৰান্ত লোক নাছিল।
একমাত্ৰ প্রতিবেশী হোৱাৰ দোষতে দ্বিতীয়টো ঘৰৰো প্ৰৱেশ দুৱাৰত টিন লগাই বন্ধ কৰি দিয়া হয় । মাত্ৰ এনে খবৰৰ ভিত্তিতে পালিকাৰ কৰ্মী সকলে হোম কন্টেইনমেন্টৰ নামত পৰিয়াল দুটিক সম্পূৰ্ণভাৱে আবদ্ধ কৰি পেলায় ঘৰৰ ভিতৰতে । পৰিয়াল দুটিৰ আন এঘৰ প্ৰতিবেশীয়ে টিনৰে বন্ধ কৰি দিয়া দুৱাৰ দুখনৰ ছবি তুলি প’ষ্ট কৰি দিয়ে ছ’চিয়েল মিডিয়াত ।
ইয়াৰ পাছতে তীব্ৰ সমালোচনাৰ সন্মুখীন হয় নগৰ পালিকা । স্থানীয় প্ৰশাসনৰ এনে কাণ্ডক লৈ মহানগৰখনৰ বাসিন্দা সকল সৰৱ হৈ পৰাত পালিকাই দুৱাৰ বন্ধ কৰা টিন আঁতৰাই নিবলৈকো বাধ্য হয় । অৱশেষত মহানগৰ পালিকাৰ আয়ুক্ত এন মঞ্জুনাথ প্ৰসাদৰ হস্তক্ষেপত বন্ধ দুৱাৰ মুকলি কৰাৰ লগতে এই ঘটনাৰ বাবে আয়ুক্তই ক্ষমা বিচাৰি দুখ প্ৰকাশ কৰে ।
