হজৰত মহম্মদৰ ব্যংগচিত্ৰ প্ৰকাশৰ বাবে ফ্ৰান্সৰ জনপ্ৰিয় কাৰ্টুন আলোচনী ‘চাৰ্লিএবদো’ আলোচনীখনে পাঁচ বছৰৰ পূৰ্বে ভয়ানক সন্ত্ৰাসবাদী আক্ৰমণৰ বলি হ’বলগীয়া হৈছিল । এতিয়া সেই ভয়ানক স্মৃতি আঁতৰাই থৈ ফৰাচী আলোচনীখনে নিজস্ব পদ্ধতিৰেই সন্ত্ৰাসবাদৰ বিৰুদ্ধে থিয় দিব ।আলোচনীখনৰ কৰ্তৃপক্ষই এই কথা সদৰী কৰিছে । চলিত সপ্তাহৰ পৰাই তেওঁলোকে পুনৰ ইছলাম ধৰ্মৰ প্ৰৱৰ্তক মহম্মদৰ কাৰ্টুন চিত্ৰ প্ৰকাশ কৰিব ।
ফৰাচী ‘চাৰ্লি এবদো’ৰ কৰ্ণধাৰ লৰেন ৰিচে কয় যে এয়াই হ’ব সন্ত্ৰাসবাদৰ বিৰুদ্ধে উভতি থিয় দিয়াৰ প্ৰকৃত পথ । ২০১৫ ৰ জানুৱাৰীত আলোচনীখনত হজৰত মহম্মদৰ ব্যংগচিত্ৰ প্ৰকাশৰ অভিযোগত সৰৱ হৈছিল ইছলামধৰ্মী লোকসকল । সেই অভিযোগতে ২০১৫ৰ সাত জানুৱাৰীত আলোচনীখনৰ পেৰিছৰ কাৰ্যালয়ত প্ৰৱেশ কৰি দুজন সন্ত্ৰাসবাদীয়ে নিৰ্বিচাৰ গুলিচালনা কৰাত ১২ জন লোক নিহত হৈছিল । নিহতসকলৰ ভিতৰত আছিল জনপ্ৰিয় কাৰ্টুনিষ্ট্ কেবু্যও ।
এই ষড়যন্ত্ৰত জড়িত থকাৰ অভিযোগত আৰক্ষীয়ে তদন্ত কৰি ১৪ জনক গ্ৰেপ্তাৰ কৰে । সেই গোচৰৰ বিচাৰ প্ৰক্ৰিয়া অব্যাহত আছে । পৰৱৰ্তী কিছু সপ্তাহলৈ আলোচনী খনত কেবু্যৱে অংকন কৰা বিভিন্ন ব্যংগ চিত্ৰ প্ৰকাশ কৰা হ’ব আৰু সেইবোৰ কাৰ্টুন হ’ব মহম্মদৰে ।
২০১৫চনত কাৰ্যালয়ত হোৱা ভয়াৱহ সন্ত্ৰাসবাদী আক্ৰমণত ‘চাৰ্লি এবদো’ৰ জনপ্ৰিয়তা আৰু আলোচনীখনৰ প্ৰতি সমৰ্থনো কে’বাগুণে বৃদ্ধি পায় । আলোচনী খনৰ তৰফৰ পৰা জনোৱা হয় যে তেওঁলোকলৈ মহম্মদৰ কাৰ্টুন পুনঃপ্ৰকাশৰ বাবে অনেক অনুৰোধ আহিছিল । কিন্তু গোচৰ চলি থকাৰ বাবে তেতিয়া সেইবোৰ প্ৰকাশ কৰা নাছিল ।
